މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހުށަހަޅާ ހުށަހެޅުންތަކަށް، ގާނޫނުގައި ކަނޑައަޅާފައި އޮންނަ މުއްދަތުގެ ތެރޭގައި ރައީސް އޮފީހުން ޖަވާބު ނުދޭކަން ފާހަގަ ވެފައިވާ ކަމަށް އިންފޮމޭޝަން ކޮމިޝަނަރު އަހްމަދު އާހިދު ރަޝީދު ވިދާޅުވެއްޖެއެވެ.
އާރުޓީއައި ހުށަހެޅުންތަކަށް ރައީސް އޮފީހުން، ގާނޫނުގައި ބުނާ މުއްދަތަށް ޖަވާބު ނުދޭކަން ފާހަގަކުރެވިފައިވާ ކަމަށް އިންފޮމޭޝަން ކޮމިޝަނަރު ވިދާޅުވީ، އާރުޓީއައި ހުށަހެޅުމަކަށް ރައީސް އޮފީހުން ޖަވާބު ނުދީގެން، އާއްމުކޮށް ހުޅުވާލައިގެން މިދިޔަ ބުދަ ދުވަހު ބޭއްވި އަޑު އެހުމެއްގައެވެ.
މި އަޑު އެހުމުގައި ކޮމިޝަނަރު ވިދާޅުވީ، ގާނޫނުގައި އޮންނަ މުއްދަތުގެ ތެރޭގައި ރައީސް އޮފީހުން ޖަވާބު ނުދެއްވާ ކަމާއި އުސޫލުން ބޭރުން މުއްދަތު އިތުރުކުރާކަން ވެސް ފާހަގަކުރެވިފައިވާކަމަށެވެ. އެ ކަންކަމަށް ރިއާޔަތްކޮށް، އެ ކަންކަން ރަނގަޅު ކުރުމަށް އިންފޮމޭޝަން ކޮމިޝަނަރު އެ ދުވަހު ވަނީ ރައީސް އޮފީހަށް އަންގަވައިފައެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ދައުލަތުގެ އިދާރާތަކުން މައުލޫމާތަށް އެދޭ ހުށަހެޅުންތަކަށް މައުލޫމާތަށް އެދި ހުށަހަޅާ ތާރީޚުން ފެށިގެން ރަސްމީ 21 ދުވަހުގެ ތެރޭގައި ޖަވާބެއް ދޭން ޖެހެއެވެ. ގާނޫނު ބުނާ ގޮތުން، މި ޖަވާބުގައި އެދިފައިވާ މައުލޫމާތު ދެވެން އޮތްތޯ ނުވަތަ ނޫންތޯ ބަޔާންކުރަންވާނެއެވެ.
ހޯދަން އެދިފައިވާ މައުލޫމާތަކީ ވަރަށް ގިނަ މައުލޫމާތުތަކެއް ކަމަށްވާނަމަ އިތުރު 14 ދުވަހަށް މުއްދަތު އިތުރުކުރެވިދާނެއެވެ. ނަމަވެސް މިގޮތަށް މުއްދަތު އިތުރުކުރަންވާނީ އެކަމުގެ ސަބަބު ބަޔާންކޮށް، މައުލޫމާތު ހުށަހެޅި ފަރާތަކަށް ލިޔުމުން އެންގުމަށްފަހުއެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުން، މީހެއްގެ ފުރާނައަށް ނުވަތަ މިނިވަންކަމަށް ނުރައްކާވެދާނެ ފަދަ ކަމަކާ ގުޅޭ މައުލޫމާތެއް ހޯދަން އެދިއްޖެނަމަ، އެދޭތާ 48 ގަޑިއިރުގެ ތެރޭގައި އެ މައުލޫމާތެއް ދޭންވާނެއެވެ.
