ރައީސުލްޖުމްހޫރިއްޔާގެ ސްކޮލަޝިޕްގައި ކިޔެވޭނީ، ރާއްޖޭގެ ޓްރެއިނިން ނީޑްސް ރިކުއަޔާމަންޓް ލިސްޓުގައި ހިމެނޭ ދާއިރާތައް ކަމަށް ކަނޑައެޅިތާ 24 ގަޑިއިރު ވެސް ނުވަނީސް، އެ އިސްލާހު އަނެއްކާވެސް ބަދަލުކޮށްފިއެވެ.
މީގެ ކުރިން ވެސް އޮތީ، ރައީސްގެ ސްކޮލަޝިޕް ލިބޭ ދަރިވަރުންނަށް ބޭނުން ދާއިރާއަކުން ކިޔެވެއެވެ. ނަމަވެސް، ހަޔާ އެޑިއުކޭޝަން މިނިސްޓްރީން ރޭ ދަންވަރު އާންމުކުރި އުސޫލެއްގައި ވަނީ، ރައީސްގެ ސްކޮލަޝިޕް ދޭނީ، އެ ވަގުތަށް މިނިސްޓްރީގައި ޝާއިއުކޮށްފައިވާ "ޓްރެއިނިން ނީޑްސް ރިކުއަޔާމަންޓް ލިސްޓުގައި" ހިމެނޭ ދާއިރާތަކުން އެކަނި ކަމަށް ކަނޑައަޅާފައެވެ.
އެއަށްފަހު، މިރޭ 23:24ގައި ހަޔާ އެޑިއުކޭޝަން މިނިސްޓްރީން ވަނީ އަނެއްކާވެސް އުސޫލު ގެޒެޓުކޮށްފައެވެ. އެ އުސޫލުގައި ވަނީ، އެ އުސޫލުގެ ދަށުން، ދަރިވަރުން ކިޔަވަން ބޭނުން ކޮންމެ ދާއިރާއެއްގައި ކިޔެވުމުގެ ފުރުސަތު ދެވޭނެ ކަމަށެވެ.
އެ އުސޫލުގެ ދަށުން ސްކޮލާޝިފް ފުރުސަތު ދެނީ، މަތީ ސާނަވީ އިމްތިހާނަކުން އެއްވަނަ ދަރަޖައިގައި ފާސްވެފައިވާ ކަމަށް އެޑިއުކޭޝަން މިނިސްޓްރީން ކަނޑައަޅާ ދެ ނަތީޖާއިން ކުރެ ނަތީޖާއެއް ހޯދައިފައިވާ ދަރިވަރުންނަށެވެ. އެއީ:
- މަތީ ސާނަވީ އިމްތިހާނުގައި ބައިވެރިވި އޭލެވެލް ނުވަނަ އެއާ އެއް ފެންވަރުގެ އިމްތިހާނެއްގެ ތިން މާއްދާއިން އޭ ސްޓާ ގުރޭޑު ހާސިލުކޮށްފައިވުން ނުވަތަ
- ޝަހާދާ ސާނަވިއްޔާ އިމްތިހާނުގައި ކިޔެވި ސްޓްރީމްގައި ކިޔަވަން ޖެހޭ ކަމަށް އެޑިއުކޭޝަން މިނިސްޓްރީން ކަނޑައަޅައިފައިވާ ހުރިހާ މާއްދާއަކުން އޭ ސްޓާ ލިބިފައިވުމާއެކު އެޗްއެސްސީގެ ދިވެހި މާއްދާއިން އޭ ސްޓާ ހާސިލުވެފައިވުން
މީގެ އިތުރުން ރޭ އެ މިނިސްޓްރީން ވަނީ، މަތީ ސާނަވީ އިމްތިހާނު ފުރިހަމަކުރާ ދަރިވަރުންގެ ތެރެއިން ހައި އެޗީވާސް ސްކޯލާޝިޕް ދޭ އުސޫލަށް ވެސް ބަދަލެއް ގެނެސްފައެވެ. އެގޮތުން، އެ ސްކޯލާޝިޕް ދެން ލިބޭނީ އޭލެވެލްއިން މަދުވެގެން އެއް މާއްދާއިން 'އޭ ސްޓާ' ހޯދުމުން ކަމަށް، އުސޫލުގައި ކަނޑައަޅައިފައިވެއެވެ.
ހައި އެޗީވާސް ސްކޯލާޝިޕް ދޭ އުސޫލަށް ގެނައި ބަދަލާ ގުޅިގެން ކުރީގެ އެޑިއުކޭޝަން މިނިސްޓަރު އައިޝަތު އަލީ ވަނީ ކަންބޮޑުވުން ފާޅުކުރައްވައިފައެވެ. އޭނާ ވަނީ އެއީ ބޭއިންސާފު ބަދަލެއްގެ ގޮތުގައި ސިފަކުރައްވައި, ހުރިހާ ދަރިވަރުންނަށް ހަމަހަމަ ފުރުސަތުތައް ލިބޭނެ ގޮތަކަށް މި އުސޫލު މުރާޖާކުރާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ. ނަމަވެސް އެ އުސޫލު ދިފާއުކޮށް ވެސް، ކަމާ ގުޅުން ހުރި ބައެއް ފަރާތްތަކުން ސޯޝަލް މީޑިއާގައި ޚިޔާލު ފާޅުކޮށްފައިވެއެވެ.
.