ދުނިޔޭގެ މަޝްހޫރު ޗިޕް އުފައްދާ ކުންފުނި، އިންޓެލްގެ ބޯޑު ޗެއާމަންގެ މަގާމުގައި 17 އަހަރު ހުންނެވި ފްރޭންކް ޔިއަރީ މަގާމުން ވަކިވާން ނިންމައިފިކަން އެ ކުންފުނިން އިއުލާންކޮށްފިއެވެ.
މިއީ އިންޓެލްގެ ސީއީއޯ ލިޕް-ބޫ ޓޭން އެ ކުންފުނި އަލުން ކޮޅަށް ޖެއްސުމަށް ކުރަމުންދާ މަސައްކަތްތަކުގެ ތެރެއިން އައި ބޮޑު ބަދަލެކެވެ.
ޔިއަރީގެ ބަދަލުގައި އިންޓެލްގެ ބޯޑު ޗެއާމަންގެ މަގާމާ ހަވާލުވާނީ ސެމީކޮންޑަކްޓާ ދާއިރާގެ ތަޖުރިބާކާރެއް ކަމަށްވާ ކްރެއިގް ބެރެޓް އެވެ. އޭނާ މަގާމާ ހަވާލުވާނީ އަންނަ މެއި މަހު ބާއްވާ އެ ކުންފުނީގެ އަހަރީ އާންމު ޖަލްސާއަށް ފަހުގައެވެ.
ފްރޭންކް ޔިއަރީ އަކީ 2009 ވަނަ އަހަރުން ފެށިގެން އިންޓެލްގެ ބޯޑުގައި ހިދުމަތް ކުރައްވަމުން ގެންދަވާ ބޭފުޅެކެވެ. އަދި އޭނާ ޗެއާމަންކަމާ ހަވާލުވީ 2023 ވަނަ އަހަރެވެ. އޭނާގެ ދައުރުގައި އިންޓެލްގެ ހަތަރު ސީއީއޯއެއް ބަދަލުވެފައިވާއިރު، އިންޓެލްގެ އުފެއްދުންތެރިކަން ދަށަށް ގޮސް، ވާދަވެރި ޓީ.އެސް.އެމް.ސީ ކުރިއަރައިގެން ދިޔަ މަންޒަރު އޭނާ ވަނީ ދެކެފައެވެ.
މާލީ ދާއިރާގެ ތަޖުރިބާކާރެއްގެ ބަދަލުގައި، ޓެކްނޮލޮޖީ ދާއިރާގެ އަމަލީ ތަޖުރިބާ ހުރި ކްރެއިގް ބެރެޓް ފަދަ ބޭފުޅަކު ޗެއާމަންކަމަށް އައުމަކީ އިންޓެލްއަށް ލިބޭނެ ބޮޑު ކުރިއެރުމެއް ކަމަށް މާހިރުން ދެކެއެވެ.
ބެރެޓް އަކީ މީގެ ކުރިން ކުއަލްކޮމް ފަދަ ބޮޑެތި ކުންފުނިތަކުގައި މަސައްކަތް ކުރައްވާފައިވާ ބޭފުޅެކެވެ.
ސީއީއޯ ލިޕް-ބޫ ޓޭން މަގާމާ ހަވާލުވި ފަހުން އިންޓެލްގެ ހިންގުމަށް ވަނީ ގިނަ ބަދަލުތަކެއް ގެނެސްފައެވެ. އެގޮތުން ޚަރަދު ކުޑަކުރުމުގެ ގޮތުން ކުންފުނީގެ މުވައްޒަފުންގެ 20 އިންސައްތަ ވަނީ މަދުކޮށްފައެވެ. އަދި އާޓިފިޝަލް އިންޓެލިޖެންސް (އޭއައި) އަށް ބޭނުންވާ ޗިޕްތައް އުފެއްދުމަށް އައު އަމާޒުތަކެއް ވަނީ ކަނޑައަޅާފައެވެ.
މީގެ އިތުރުން، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރާއެކު ކުރެވުނު މަޝްވަރާތަކަށްފަހު، "ޗިޕްސް އެކްޓް" ގެ ދަށުން ފައިސާ ދިނުމުގެ ބަދަލުގައި، އެމެރިކާ ސަރުކާރުން އިންޓެލްގެ 10 އިންސައްތަ ހިއްސާ ގަންނަ ގޮތަށް މިހާރު ވަނީ އެއްބަސްވެފައެވެ.
އައު ޗެއާމަންއާއެކު އިންޓެލްގެ ބޯޑު އިތުރަށް ހަރުދަނާވެ، ކުންފުނީގެ އުފެއްދުންތެރިކަން އަލުން ކުރީގެ ހާލަތަށް ރުޖޫއަވާނެ ކަމަށް އިންޓެލް އިން އުންމީދު ކުރެއެވެ.