މީގެ އިތުރުން، ދައުލަތުގެ އިދާރާއަކުން މައުލޫމާތެއް ނުދޭން ނިންމައިފިނަމަ، އެކަން ނުކުރެވޭ ސަބަބާއި، އެ ނިންމުން އިސްތިއުނާފު ކުރަން ބޭނުންނަމަ އަމަލުކުރަންޖެހޭ ގޮތް ސިޓީ ހުށަހެޅި ފަރާތަށް ބަޔާންކޮށްދޭންވާނެއެވެ.
ކަނޑައެޅިފައިވާ މުއްދަތުގައި ޖަވާބު ނުލިބިއްޖެނަމަ ނުވަތަ ދިން ޖަވާބާ މެދު ހިތްހަމަނުޖެހޭނަމަ، އެ އިދާރާއެއްގެ މައުލޫމާތު މުރާޖައާކުރާ ކޮމިޓީއަށް 30 ދުވަހުގެ ތެރޭގައި ޝަކުވާ ހުށަހެޅިދާނެއެވެ. އެ ކޮމިޓީގެ ނިންމުމަށް ހިތްހަމަނުޖެހޭނަމަ އިންފޮމޭޝަން ކޮމިޝަނަރުގެ އޮފީހަށް މައްސަލަ ހުށަހެޅޭނެއެވެ.
އިންފޮމޭޝަން ކޮމިޝަނަރުގެ އޮފީހުން ނެރުނު، މިދިޔަ އަހަރު ހުށަހެޅި މައްސަލަތަކުގެ ހިސާބުތަކުން ދައްކާ ގޮތުން، ރައީސް އޮފީހާއި މިނިސްޓްރީތަކުން ހޯދަން ހުށަހަޅާ މައުލޫމާތަށް ޖަވާބުނުދީގެން 195 މައްސަލަ ޝަކުވާގެ ގޮތުގައި މިދިޔަ އަހަރު ހުށަހަޅައިފައިވެއެވެ.
އެގޮތުން، ހުށަހަޅާ މައުލޫމާތަށް މުއްދަތު ހަމަވާއިރު، ޖަވާބު ނުދީގެން އެންމެ ގިނައިން އައިކޮމްއަށް ހުށަހަޅާފައި ވަނީ، މިނިސްޓްރީތަކުގެ ޝަކުވާއެވެ. އެ ބާވަތުގެ 142 މައްސަލަ ހުށަހެޅިއިރު، ރައީސް އޮފީހާ ގުޅޭ 53 ޝަކުވާއެއް މިދިޔަ އަހަރު އެ އޮފީހަށް ހުށަހެޅިއެވެ.
ރައީސް ޑރ. މުހައްމަދު މުއިއްޒު މިދިޔަ މަހު ދެއްވި ރިޔާސީ ބަޔާނުގައި ވަނީ، މިދިޔަ އަހަރުގެ ތެރޭގައި ރައީސް އޮފީހާއި މިނިސްޓްރީތަކަށް ފޮނުވާފައިވާ 1,341 އާރުޓީއައިގެ ތެރެއިން، 1,251 އާރުޓީއައިއަށް ޖަވާބުދީފައިވާ ކަމަށް ވިދާޅުވެފައެވެ.
އެއީ، ހުށަހެޅި އާރުޓީއައިތަކުގެ 93 އިންސައްތަ ކަމަށްވާއިރު، ޖަވާބު ތައްޔާރުކުރުމުގެ އެކިއެކި މަރުޙަލާތަކުގައި އެއްކުރަންޖެހޭ މަޢުލޫމާތު ހުރުމާއި އެކި ސަބަބުތަކާހެދި އިތުރަށް ވަގުތު ބޭނުންވާ ކަންކަމުގައި ޖަވާބު ނުދެވިހުރި އާރުޓީއައިތަކަށް ޖަވާބު ތައްޔާރުކުރަމުން އަންނަ ކަމަށް އޭރު އެ މަނިކުފާނު ވިދާޅުވިއެވެ.