ދެވަނަ ހާފުގެ ފަހު ދިހަ މިނެޓުގެ ތެރޭގައި ރާއްޖެއިން ފަހަތުންއަރާ ކާމިޔާބުކުރި ދެ ލަނޑާއެކު ޓިމޯ ލެސްޓޭ އަތުން ރާއްޖެ މޮޅުވެއްޖެއެވެ.
މިއީ 2027 ވަނަ އަހަރުގެ އޭޝިއަން ކަޕް ކޮލިފައިންގައި ރާއްޖޭގެ ގައުމީ ފުޓުބޯޅަ ޓީމު ކުޅުނު ފަހު މެޗެވެ. އަދި ކޮލިފައިންގައި ރާއްޖެއިން ހޯދި ފުރަތަމަ މޮޅެވެ.
ގަލޮޅު ރަސްމީ ފުޓުބޯޅަ ދަނޑުގައި ކުޅުނު މި މެޗު ރާއްޖެއިން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.
ގަލޮޅު ދަނޑުގައި މިއަދު ހަވީރު ކުޅުނު މި މެޗުގައި ރާއްޖޭގެ ޓީމުން ވަނީ ވަރަށް މޮޅު ކުޅުމެއް ދައްކާފައެވެ.
ގަލޮޅު ދަނޑުގައި މިއަދު ކުޅުނު ފޯރިގަދަ މެޗުގައި، ޓިމޯ ލެސްޓޭއާ ދެކޮޅަށް ރާއްޖޭގެ ގައުމީ ޓީމުން ދެއްކީ ހިތްވަރުގަދަ ކުޅުމެކެވެ.
ހަންގޭރީގެ ކޯޗު އިސްތަވާން އުރްބާނީގެ އިރުޝާދުގެ ދަށުން ނުކުތް ޓީމުގައި، އާ ކުޅުންތެރިންނާއި ތަޖުރިބާކާރު ކުޅުންތެރިން ހިމެނުނެވެ.
ޚާއްސަކޮށް، ގިނަ ދުވަސްތަކަކަށްފަހު ގައުމީ ސްކޮޑުން ޖާގަ ހޯދި އަހުމަދު އަބްދުﷲ (ލިލީ) އާއި އަލުން ޓީމާ ގުޅުނު އިބްރާހިމް ވަހީދު (އިއްބެ) ފުރަތަމަ އެގާރައިގައި ހިމެނިގެން ކުޅުނުކަން ފާހަގަކުރެވެއެވެ.
ރާއްޖޭގެ ގައުމީ ފުޓުބޯޅަ ޓީމާއި، ޓިމޯ ލެސްޓޭ ބައްދަލުކުރި މެޗުގެ ތެރެއިން: މެޗު ރާއްޖެއިން ކާމިޔާބުކޮށްފައިވަނީ 2-1 ގެ ނަތީޖާއަކުން -- ސަން ފޮޓޯ/ ޝާތިއު އަބްދުﷲ
މެޗުގެ ބޮޑު ބައި ރާއްޖޭން ކޮންޓްރޯލް ކުރި ނަމަވެސް، ފުރަތަމަ ލަނޑު ޖަހައި ކުރިހޯދީ ޓިމޯ ލެސްޓޭއިންނެވެ. ނަމަވެސް، މެޗުގެ ފަހު ވަގުތުކޮޅު ބަދަލު ކުޅުންތެރިންގެ ގޮތުގައި ދަގަނޑޭ އާއި ސެންޓޭ ކުޅެން އެރުވުމަކީ މެޗުގެ ނަތީޖާ ބަދަލުކޮށްލުމަށް ކޯޗު އެޅި ވަރުގަދަ ފިޔަވަޅެކެވެ.
ދަގަނޑޭ ކުޅެން އެރިތާ މަދު ވަގުތުކޮޅެއްގެ ފަހުން މުހައްމަދު އިރުފާން (އިރޭ) ރާއްޖެއަށޤ ނަތީޖާ ހަމަހަމަކޮށްދިންއިރު، މެޗުގެ އެންމެ ފަހު ސިކުންތުކޮޅުގައި ސެންޓޭ ކާމިޔާބުކުރި ޕެނަލްޓީއަކީ ދިވެހި ސަޕޯޓަރުންނަށް ލިބުނު ބޮޑު އުފަލެކެވެ. މި ޕެނަލްޓީ ރާއްޖެއަށް ހޯދައިދިނީ ޕެނަލްޓީ އޭރިއާ ތެރެއިން އަލީ އަޝްފާގު (ދަގަނޑޭ) އެވެ.
މިއީ މިފަހަރުގެ ކޮލިފައިންގައި އަމިއްލަ ދަނޑުގައި ރާއްޖޭން ހޯދި ފުރަތަމަ ތިން ޕޮއިންޓެވެ.