އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން ވެސް މިއަދު އިސްތިއުފާ ދެއްވައިފިއެވެ.
އިސްތިއުފާ ދެއްވިކަން މަތީން ހާމަކުރެއްވީ ސޯޝަލް މީޑިއާގައެވެ. އޭނާ ވިދާޅުވީ މިއަދުން ފެށިގެން އިސްތިއުފާ ދެއްވީ ކަމަށެވެ. ނަމަވެސް ސަބަބު ހާމަނުކުރައްވައެވެ.
މިއަދު މަތީން އިސްތިއުފާ ދެއްވިއިރު، މިފްކޯގެ މެނޭޖިން ޑިރެކްޓަރު ފަރުހަތު ޝަހީރު ވެސް ވަނީ އިސްތިއުފާ ދެއްވައިފައެވެ.
މިދިޔަ ދެ ހަފުތާގެ ތެރޭ ފެނަކައާއި، އެމްޕީއެލްގެ ވެރިން ވެސް ވަނީ އިސްތިއުފާ ދެއްވައިފައެވެ. އަދި ފެނަކައާއި، އެޗްޑީސީގެ އިސް ބައެއް މަގާމުތަކުގައި ތިއްބެވި ބޭފުޅުންނަށް ވެސް ވަނީ ބަދަލު ގެނެސްފައެވެ.
ކުއްލިއަކަށް ބައެއް އިސް ވެރިން މަގާމުން އިސްތިއުފާ ދެއްވައި، ބައެއް ބޭފުޅުން މަގާމުން ވަކިކުރަމުން އަންނައިރު ލޯކަލް ކައުންސިލް އިންތިޚާބާއި، ފެންނަނުފެންނަ ވޯޓުގައި ސަރުކާރަށް ބޮޑު ނާކާމިޔާބީއެއް ލިބުނުތާ އަދި މާ ގިނަ ދުވަހެއް ނުވެއެވެ. މަޖިލިސް އިންތިޚާބާއި ރިޔާސީ އިންތިޚާބު އެއް ދުވަހެއްގައި ބާއްވަން ފެނޭތޯ، މި މަހު ހަތަރެއްގައި، ނެގި ފެންނަނުފެންނަ ވޯޓުގައި 70 އިންސައްތައެއްހާ ރައްޔިތުންވަނީ ސަރުކާރަށް ނޫނެކޭ ބުނެފައެވެ.