އީރާނުގެ އިންޤިލާބީ ގާޑުން (އައިއާރުޖީސީ) އިން އިޒްރޭލަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ފޮނުވާލުމާ ގުޅިގެން، އިޒްރޭލުގެ ދެކުނުގެ ސަރަހައްދުތަކުގައި، ޚާއްސަކޮށް ނެގެވް ސަހަރާގައި އިންޒާރުގެ ސައިރަންތައް މިއަދު އަޅަން ފަށައިފިއެވެ.
އިޒްރޭލުގެ ނޫހެއްކަމަށްވާ ޗެނަލް 12 އިން ރިޕޯޓުކޮށްފައިވާ ގޮތުގައި، އީރާނުން ފޮނުވާލި ގިނަ ހަމަލާތައް އިޒްރޭލުގެ ވައިގެ ދިފާއީ ނިޒާމުން ދަނީ ވައިގެ ތެރޭގައި ގޮއްވާލައި ނައްތާލަމުންނެވެ.
މިކަމާ ގުޅިގެން އިޒްރޭލުގެ އަސްކަރިއްޔާއިން 'އެކްސް' ގައި ކުރި ޕޯސްޓެއްގައި ބުނެފައިވަނީ، އީރާނުން ފޮނުވާލި މިސައިލްތައް ދެނެގަނެވިފައިވާ ކަމަށާއި، ކުއްލި ހާލަތުގެ އިންޒާރުތަކަށް ސަމާލުވެ ރައްކާތެރި ތަންތަނަށް ވަނުމަށް އާންމުންނަށް އަންގާ ކަމަށެވެ.
މިއަދު ދިން ހަމަލާތަކުގެ ސަބަބުން އިސްރާއީލަށް ލިބުނު ގެއްލުންތަކުގެ ތަފްސީލެއް އަދި ނުލިބެއެވެ.
މި ހަމަލާތަކަކީ މިދިޔަ ފެބްރުއަރީ މަހުގެ ފަހުކޮޅުން ފެށިގެން އެމެރިކާއާއި އިޒްރޭލު ގުޅިގެން އީރާނަށް ދެމުންގެންދާ ވަރުގަދަ ވައިގެ ހަމަލާތަކަށް ރައްދުދިނުމުގެ ގޮތުން އީރާނުން ދެމުންގެންދާ ހަމަލާތަކެކެވެ.
އިޒްރޭލުން އީރާނުގެ އަސްކަރީ މަރުކަޒުތަކަށާއި މިސައިލް އުފައްދާ ކާރުޚާނާތަކަށް އަމާޒުކޮށް ދިން ހަމަލާތަކުގައި އީރާނުގެ އެންމެ އިސް ރޫޙާނީ ލީޑަރު އާޔަތުﷲ ޢަލީ ޚާމަނާއީ ހިމެނޭހެން އިސް ވެރިންތަކެއް ވަނީ އަވަހާރަވެފައެވެ. އިޒްރޭލުގެ އަސްކަރިއްޔާއިން ބުނެފައިވަނީ ފާއިތުވި ހަފުތާބަންދުގައި އެކަނިވެސް އީރާނުގެ 300 އަށްވުރެ ގިނަ އަމާޒަކަށް ހަމަލާދީފައިވާ ކަމަށެވެ.
މީގެ ރައްދުގައި އީރާނުން ދަނީ އިޒްރޭލުގެ އިތުރުން މެދުއިރުމަތީގައިވާ އެމެރިކާގެ އަސްކަރީ މަރުކަޒުތަކަށްވެސް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދެމުންނެވެ. އެގޮތުން ބަޙްރައިން، ޤަޠަރު، ޔޫއޭއީ އަދި ސަޢޫދީ ޢަރަބިއްޔާގައި ހުންނަ އެމެރިކާގެ މަރުކަޒުތަކަށް އީރާނުން ވަނީ ހަމަލާދީފައެވެ.
މީގެ އިތުރުން، ލުބުނާނުގައި ހަރަކާތްތެރިވާ ޙިޒްބުﷲ ޖަމާޢަތުންވެސް ދަނީ އިޒްރޭލަށް ވަރުގަދަ ހަމަލާތަކެއް ދެމުންނެވެ. މިކަމުގެ ސަބަބުން މުޅި މެދުއިރުމަތީގެ މަސްރަހު ވަނީ ވަރަށް ބޮޑަށް ގޯސްވެ، ފުޅާ ދާއިރާއެއްގައި ހަނގުރާމައެއް ފެށިދާނެކަމުގެ ބިރު ވަނީ ހީވެފައެވެ.