ކުވޭތު ޕެޓްރޯލިއަމް ކޯޕަރޭޝަން (ކޭޕީސީ)އިން ސާފު ނުކުރާ ތެޔޮ އުފެއްދުން މަދުކޮށްފިއެވެ.
ނަމަވެސް ކުވޭތުގެ ގައުމީ ތެޔޮ އުފައްދާ ކުންފުނިން ކަމަށްވާ ކޭޕީސީން އުފެއްދުން މަދުކުރާނެ މިންވަރެއް ހާމައެއްނުކުރެއެވެ.
އެމެރިކާއާއި އިސްރާއީލުން ގުޅިގެން އީރަނަށް ދެމުންގެންދާ ހަމަލާތަކަށް އީރާނުން ރައްދު ދެމުން އަންނައިރު، ތެލުގެ ޝިޕްމަންޓުތައް ދަތުރުކުރާ ހޮރްމުޒް ކަނޑުއޮޅި އީރާނުން ވަނީ ބަންދުކޮށްފައެވެ. އެކަމާ ގުޅިގެން އިރާގާއި ގަތަރުން ވެސް ވަނީ ތެލާއި ގޭސް އުފެއްދުން މަދުކޮށްފައެވެ.
ހަނގުރާމައިގެ ސަބަބުން ތެލާއި ގޭހުގެ އަގުވެސް އަންނަނީ އުފުލެމުންނެވެ. އެގޮތުން ވެސްޓް ޓެކްސަސް އިންޓްމީޑިއޭޓް (ޑަބްލިޔުޓީއައި) ގެ ސާފުނުކުރާ ތެޔޮ ފީފާއެއްގެ އަގު ވަނީ 92.62 ޑޮލަރަށް އުފުލިފައެވެ. މުރުބާން ކުރޫޑްގެ ސާފުނުކުރާ ތެޔޮ ފީފާއެއްގެ އަގު 102.20 ޑޮލަރަށް އުފުލިފައިވާއިރު، ބްރެންޓް ކްރޫޑްގެ އަގު ވަނީ ފީފާއެއް 87.44 ޑޮލަރަށް އުފުލިފައެވެ.
މަޝްރަހު ދިރާސާ ކުރާ ފަރާތްތަކުން ލަފާކުރާ ގޮތުގައި ޔުނައިޓެޑް އަރަބް އެމިރޭޓްސް، ޔޫއޭއީއާއި ސައުދީ އަރަބިއްޔާއިން ވެސް ތެޔޮ ރައްކާކުރާ މިންވަރު ހުސްވުމުން ވަރަށް އަވަހަށް އުފެއްދުންތައް މަދުކުރާނެއެވެ.
ފެބްރުއަރީ މަހު ކުވޭތުން ދުވާލަކު ގާތްގަނޑަކަށް 2.6 މިލިއަން ފީފާގެ ސާފުނުކުރާ ތެޔޮ އުފެއްދިއެވެ.
އެ ކުންފުނިން ބުނީ އެ ކުޑަކުރުމަކީ ރައްކާތެރިކަމުގެ ގޮތުން ކުރި ކަމެއް ކަމަށާއި ހާލަތަށް ބަލާފައި އެކަން މުރާޖައާ ކުރާނެ ކަމަށެވެ. މެދުއިރުމަތީގެ ހާލަތު ރަނގަޅުވާއިރަށް އުފެއްދުމުގެ ފެންވަރު އަލުން ކުރިއެކޭ އެއްގޮތަށް ގެނައުމަށް ތައްޔާރަށް އޮތް ކަމަށްވެސް ކޭޕީސީން ބުންޏެވެ.
ކޭޕީސީއަކީ އޭޝިއާއަށް ޕެޓްރޯ ކެމިކަލް އުފެއްދުމަށް ބޭނުންކުރާ ފީޑްސްޓޮކް، ނަފްތާ އެންމެ ގިނައިން އެކްސްޕޯޓްކުރާ ކުންފުންޏެވެ. އަދި ހުޅަނގު އުތުރު ޔޫރަޕަށް ޖެޓް ފިއުލް އެކްސްޕޯޓްކުރާ ބޮޑު ކުންފުންޏެކެވެ.
އީރާނާ ދެކޮޅަށް އެމެރިކާއާއި އިސްރާއީލުން ކުރާ ހަނގުރާމަ މިހާރުވެސް އީރާނުގެ ބޯޑަރުތަކުން ބޭރަށް ފެތުރިފައިވާއިރު، އީރާނުން އަންނަނީ ރައްދުގައި މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒީ ތަންތަނަށާއި އެެމެރިކާއާ ގުޅުން ހުންނަ އެހެނިހެން ތަންތަނަށާއި އިސްރާއީލަށް ހަމަލާ ދެމުންނެވެ.