(ރ. އިފުރު) ރާއްޖޭގެ އުތުރުގައި އޮތް އެންމެ ހިތްގައިމު އެއް އެއާޕޯޓުގެ ގޮތުގައި ހުޅުވި އިފުރު އެއާޕޯޓުން މިއަދު ފެންނަނީ މުޅީން ތަފާތު މަންޒަރެކެވެ. އެއާޕޯޓު ހުޅުވިއިރު ފެނުނު ފުރިހަމަކަމާއި ރަނގަޅު ޚިދުމަތްތައް މިއަދު ވަނީ މާޒީއާ އެކުވެފައެވެ. ފެންނަނީ މަރާމާތެއް ނުކުރެވި ވީރާނާ ވަމުންދާ އިމާރާތަކާއި ޚިދުމަތުގެ ފެންވަރު އިންތިހާއަށް ދަށްވެފައިވާ، މާޔޫސްކުރަނިވި މަންޒަރެވެ.
ވީރާނާވަމުންދާ އިމާރާތާއި ހަލާކުވެފައިވާ ވަސީލަތްތައް
ޓާމިނަލް އިމާރާތަށް ވަދެގެންދާ އިރު އެންމެ ފުރަތަމަވެސް ލޮލުގައި އަޅައިގަންނަނީ ފަރުވާކުޑަކޮށްލާފައިވާ މިންވަރެވެ. ސީލިންގުން ތަންތަން ހަލާކުވެ، ކުލަ ބަދަލުވެ ހަޑިވެފައިވާ ތަންތަން ފެންނަން ހުރިއިރު، އެ ތަންތަން މަރާމާތުކުރާ މަންޒަރެއް ނުފެނެއެވެ.
ބޯޑިން އޭރިއާގެ ސީލިންގުގައި އެއްޗެއް އެލުވަން ހަރުކުރި ޓޭޕުތައް ނުނަގައި ހުންނަތާ އެތައް ދުވަހެއް ވެފައިވާއިރު، އެއީ އެއާޕޯޓެއްގެ ސިފަ ގެއްލުވައިލާ ހުތުރު މަންޒަރެކެވެ.
މީގެ އިތުރުން، ފަސިންޖަރުން މަޑުކޮށްލުމަށް ބޭރުގައި ހުންނަ ދަގަނޑު ގޮނޑިތައް ވަނީ ދަބަރު ޖަހައި ބޭނުންކުރަން ނުރައްކާވާ މިންވަރަށް ހަލާކުވެފައެވެ. އަދި އެތަން ބޭނުން ކުރާ ފަސިންޖަރުންނަށް އެކަށީގެންވާ މިންވަރަކަށް ގޮނޑިވެސް ނުހުރެއެވެ.
ދެހާސް ފަނަރަ ވަނަ އަހަރު، އިފުރު އެއާޕޯޓް ހުޅުވުން -- ފޮޓޯ/ މޯލްޑިވިއަން
އަސާސީ ޚިދުމަތްތަކުން މަހުރޫމުވުން
ކުރީގައި ފަސިންޖަރުންނަށް ފަސޭހައިން ބޯފެން ލިބޭނެ ގޮތަށް ހުރި ފެން މެޝިން މިހާރު ވަނީ ނަގައިފައެވެ. ފާޚާނާތަކުގެ ހާލަތުވެސް ހުރީ ހަމަ އެފަދަ ގޮތަކަށެވެ. ކުރިން ބަރާބަރަށް ސައިބޯންޏާއި ހޭންޑް ވޮޝް އަދި ޓިޝޫ ހުންނަ ނަމަވެސް މިހާރު އެފަދަ އެއްވެސް ވަސީލަތެއް ފެންނާކަށް ނުހުރެއެވެ. ފާޚާނާތަކުގެ އެތެރެވެސް ފެންނަނީ ވީރާނާކޮށެވެ.
ކާބޯތަކެތީގެ ޚިދުމަތަށް ބަލާއިރު، ކުރިން ޓާމިނަލުގައި ހުރި ކުޑަ ކެފޭއާއި ބަނދަރާ ކައިރީގައި ހިންގި ބޮޑު ކެފޭ ވެސް ބަންދުކޮށްފައި ހުންނަތާ އަހަރަކަށްވުރެ ދިނަ ދުވަސް ވެއްޖެއެވެ. މިހާރު ޓާމިނަލުގައި ހުރި ކުޑަ ފިހާރައިން ލިބެނީ ހަމައެކަނި ލުއިކާނާ އާއި ފިޒީ ބުއިންތަކެވެ.
މީގެ އިތުރުން، ޓާމިނަލް ތެރޭގައި ކުރިން ހުރި ނަމާދުކުރާ ކޮޓަރި މިހާރު ވަނީ ފަސްޓްއެއިޑް ރޫމަކަށް ބަދަލުކޮށްފައެވެ. މީގެ ސަބަބުން ފަސިންޖަރުން ނަމާދުކުރަން ދާން ޖެހެނީ ޓާމިނަލާ މާ ދުރުގައި ހުންނަ މިސްކިތަށެވެ. މިއީ ވަގުތު ކުޑަތަންވެފައިވާ ފަސިންޖަރުންނަށް ކުރިމަތިވާ ވަރަށް ބޮޑު ތަކުލީފެކެވެ.
