އިންޑިއާގެ ސިނަމާގައި މިހާތަނަށް ފެނިގެންދިޔަ އެންމެ މަޝްހޫރު އެއް ބަތަލާ، މަދޫބާލާގެ ހަޔާތުގެ މައްޗަށް ބިނާކޮށް އުފައްދާ ފިލްމުގެ މައި ރޯލަށް ކަލްޔާނީ ޕްރިޔަދަރުޝަން ހަމަޖައްސަން އުޅޭކަމަށް މީޑިއާ ރިޕޯޓުތަކުން ބުނެފިއެވެ.
މިއީ ކުޅަދާނަ ފިލްމު ޑައިރެކްޓަރު/ޕްރޮޑިއުސަރު ސަންޖޭ ލީލާ ބަންސާލީ ޕްރޮޑިއުސްކޮށް، ފިލްމު "ޑާލިންގްސް"ގެ ޑައިރެކްޓަރު ޖަސްމީތު ކޭ ރީން ޑައިރެކްޓްކުރާ ފިލްމެކެވެ.
ކުރިން އަޑުއެރި ގޮތުގައި މި ބައޮޕިކްއިން މަދޫބާލާގެ ރޯލުން ފެންނާނީ "ދުރަންދަރު"ގެ ތަރި ސާރާ އަރުޖުންއެވެ. ނަމަވެސް، އެންމެ ފަހުގެ ރިޕޯޓުތައް ބުނާގޮތުން، ފިލްމު އުފައްދާ ފަރާތްތަކުގެ އެންމެ ފުރަތަމަ ހޮވުމަކީ ވެސް ދެކުނު އިންޑިއާގެ ސިނަމާގައި މަގުބޫލުވަމުން އަންނަ ބަތަލާ ކަލްޔާނީ ޕްރިޔަދަރުޝަންއެވެ. ކަލްޔާނީ އަކީ މަޝްހޫރު ޑައިރެކްޓަރު ޕްރިޔަދަރުޝަން އާއި ކުރީގެ ބަތަލާ ލިސީގެ ދަރިފުޅެވެ.
މަދޫބާލާގެ ބައޮޕިކްއަށް ގެންނަން ނިންމިކަމަށް ބައެއް ރިޕޯޓުތަކުން ބުނެފައިވާ ބަތަލާ ސާރާ އަރުޖުން--ފޮޓޯ/އިންޑިއަންއެކްސްޕްރެސް
މަދޫބާލާގެ ރޯލަށް ކަލްޔާނީ ހޮވަން އުޅެނީ، އޭނާގެ ކިބައިގައި ހުރި މައުސޫމްކަމާއި، ހިތްގައިމުކަމުގެ އިތުރުން އަސަރުގަދަ އެކްޓިންއެއް ދެއްކުމުގެ ގާބިލުކަން ހުރުމުން ކަމަށް ބުނެވެއެވެ.
މި ސިފަތަކަކީ ކުރީގެ ލެޖެންޑަރީ ބަތަލާ މަދޫބާލާއާ ވަރަށް ބޮޑަށް ގުޅޭ ސިފަތަކެކެވެ. ހާއްސަކޮށް ކަލްޔާނީގެ ފަހުގެ ފިލްމު "ލޯކާ"އަށް ލިބުނު ބޮޑު ކާމިޔާބީއާ އެކު، އޭނާ ވަނީ މުޅި ބެލުންތެރިންގެ ބޮޑު މަގުބޫލުކަމެއް ހޯދާފައެވެ.
ސަންޖޭގެ މަޝްވަރާ އާއި ބެލުމުގެ ދަށުން އުފައްދާ މަދޫބާލާގެ މި ބައޮޕިކް އަކީ، އިންޑިއާގެ ސިނަމާގެ "އެވަގްރީން" ނުވަތަ ރީތިކަމުގެ މިސާލެއްގެ ގޮތުގައި ބެލެވޭ މަދޫބާލާގެ މަސައްކަތަށް އިހުތިރާމް އަދާކުރުމުގެ ބަންސާލީ މި ފިލްމުގެ ފަހަތުގައި ގޮތުން އުފައްދާ ފިލްމެކެވެ.
މިކަމާ ގުޅޭގޮތުން ރަސްމީ ބަހެއް އަދި ލިބިފައި ނުވި ނަމަވެސް، މި ހަބަރާއެކު ފިލްމީ ދާއިރާގައި ވަނީ ބޮޑު ބަހުސެއް ފެށިފައެވެ. މިއީ ތެދު ހަބަރަކަށް ވެއްޖެނަމަ، މި ބައޮޕިކްއިން ކަލްޔާނީ ބޮލީވުޑަށް ތައާރަފްވާނެއެވެ.
ކަލްޔާނީ މިހާތަނަށް ގިނައިން ފެނިގެން ގޮސްފައި ވަނީ މަލަޔާޅަމް، ޓެމިލް އަދި ތެލެގޫ ފިލްމުތަކުންނެވެ. އޭނާގެ އެންމެ ފަހުގެ ފިލްމު "ލޯކާ ޗެޕްޓަރ 1" އަކީ މަލަޔާޅަމް ސިނަމާގެ ތާރީހުގައި ވެސް އެންމެ ބޮޑު އާމްދަނީއެއް ހޯދި އެއް ފިލްމެވެ.
މީގެ އިތުރުން "ޖީނީ" އަދި "މާޝަލް" ކިޔާ ދެ ތަމަޅަ ފިލްމެއްގެ މަސައްކަތްވެސް އޭނާ ދަނީ ކުރަމުންނެވެ. އުންމީދު ކުރެވެނީ މި ދެ ފިލްމު ވެސް މިއަހަރު ސިނަމާތަކަށް އަންނާނެ ކަމަށެވެ.