އީރާނާއި ލުބުނާނުން ދެމުންގެންދާ ހަމަލާތަކާ ގުޅިގެން ފާއިތުވި 24 ގަޑިއިރުގެ ތެރޭގައި އިޒްރޭލުގެ 108 މީހަކަށް އަނިޔާވެ ހޮސްޕިޓަލަށް ގެންގޮސްފައިވާ ކަމަށް އެ ގައުމުގެ ހެލްތު މިނިސްޓްރީން ހާމަކޮށްފިއެވެ.
'ޓައިމްސް އޮފް އިޒްރޭލް' ނޫހުން ރިޕޯޓުކޮށްފައިވާ ގޮތުގައި، މިއީ ފެބްރުއަރީ 28 ވަނަ ދުވަހު ފެށުނު ހަނގުރާމައިގެ ސަބަބުން ލިބުނު އަނިޔާތަކެކެވެ.
އިޒްރޭލުގެ ހެލްތު މިނިސްޓްރީން މި އަނިޔާތައް ލިބުނު ސީދާ ސަބަބުތަކުގެ ތަފްސީލެއް ދީފައެއް ނުވެއެވެ. ނަމަވެސް، މީގެ ތެރޭގައި އީރާނުގެ މިސައިލްތަކާއި ލުބުނާނުގެ ރޮކެޓް ހަމަލާތަކުން ސީދާ ލިބުނު އަނިޔާގެ އިތުރުން، ރައްކާތެރިކަން ހޯދުމަށް ޝެލްޓަރުތަކަށް ދުވުމުގެ ތެރޭގައި ލިބިފައިވާ އަނިޔާތައް ވެސް ހިމެނުމަކީ އެކަށީގެންވާ ކަމެއް ކަމަށް ނޫސްތަކުން ބުނެއެވެ.
މި ހަމަނުޖެހުންތަކުގެ ފަސްފަހަތަށް ބަލާއިރު، މިއީ އެމެރިކާއާއި އިޒްރޭލުން ގުޅިގެން ފެބްރުއަރީ 28 ގައި އީރާނަށް ދިން ކުއްލި ހަމަލާތަކަކާ ގުޅިގެން ފެށުނު ހަނގުރާމައެކެވެ.
މިކަމުގެ ރައްދުގައި އީރާނާއި ލުބުނާނުގެ ހިޒްބުﷲ އިން ދަނީ އިޒްރޭލަށް ހަމަލާދެމުންނެވެ.
އިޒްރޭލުގެ ހެލްތު މިނިސްޓްރީން އެކްސްގައި އާންމުކުރި ތަފާސްހިސާބުތައް ދައްކާ ގޮތުން، ހަނގުރާމަ ފެށުނު ދުވަހުން ފެށިގެން މިއަދުގެ ހެނދުނާ ހަމައަށް 3،195 މީހަކު ވަނީ ހޮސްޕިޓަލުގައި އެޑްމިޓްކޮށްފައެވެ. އަދި އޭގެ ތެރެއިން 81 މީހަކަށް މިހާރު ވެސް ދަނީ ހޮސްޕިޓަލުގައި ފަރުވާދެމުންނެވެ.