ދޮޅު މަސްތެރޭ ރާއްޖެ އެތެރެކުރަން އުޅުނު 72 މިލިއަން ރުފިޔާގެ މަސްތުވާތަކެއްޗާއި، ދެ މިލިއަން ސިނގިރޭޓުގެ އިތުރުން 7،000 ވޭޕް މޯލްޑިވްސް ކަސްޓަމްސް ސާވިސަސްއިން އަތުލައިގެންފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވީ، ވޭތުވެ ދިޔަ ދޮޅު މަސް ދުވަހުގެ ތެރޭގައި ކަސްޓަމްސްއިން 83.45 ކިލޯގެ މަސްތުވާތަކެތި އަތުލައިގެންފައިވާ ކަމަށެވެ. އަދި އެތަކެތީގެ މަގުމަތީ އަގު، 72 މިލިއަން ރުފިޔާއަށް އަރާ ކަމަށް އިހުސާން ވިދާޅުވިއެވެ.
އޭގެ ތެރެއިން 72 ކިލޯގެ މަސްތުވާތަކެއްޗަކީ ބޯޑަރު ހުރަސްކޮށް އެތެރެކުރަން މަސައްކަތްކުރަނިކޮށް، ކަސްޓަމްސްއިން އަތުލައިގަތް މަސްތުވާތަކެތި ކަމަށާއި، އަދި އެއީ ތަފާތު އަށް މައްސަލައެއްގައި އަތުލައިގަތް މަސްތުވާތަކެތި ކަމަށް އިހުސާން ވިދާޅުވިއެވެ. އަދި ހަމައެކަނި އެ ތަކެތީގެ އަގަކީ 59 މިލިއަން ރުފިޔާ ކަމަށް އޭނާ ވިދާޅުވިއެވެ.
މިނިސްޓަރު އިހުސާން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަނީ -- ފޮޓޯ/ ރައިސް އޮފީސް
އިހުސާން ވިދާޅުވި ގޮތުގައި އެ މަސްތުވާތަކެތި އަތުލައިގެންފައި ވަނީ ފުލުހުންނާއި ކަސްޓަމްސްގެ ވަރަށް ގިނަ މުވައްޒަފުންގެ ވަރަށް ބުރަ މަސައްކަތުންނެވެ.
ކަސްޓަމްސްއިން ބޯޑާ ސެކިއުރިޓީ އިންޓެލް ބެލެހެއްޓުމަށް މިހާރު ގެންގުޅޭ ތަފާތު އެކި ހުނަރުތައް ބޭނުންކޮށްގެންނާއި، އިންޓެލިޖެންސްގެ އަލީގައި ލިބޭ މުހިންމު މައުލޫމާތުތައް އޮޕަރޭޝަނަލައިޒްކޮށްގެން ކުރެވޭ ބުރަ މަސައްކަތުގެ ނަތީޖާ މިއީ. އަދި ދިވެހި ފުލުހުން ރާއްޖޭގެ އެކި ހިސާބުތަކުގައި ރެޔާއި ދުވާލު 24 ގަޑިއިރު ކުރަމުންދާ ބުރަ މަސައްކަތުގެ ނަތީޖާ އެ ފެންނަނީ، ހޯމް މިނިސްޓަރު އަލީ އިހުސާން
ހަމައެއާއެކު ވޭތުވެދިޔަ ދޮޅު މަސްދުވަހުގެ ތެރޭގައި 7،000 ވޭޕް ސްޓިކާއި، ގަވައިދާ ޚިލާފަށް އެތެރެކުރި ދެ މިލިއަން ސިނގިރޭޓު އަތުލައިގަތް ކަމަށް ވެސް އިހުސާން މައުލޫމާތުދެއްވިއެވެ.
މަސްތުވާތަކެތީގެ ކުށްތަކަކީ ރާއްޖޭގައި ވަރަށް ބޮޑަށް އިތުރުވެފައިވާ މައްސަލަތަކެކެވެ. ވަކިން ޚާއްސަކޮށް، ކުޑަކުދިންނާއި، ޒުވާނުން މިފަދަ ކުށްތަކުގައި ޝާމިލުވާ މިންވަރު އިތުރެވެ. ސަރުކާރުން ދަނީ މަސްތުވާތަކެތީގެ ކުށްތައް ހުއްޓުވުމުގެ ގޮތުން ގިނަ ފިޔަވަޅުތަކެއް އަޅަމުންނެވެ.
ހަމައެއާއެކު މި ސަރުކާރުން ދުންފަތާ ދެކޮޅަށް ކުރަމުން އަންނަ މަސައްކަތުގެ ދަށުން 2024 ވަނަ އަހަރުގެ ނޮވެންބަރު މަހުގެ އެކަކުން ފެށިގެން ސިނގިރޭޓުގެ ޑިއުޓީ ބޮޑުކޮށް، ވޭޕް އެތެރެކުރުން ވަނީ އެ އަހަރުގެ ނޮވެންބަރު 15ގައި މަނާކޮށްފައެވެ. އަދި ވޭޕް ގެންގުޅުމާއި ބޭނުންކުރުން ޑިސެންބަރު 15ގައި ވަނީ މަނާކޮށްފައެވެ.
އޭގެ ފަހުން، ވަގަށް ސިނގިރޭޓާއި ވޭޕް އެތެރެކުރުމުގެ ގިނަ މައްސަލަތަކެއް ފާހަގަވެފައިވެއެވެ. އެގޮތުން ވޭޕް މަނާކުރި ފަހުން ހިފެހެއްޓި އޭގެ އެންމެ ބޮޑު ޝިޕްމެންޓް މިދިޔަ ޑިސެމްބަރު މަހުގެ ހަތަރު ވަނަ ދުވަހު ހިފަހައްޓައިފައިވާ ކަމަށް ކަސްޓަމްސްއިން ބުނެފައިވެއެވެ.