ބްރެޒިލްގެ ފުޓުބޯޅަ މެޗެއްގެ ތެރެއިން ހިންގި ބޮޑު މާރާމާރީއަކާ ގުޅިގެން 23 ކުޅުންތެރިއަކަށް ރަތް ކާޑު ދައްކައިފިއެވެ.
ކެމްޕިއޮނާޓޯ މިނެއިރޯގެ ފައިނަލްގައި ކްރުޒެއިރޯ އާއި އެޓްލެޓިކޯ މިނެއިރޯ ބައްދަލުކުރި މެޗު ނިމުނު ވަގުތު ހިނގި ހަމަނުޖެހުންތަކާ ގުޅިގެން ގިނަ ކުޅުންތެރިންތަކަކަށް ވަނީ ފިޔަވަޅު އަޅާފައެވެ.
ބްރެޒިލްގެ ކްލަބްތަކެއް ކަމަށްވާ ކްރުޒެއިރޯ އާއި އެޓްލެޓިކޯ މިނެއިރޯ ބައްދަލުކުރި ކެމްޕިއޮނާޓޯ މިނެއިރޯގެ ފައިނަލް މެޗުގައި ހިނގި ބޮޑު މާރާމާރީއަކާ ގުޅިގެން 23 ކުޅުންތެރިއަކަށް ރަތް ކާޑު ދެއްކިއިރު، މިއީ ފަހުގެ ތާރީހެއްގައި ފުޓުބޯޅަ މެޗެއްގައި މިހާ ގިނަ ކުޅުންތެރިންނަށް އެއްފަހަރާ ރަތް ކާޑު ދެއްކި ފުރަތަމަ ފަހަރެވެ.
ބެލޯ ހޮރިޒޯންޓޭގައި ކުޅުނު މި މެޗު 1-0 ގެ ނަތީޖާއަކުން ކާމިޔާބުކުރީ ކްރުޒެއިރޯއިންނެވެ. ބްރެޒިލް ގައުމީ ޓީމުގެ ކުރީގެ ކޯޗު ޓީޓޭގެ އިރުޝާދުގެ ދަށުން ކުޅެމުންދާ ކްރުޒެއިރޯއަށް މި މެޗުގައި ހަމައެކަނި ލަނޑު ކާމިޔާބުކޮށްދިނީ ކައިއޯ ޖޯޖްއެވެ. މި މޮޅާއެކު އެ ޓީމުން ވަނީ 2019 ވަނަ އަހަރުގެ ފަހުން ފުރަތަމަ ފަހަރަށް މިނާސް ގެރައިސް ސްޓޭޓްގެ ޗެމްޕިއަންކަން ހޯދާފައެވެ.
ނަމަވެސް މެޗުގެ އުފާވެރިކަން ގެއްލިގެންދިޔައީ މެޗުގެ އެންމެ ފަހު ސިކުންތުކޮޅުގެ ތެރޭގައި ހިނގި ބޮޑު ހަމަނުޖެހުމެއްގެ ސަބަބުންނެވެ. މި މާރާމާރީ ކޮންޓްރޯލް ކުރުމަށް ސެކިއުރިޓީ އޮފިޝަލުންނާއި ފުލުހުންނަށް ދަނޑަށް އަރަން މަޖުބޫރުވިއެވެ.
މާރާމާރީ ފެށުނީ އެޓްލެޓިކޯގެ ގޯލްކީޕަރު އީވާސަން، ކްރުޒެއިރޯގެ މިޑްފީލްޑަރު ކްރިސްޓިއަން ކޮއްޕާލައި ވައްޓާލުމަށްފަހު އޭނާގެ މޭމަތީގައި ކަކޫ އެޅުމުންނެވެ. މި ދެ ކުޅުންތެރިން ޖެހުނީ ބޯޅައެއް ހޯދަން އުޅުމުގެ ތެރޭގައެވެ.
