ސީނިއަރ ކްރިކެޓަރސް ކްލަބް މޯލްޑިވްސް ތައިލެންޑުގެ 36 ވަނަ ޗިއަންގްމައި ސިކްސެސްގައި ބައިވެރިވަނީ
އެސްސީސީ މޯލްޑިވްސްއިން ތައިލެންޑުގައި ބާއްވާ 36 ވަނަ ޗިއަންގްމައި ސިކްސެސް މުބާރާތުގައި ވާދަކުރަން ތައްޔާރުވެއްޖެއެވެ.
ތައިލެންޑުގެ ޗިއަންގްމައިގައި ބާއްވާ 36 ވަނަ އިންޓަނޭޝަނަލް ކްރިކެޓް ސިކްސެސް މުބާރާތުގައި ދިވެހިރާއްޖޭގެ ސީނިއަރ ކްރިކެޓަރސް ކްލަބް މޯލްޑިވްސް (އެސްސީސީ މޯލްޑިވްސް) އިން ބައިވެރިވާން ނިންމައިފިއެވެ.
މި މުބާރާތް ކުރިއަށް ދާނީ 2026 ވަނަ އަހަރުގެ މާރިޗު މަހުގެ 27 އިން އޭޕްރީލް މަހުގެ 5 ވަނަ ދުވަހުގެ ނިޔަލަށެވެ. މުބާރާތުގެ ގްރޫޕް ސްޓޭޖުގެ މެޗުތައް ފެށުމަށް ހަމަޖެހިފައިވަނީ މާރިޗު މަހުގެ 29 ވާ އާދީއްތަ ދުވަހުއެވެ.
މި މުބާރާތަކީ ދުނިޔޭގެ އެކި ކަންކޮޅުތަކުން ގިނަ ޓީމުތަކެއް ވާދަކުރާ މުބާރާތެކެވެ. އެގޮތުން މިއަހަރުގެ މުބާރާތުގައި ޖުމްލަ 42 ޓީމު ބައިވެރިވެއެވެ. މި މުބާރާތް ޚާއްޞަކުރެވިފައިވަނީ ޢުމުރުން 35 އަހަރުން މަތީގެ ވެޓަރަން ކުޅުންތެރިންނަށެވެ. މިއީ ދުނިޔޭގެ ފެންވަރުގައި ތަޖުރިބާކާރު ކުޅުންތެރިންނަށް އެކުޅުންތެރިންގެ ހުނަރު ދައްކާލުމަށް ލިބޭ ވަރަށް ރަނގަޅު ފުރުޞަތެކެވެ.
އެސްސީސީ މޯލްޑިވްސްގެ ކުރީގެ ކާމިޔާބީތަކާއި އުންމީދު
އެސްސީސީ މޯލްޑިވްސް އަކީ ދިވެހިރާއްޖޭގެ ޤައުމީ ކްރިކެޓް ޓީމަށް ކުރިން ކުޅެފައިވާ މޮޅެތި ކުޅުންތެރިންގެ މައްޗަށް އެކުލެވޭ ޓީމެކެވެ. މި ޓީމުން ވަނީ 2024 އަދި 2025 ވަނަ އަހަރު ބޭއްވި ހުއާ ހިން ސިކްސެސް މުބާރާތުގެ ވެޓަރަންސް ޑިވިޜަންގެ ޗެމްޕިއަންކަން ހޯދާފައެވެ. އެހެންކަމުން، މިފަހަރުގެ ޗިއަންގްމައި ސިކްސެސް މުބާރާތާ އެ ޓީމުން ކުރިމަތިލަނީ ވަރަށް ބޮޑު އުންމީދަކާއި އިތުބާރަކާއެކުގައެވެ.
މިއީ އެސްސީސީ މޯލްޑިވްސްއިން ޗިއަންގްމައި ސިކްސެސްގައި ބައިވެރިވާ ފުރަތަމަ ފަހަރެވެ. ރާއްޖޭގެ ކްރިކެޓްގެ ތާރީޚުގައި ފާހަގަކޮށްލެވޭ ފަދަ ކުޅުންތެރިން މި ޓީމުގައި ހިމެނޭއިރު، ޓީމުގެ އަމާޒަކީ މި މުބާރާތުގައިވެސް ރަނގަޅު ކާމިޔާބީއެއް ހޯދައި، ރާއްޖެއަށް ރީތި ނަން ހޯދައިދިނުމެވެ. އަދި ބައިނަލްއަޤްވާމީ ފެންވަރުގައި ރާއްޖޭގެ ސީނިއަރ ކުޅުންތެރިންގެ ހުނަރު ދައްކާލުމަކީވެސް މި ދަތުރުގެ މުހިންމު މަޤްޞަދެކެވެ.
ބައިނަލްއަޤްވާމީ މިފަދަ މުބާރާތްތަކުގައި ދިވެހިރާއްޖޭގެ ސީނިއަރ ކުޅުންތެރިން ބައިވެރިވުމަކީ، ރާއްޖޭގައި ކްރިކެޓް ކުޅޭ ޒުވާން ކުޅުންތެރިންނަށް ލިބޭ ވަރަށް ބޮޑު ހިތްވަރެކެވެ.