ރާއްޖޭގައި ބައިނަލްއަގުވާމީ ފުޓްބޯޅަ ފެސިލިޓީއެއް ގާއިމްކުރުމަށް ސަރުކާރުން އިއުލާން ކުރި މަޝްރޫއަށް، ފުޓްބޯޅަ އެސޯސިއޭޝަން (އެފްއޭއެމް)އަށް ހުޅުމާލޭން ދިން ބިން އެކި ފަރާތްތަކަށް ކުއްޔަން ދީގެން ލިބެން ޖެހޭ ފައިސާގެ ތެރެއިން ގާތްގަނޑަކަށް 30 މިލިއަން ރުފިޔާ ގެއްލިފައިވާ މައްސަލައިގައި ޔޫތު މިނިސްޓްރީގެ ޑެޕިއުޓީ މިނިސްޓަރު ޙުސައިން ޖަވާޒަށް ފިޔަވަޅު އެޅިކަމަށް، ނުވަތަ ނާޅާކަމަށް ސަރުކާރުން ނުބުންޏެވެ.
ހުޅުމާލޭގައި ފުޓްބޯޅަ ޓްރެއިނިން ފެސިލިޓީއެއް ގާއިމްކުރަން ދިން ބިން، އެކި ފަރާތްތަކަށް ދީގެން ލިބުނު ފައިސާއިން ބޮޑު ބައެއް ގެއްލިފައިވާކަން، އަދި އެ ފައިސާއާ ހަވާލުވީ ފަރާތްތަކުގެ ތެރޭގައި އެފްއޭއެމްގެ އޭރުގެ ސެކްރެޓަރީ ޖަވާޒު ހިމެނޭކަމަށް އޮޑިޓު އޮފީހުން ބުނީ، އެ ބިން ކުއްޔަށް ދޫކުރުމުގެ މުއާމަލާތްތަކާ ގުޅޭ ގޮތުން ހެދި ޚާއްސަ އޮޑިޓެއްގައެވެ.
މި ކަމާ ގުޅިގެން، ޖަވާޒަށް ސަރުކާރުން އެއްވެސް ފިޔަވަޅެއް އެޅިތޯ ނުވަތަ ނޫންތޯ 'ސަން'އިން ވާނީ ބުރާސްފަތި ދުވަހުން ފެށިގެން ރައީސް އޮފީހާ ސުވާލުކޮށްފައެވެ. އަދި މިއަދު ޔޫތު މިނިސްޓްރީއާވެސް އެ ސުވާލު ވާނީ ކޮށްފައެވެ.
ނަމަވެސް ރައީސް އޮފީހުންވެސް، ޔޫތު މިނިސްޓްރީންވެސް، މިކަމާ ގުޅޭގޮތުން މިހާތަނަށް އެއްވެސް ބަހެއް ބުނެފައިނުވެއެވެ. ޖަވާޒަށް ގުޅައިގެން ބަހެއް ހޯދަން މަސައްކަތް ކުރުމުން ވެސް ފޯނަށް ޖަވާބު ނުދެއްވާތީ ބަހެއް ނުލިބުނެވެ.
ފާހަގަކުރެވޭ ގޮތުގައި، އޮޑިޓް ރިޕޯޓުގައިވާ ގޮތުން، އެ ފައިސާއާ ހަވާލުވި މީހުންގެ ތެރޭގައި ޖަވާޒުގެ އިތުރުން، އެފްއޭއެމްގެ ކުރީގެ ރައީސް ބައްސާމް ޢަދީލް ޖަލީލާއި އެފްއޭއެމްގެ މާލީ ކަންކަމުގެ އިސްވެރިއަކަށް ހުންނެވި މުޙައްމަދު ޢަޤީލް ހިމެނެއެވެ.
އޭގެ ތެރެއިން ބައްސާމްވަނީ އެފްއޭއެމްގެ ފައިސާއަށް ޚިޔާނަތްތެރިވީ މައްސަލައިގައި 32 އަހަރަށް ޖަލަށްލާފައެވެ. ޢަޤީލްގެ މައްޗަށް ވެސް ދައުވާކޮށްފައިވާއިރު، ފިލައިގެން ރާއްޖޭން ބޭރުގައި އުޅެނިކޮށް އޭނާވަނީ ހައްޔަރުކޮށްފައެވެ.
އެހެންކަމުން، އެ ތިން މީހުންގެ ތެރެއިން މިނިވަންކޮށް މިވަގުތު ހުރީ ޖަވާޒު އެކަންޏެވެ.
ޚާއްސަ އޮޑިޓުގައި ފާހަގަކޮށްފައިވާ ގޮތުގައި އަމިއްލަ ކުންފުންޏަކުން ތިން ފަހަރެއްގެ މަތިން ނަގުދު ފައިސާއިން ދިން 1.2 މިލިއަން ރުފިޔާއާ ޖަވާޒުވަނީ ހަވާލުވެފައެވެ.
އޮޑިޓަރު ޖެނެރަލް ޙުސައިން ނިޔާޒީ ސޮއިކުރައްވައި ނެރުއްވި ޚާއްސަ އޮޑިޓުގައިވަނީ، އެފްއޭއެމުން ގެއްލުނު ފައިސާ ހޯދުމަށާއި، އެކަމުގައި ޒިންމާވާ ފަރާތްތަކާމެދު ފިޔަވަޅު އެޅުމަށް ފުލުހަށް އެންގުމަށް ލަފާ ދެއްވައިފައެވެ.