ކްރިސްޓިއަންއަށް ހަމަލާދިނުމާއެކު އޭނާގެ ޓީމުގެ ކުޅުންތެރިން ވަނީ ގޯލްކީޕަރު އީވާސަންއާ ކުރިމަތިލާފައެވެ. އަދި އޭނާ ގޯލުގެ ދަނޑިއާ ދިމާލަށް ކޮއްޕާލުމާއެކު ދެ ޓީމުގެ ގިނަ ކުޅުންތެރިންތަކެއް މި ހަމަނުޖެހުމުގެ ތެރެއަށް ވަނެވެ.
ބްރެޒިލްގެ މީޑިއާތަކުން ރިޕޯޓުކޮށްފައިވާ ގޮތުގައި މެޗުގެ ރެފްރީ ޑެލްގާޑޯ ކަންޑަންކަންއަށް ދަނޑުމަތީގައި ކާޑު ދެއްކޭގޮތް ނުވީ ހަމަނުޖެހުން މާ ބޮޑުވުމުގެ ސަބަބުންނެވެ. އެހެންކަމުން 23 ކުޅުންތެރިއަކަށް ރަތް ކާޑު ދައްކާފައިވަނީ މެޗަށްފަހުގައެވެ.
ރަތް ކާޑު ދެއްކި ކުޅުންތެރިންގެ ތެރޭގައި ކްރުޒެއިރޯގެ 12 ކުޅުންތެރިން ހިމެނެއެވެ. އޭގެ ތެރޭގައި ލަނޑު ޖެހި ކައިއޯ ޖޯޖްވެސް ހިމެނެއެވެ. އެތުލެޓިކޯއިން ރަތް ކާޑު ދެއްކި 11 ކުޅުންތެރިންގެ ތެރޭގައި ބްރެޒިލްގެ ކުރީގެ މަޝްހޫރު ފޯވާޑް ހަލްކް އަދި އެތުލެޓިކޯ މެޑްރިޑާއި ނޮޓިންހަމް ފޮރެސްޓަށް ކުރިން ކުޅުނު ރެނާން ލޯޑީ ހިމެނެއެވެ.
މި ހާދިސާއާ ގުޅިގެން އެތުލެޓިކޯގެ ފޯވާޑް ހަލްކް ވަނީ މިއީ ވަރަށް ހިތާމަހުރި ކަމެއް ކަމަށް ބުނެފައެވެ. އޭނާ ބުނީ ފުޓުބޯޅަ ކުޅުންތެރިންނަކީ މުޅި ދުނިޔެއަށް ނަމޫނާ ދައްކަންޖެހޭ ބައެއް ކަމަށާއި، ކްލަބާއި ކުޅުންތެރިންގެ ތަސައްވުރު ރައްކާތެރިކުރުމަކީ ކުޅުންތެރިންގެ ޒިންމާއެއް ކަމަށެވެ.
ފުޓުބޯޅަ މެޗެއްގައި އެންމެ ގިނަ ރަތް ކާޑު ދެއްކުމުގެ ރެކޯޑު އޮންނަނީ 2011 ވަނަ އަހަރުގެ ފެބްރުއަރީ މަހު އާޖެންޓީނާގެ ފަސްވަނަ ޑިވިޝަންގައި އެތުލެޓިކޯ ކްލޭޕޯލް އާއި ވިކްޓޯރިއާނޯ އެރީނާސް ބައްދަލުކުރި މެޗުގައެވެ. އެ މެޗުގައި ހިނގި ބޮޑު މާރާމާރީއަކާ ގުޅިގެން މެޗުގައި ބައިވެރިވި 36 ކުޅުންތެރިންނަށް ވަނީ ރަތް ކާޑު ދައްކާފައެވެ.
ބްރެޒިލްގެ އެންމެ މަތީ ލީގު ކަމަށްވާ ސެރީއޭގައި މި ސީޒަނުގައި ކުޅުނު ހަތަރު މެޗުންވެސް ކްރުޒެއިރޯ އަދި އެތުލެޓިކޯއަށް މޮޅެއް ނުލިބެއެވެ. ލީގު ތާވަލުގައި އެތުލެޓިކޯ 17 ވަނައިގައި އޮތްއިރު ކްރުޒެއިރޯ އޮތީ 19 ވަނައިގައެވެ.