ސެކިއުރިޓީއާއި މުވައްޒަފުންގެ ފަރުވާކުޑަކަން
އެއާޕޯޓެއްގެ އެންމެ މުހިންމު އެއް ކަމަކީ ސެކިއުރިޓީ ކަމަށްވާއިރު، އިފުރު އެއާޕޯޓުގެ ބެގޭޖް ސްކްރީން ކުރުމުގެ ނިޒާމު އޮތީ ވަރަށް ދަށް ފެންވަރެއްގައެވެ. ކުރިން ޗެކިން ކައުންޓަރު ކައިރީގައި ހުރި ބެގޭޖް ސްކޭނަރު މިހާރަކު ނެތެވެ. މިހާރު ބޮޑެތި ފޮށިތައް ވެސް ސްކޭން ކުރަނީ އަތްދަބަސް ސްކޭން ކުރަން ބޭނުންކުރާ ކުޑަ މެޝިނުންނެވެ.
މުވައްޒަފުންގެ ފަރާތުން ފެންނަނީ ޒިންމާދާރުކަން ކުޑަ އަމަލުތަކެކެވެ. ފްލައިޓް ޝެޑިއުލަށް ބަދަލު އަންނަ ވަގުތުތަކުގައި ވެސް އެއާޕޯޓަށް ފޯނުން ގުޅޭނެ އެއްވެސް ގޮތެއް ނޯވެއެވެ. ފްލައިޓް ގަޑި ޖެހުމުގެ ކުރިން އެއާޕޯޓުން، ކަމާބެހޭ މުވައްޒަފަކު ފެންނާކަށް ނުހުރެއެވެ. މީގެ ސަބަބުން، ތަންކޮޅެއް ކުރީން އެއާޕޯޓަށް ދާ ފަސިންޖަރުން މައުލޫމާތެއް ހޯދާލަން ބޭނުންވިޔަސް ބޮޑެތި ދަތިތަކާ ކުރިމަތިވެއެވެ.
މުވައްޒަފުން ފެންނަނީ ފްލައިޓް ގަޑިއަށް އެންމެ ފަހު ވަގުތު ކަންނެތްކަމާއެކު ވަޒީފާއަށް ނުކުންނަ ތަނެވެ.
މި ރިޕޯޓު ތައްޔާރުކުރުމަށް ޓަކައި، އެއާޕޯޓުގެ ބަހެއް ހޯދުމަށް މި ނޫހުން ތަކުރާރުކޮށް ގުޅުމުންވެސް ފޯނަށް ޖަވާބު ދީފައެއްނުވެއެވެ.
އިފުރު އެއާޕޯޓް ހުޅުވުމަށް ބޭއްވި ރަސްމިއްޔާތުގެ ތެރެއިން --
ބަގީގެ ޚިދުމަތް ދިވެހީންނަށް ތަފާތުކުރުން
އެއާޕޯޓު ހުޅުވިއިރު ބަނދަރުން ޓާމިނަލަށް އަދި ޓާމިނަލުން ބަނދަރާ ހަމައަށް ފަސިންޖަރުންނާއި ދާގީނާ އުފުލައިދިން ބަގީގެ ޚިދުމަތް މިހާރު ޚާއްސަވެފައި ވަނީ ހަމައެކަނި ފަތުރުވެރީންނަށެވެ. އާންމު ދިވެހި ފަސިންޖަރަކަށް އެ ޚިދުމަތް ދެނީ ވަރަށް މަދު ފަހަރެއްގައެވެ. މުވައްޒަފުންގެ ހިނިތުންވުމާއި މެހެމާންދާރީ ވެސް އަމާޒުވެފައިވަނީ ހަމައެކަނި ބޭރުގެ ފަތުރުވެރީންނަށްކަން ވަރަށް ބޮޑަށް ފާހަގަ ކުރެވެއެވެ. ދިވެހި ކުޑަކުދީންނާއި އުމުރުން ދުވަސްވީ މީހުން ހިނގާފައި ދާއިރު، ހުސްކޮށް ދާ ބަގީއަށް ވެސް އެ މީހުން އަރުވާ މަންޒަރެއް މިހާރަކު ނުފެނެއެވެ.
އިފުރު އެއާޕޯޓުން މިއަދު ފެންނަ މި ހިތްދަތި މަންޒަރުތަކަކީ އެތަން ބަލަހައްޓާ ފަރާތްތަކުން ވިސްނާލަންޖެހޭ ކަމެކެވެ. އުތުރުގެ ޚާއްސަކޮށް ރ. އަތޮޅުގެ ރައްޔިތުންނަށް ލިބިފައިވާ މި މުހިންމު ވަސީލަތް ވީރާނާވާން ދޫކޮށްލުމަކީ ބަލައިގަނެވޭނެ ކަމެއް ނޫނެވެ.