ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓާ ޖެނެރަލް އޮފް ޕަބްލިކް ހެލްތުގެ މަގާމަށް، އެ އެޖެންސީގެ ޑެޕިއުޓީ ޑިރެކްޓާ ޖެނެރަލްގެ މަގާމުގައި މިހާތަނަށް ހުންނެވި އިބްރާހީމް ނިޝާން އަޙްމަދު މިއަދު އައްޔަންކުރައްވައިފިއެވެ.
މި މަގާމަށް ނިޝާން އައްޔަންކުރައްވާފައި މިވަނީ، ކުރިން އެ މަގާމުގައި ހުންނެވި މައިމޫނާ އަބޫބަކުރު ރިޓަޔާކުރެއްވުމާ ގުޅިގެންނެވެ. މައިމޫނާ ރިޓަޔާކުރެއްވުމާ ގުޅިގެން އެޗްޕީއޭގެ ޑިރެކްޓާ ޖެނެރަލްގެ މަގާމަށް ބޭފުޅަކު ހޯދުމަށް ސިއްހަތާ ބެހޭ ވުޒާރާއިން މީގެ ކުރިން ވަނީ އިއުލާނުކޮށްފައެވެ.
އެޗްޕީއޭގެ އާ ޑިރެކްޓާ ޖެނެރަލްގެ މަގާމާ މިއަދު ހަވާލުވެވަޑައިގަތް ނިޝާން އަކީ އާންމު ސިއްހަތުގެ ދާއިރާގައި ގިނަ އަހަރުތަކެއް ވަންދެން ހިދުމަތްކުރައްވާފައިވާ ތަޖުރިބާކާރު ބޭފުޅެކެވެ. އެގޮތުން، އެޗްޕީއޭގެ ޑެޕިއުޓީ ޑިރެކްޓާ ޖެނެރަލްގެ މަގާމުގައި ހުންނަވައިގެން އޭނާ ވަނީ ރާއްޖޭގެ އާންމު ސިއްހަތު ރައްކާތެރިކުރުމުގެ ގިނަ މަސައްކަތްތަކެއްގައި އިސް ދައުރެއް އަދާކުރައްވާފައެވެ. ހާއްސަކޮށް ކޮވިޑް-19 ގެ އާލަމީ ވަބާގެ ދުވަސްވަރު ރާއްޖޭގައި އެޅި ރައްކާތެރިކަމުގެ ފިޔަވަޅުތައް ތަންފީޒުކުރުމުގައްޔާއި، އަތޮޅުތެރޭގެ ސިއްހީ ނިޒާމު ވިލަރެސްކުރުމުގައި ނިޝާން ވަނީ މުހިންމު މަސައްކަތްތަކެއް ކުރައްވާފައެވެ.
މީގެ އިތުރުން، ރާއްޖެއިން ހިމަބިހި އަދި ރުބެއްލާ ނައްތާލުމަށް ކުރެވުނު މަސައްކަތްތަކުގައްޔާއި، އެކި ކަހަލަ ގައިންގަޔަށް އަރާ ބަލިތައް ކޮންޓްރޯލްކުރުމަށް އެޗްޕީއޭއިން ހިންގި ގައުމީ ފެންވަރުގެ ޕްރޮގްރާމްތަކުގައި ވެސް ނިޝާން ވަނީ އިސްކޮށް ހަރަކާތްތެރިވެވަޑައިގެންފައެވެ.
އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން އުފައްދާފައިވާ ހެލްތު ޕްރޮޓެކްޝަން އެޖެންސީ ހިންގުމުގެ އެންމެ އިސް ޒިންމާ އޮންނަނީ ޑިރެކްޓާ ޖެނެރަލް އޮފް ޕަބްލިކް ހެލްތަށެވެ. ސިއްހީ ކުއްލި ނުރައްކަލުގެ ހާލަތްތައް އިއުލާނުކުރުމާއި، އެފަދަ ހާލަތްތަކުގައި އާންމުންގެ ރައްކާތެރިކަމަށްޓަކައި އަޅަންޖެހޭ ހާއްސަ ފިޔަވަޅުތައް އެޅުމުގެ ބާރު ގާނޫނުން ދީފައިވަނީ މި މަގާމުގައި ހުންނަވާ ބޭފުޅަކަށެވެ.