ފައިނަލުގައި ނިއުޒިލޭންޑް ބަލިކޮށް ޓީ ޓްވެންޓީ ކްރިކެޓް ވޯލްޑްކަޕްގެ ޗެމްޕިއަންކަން މިފަހަރުވެސް އިންޑިއާއިން ހޯދައިފިއެވެ.
މުބާރާތުގެ އެންމެ ފަހުގެ ޗެމްޕިއަނުންނަކީ ވެސް އިންޑިއާއެވެ. އެ ޓީމުން ތަށި ދިފާއުކޮށްފައިވަނީ ފައިނަލުގައި ނިއުޒިލެންޑާ ވާދަކޮށް 96 ލަނޑުން މެޗު ކާމިޔާބުކޮށްގެންނެވެ.
އިންޑިޔާގެ އަހުމަދު އާބާދުގެ ނަރެންދްރާ މޯޑީ ސްޓޭޑިއަމްގައި ކުޅުނު ފައިނަލް މެޗުގެ ޓޮސް ދިމާވުމުން ނިއުޒިލެންޑު ނިންމީ ހޮވުމަށެވެ. އެއާއެކު އިންޑިއާއިން ވަނީ މި އިނިންގްސްގައި ކުޅެންއަރާ 20 އޯވަރުގެ ތެރޭގައި ފަސް ކުޅުންތެރިން ނުބައިވެގެން 255 ލަނޑު ހަދާފައެވެ.
އެންމެ ރަނގަޅަށް ކުޅުނީ 46 ބޯޅައިން 89 ލަނޑު ހެދި ސަންޖޫ ސެމްސަންއާއި 25 ބޯޅައިން 54 ލަނޑު ހެދި އިޝާން ކިޝާނެވެ.
ޖަވާބުގައި ނިއުޒިލެންޑް ކުޅެން އަރާ 19 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން 159 ލަނޑު ހެދިއެވެ. ނިއުޒިލެންޑަށް އިން އެންމެ ރަނގަޅަށް ކުޅުނީ 26 ބޯޅައިން 52 ލަނޑު ހެދި ސޭފާޓް އާއި 35 ބޯޅައިން 43 ލަނޑު ހެދި ސެންޓްނާއެވެ.
މިއީ ފިރިހެން ކެޓަގަރީގެ ޓީމަކުން ޓީ ޓުވެންޓީގެ ތަށި ދިފާއުކުރި ފުރަތަމަ ފަހަރެވެ.