ޓެލްއަވީވު (8 މާޗް 2026) : އީރާނުގެ ދީނީ އިސްވެރިޔާ (ދީނީ މުރުޝިދު) ގެ މަގާމަށް އިންތިޚާބުކުރާ ކޮންމެ މީހަކުވެސް މަރާލާނެ ކަމަށާއި އީރާނުގެ އެއްވެސް ވެރިއަކަށް އަމާންކަން ނޯންނާނެކަމަށް އިސްރާއީލުން ބުނެފިއެވެ.
އިސްރާއީލު ސިފައިންގެ ތަރުޖަމާނު އެވީ ޑެވްރިން ބުނިގޮތުގައި އީރާނުގައި އަލަށް އިންތިޚާބުކުރާ ދީނީ މުރުޝިދު ވެސް ކަށްވަޅަށް ފޮނުވާލުމަށް ވާންޖެހޭ ތައްޔާރީތައް އިސްރާއީލު ގެންދަނީ ވަމުންނެވެ.
"އީރާނުގެ އިސްވެރިންގެ ފުރާނައަކީ އަހަރެމެން ކޮންޓްރޯލްކުރާ އެއްޗެއް، އެ މީހުން މަރާލާނީ އަހަރެމެންގެ ހިތްވަރުގަދަ ސިފައިން، ޚާއްސަކޮށް އީރާނުގެ ދީނީ މުރުޝިދުގެ މަގާމަށް އަލަށް އިންތިޚާބުކުރާ ފަރާތް ވަރަށް އަވަހަށް މަރާލާނަން," އިސްރާއީލު ސިފައިންގެ ތަރުޖަމާނު އެވި ޑެވްރިން ނެރުނު ބަޔާނެއްގައި ވަނީ ބުނެފައެވެ.
އިސްރާއީލުވަނީ އީރާނުގެ ދީނީ މުރުޝިދު އާޔަތުﷲ އަލީ ޚަމަނާއި އާއި އޭނާގެ އާއިލާގެ ބައެއް މެންބަރުން ޝަހީދުކޮށްލުމުގައި ބޮޑު ކާމިޔާބެއް ހޯދާފައެވެ. މީގެތެރޭގައި ޚަމަނާއި އަށް ކާފަވިދާޅުވާ ތުއްތު އަންހެންކުއްޖަކުވެސް ހިމެނެއެވެ.
އިސްރާއީލާއި އެމެރިކާ ދަނީ ހުއްޓުމެއްނެތި އީރާނަށް ވައިގެ ހަމަލާތައް ދެމުންނެވެ. މި ހަމަލާތަކުގައި މިހާތަނަށް އީރާނުގެ ދޮޅު ހާހެއްހާ އާންމުންވަނީ ޝަހީދުކޮށްލާފައެވެ. އީރާނުގެ ވައިގެ ދިފާއު ބަލިކަށިކަމުން އެމެރިކާއާއި އިސްރާއީލުގެ ޖެޓްތައް ވައްޓައި ނުލެވޭތީ އީރާނަށް ބޮޑެތި ގެއްލުންތަކެއް ލިބެއެވެ. އަދި އީރާންގެ ލީޑަރުންގެ ފުރާނައަށްވެސްވަނީ ނުރައްކާވެފައެވެ.
ނަމަވެސް އީރާނަށް ހަމަލާދީގެން ހާސިލް ކުރަން ބޭނުންވި އެއްވެސް މަގްސަދެއް ހާސިލް ނުކުރެވޭތީ އާއި އީރާނުން ދޭ ރައްދު ހަމަލާތަކުން އިސްރާއީލަށް ބޮޑެތި ގެއްލުންތަކެއް ލިބެމުންދާތީ އިސްރާއީލުވެސް ވަނީ ހަދާނެގޮތް ހުސްވެފައެވެ.
އަނެއްކޮޅުން މެދުއިރުމަތީގައިވާ އެމެރިކާގެ ހުރިހާ ބޭސްތަކަކަށް އީރާނުން ހަމަލާދީ އެތަންތަން ހަލާކުކޮށްލާފައި ވުމާއި އީރާނާ ދެކޮޅަށްކުރާ ކުރާ ހަނގުރާމައިގެ މަގްސަދު ހާސިލް ކުރެވޭނެ ކަމުގެ އެއްވެސް ޔަގީންކަމެއް ނެތުމުން އެމެރިކާވެސް ވަނީ ވަރަށްބޮޑަށް މާޔޫސްވެފައެވެ.
އެމެރިކާއާއި އިސްރާއީލުގެ ވެރިން ހީކުރީ އީރާނަށް ކުއްލިގޮތަކަށް ހަމަލާދީ އެގައުމުގެ ދީނީ މުރުޝިދު އަވަހާރަކޮށްލުމުން އީރާނުގެ ރައްޔިތުން މަގުތަކަށް ނުކުމެ އެގައުމުގެ އިސްލާމީ ވެރިކަމުގެ ނިޒާމު ވައްޓާލާނެކަމުގައެވެ.
މިއާއެކު އެމެރިކާގެ ޕަޕެޓަކު ވަރަށް ފަސޭހައިން އީރާނުގެ ވެރިކަމަށް ގެނެވޭނެ ކަމުގައެވެ. ނަމަވެސް ކަންތައް ދިމާވީ މިއާ މުޅިން ޚިލާފަށެވެ. އީރާނުގެ ރައްޔިތުން ނުކުތީ އިސްލާމީ ވެރިކަމުގެ ނިޒާމުގެ ދިފާއުގައެވެ.
އަނެއްކޮޅުން ސަރުކާރާއި ސިފައިންގެ ލަޝްކަރުތަކާ އަދި ވެރިކަމުގެ ނިޒާމުގެ އެތެރޭގައިވެސް އެއްވެސް ބައިބައިވުމެއް ފެންނާކަށް ނެތެވެ. މީގެއިތުރުން އީރާން ގެންދަނީ މަދު ދުވަސްކޮޅެއްގެ ތެރޭގައި އިސްރާއީލު މުޅިން އަޅިއަށްވެގެންދާ ވަރުގެ ގަދަފަދަ ހަމަލާތަކެއް މުޅި އިސްރާއީލަށް ދެމުންނެވެ.
ހައިޕާސޮނިކް މިސައިލުން ދޭ މި ހަމަލާތައް ދިފާއުކުރުމުގައި އިސްރާއީލު ވަރަށް ބޮޑަށް ނާކާމިޔާބު ވަމުންދާތީ މުޅި އިސްރާއީލުގައިވަނީ ބިރުވެރިކަން އުފެދިފައެވެ.
މިއީ އިސްރާއީލު ރުޅިގަދަވެ އީރާނުގެ އިސްވެރިން ޝަހީދުކޮށްލާނެކަމަށް ބުނެ ހަރުކަށި އިންޒާރުތައް ދެމުންގެންދާ މައިގަނޑުސަބަބުކަމަށް މުހައްލިލުން ވިދާޅުވެއެވެ. ރިޕޯޓްތައް ބުނާގޮތުން އިސްރާއީލުގެ ވެރިރަށް ޓެލްއަވީވުގެ ބޮޑުބައެއް މިހާރުވަނީ ޣައްޒާގޮތަށް މުޅިން ބިމާ ހަމަކޮށްލާފައެވެ.