މި އަހަރުގެ ފުރަތަމަ ދެ މަސް ދުވަހުގެ ތެރޭގައި ލިބުނު އާމްދަނީގެ އަދަދު، މިދިޔަ އަހަރާ އަޅާބަލާއިރު 29 އިންސައްތަ އިތުރުވެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.
މިދިޔަ މަހުގެ 26 ވަނަ ދުވަހާ ހަމައަށް ފިނޭންސް މިނިސްޓްރީން އާންމުކޮށްފައިވާ މި އަހަރުގެ ތަފާސްހިސާބުތަކުން އެނގޭ ގޮތުގައި މި އަހަރު ޖުމުލަ 7.8 ބިލިއަން ރުފިޔާގެ އާމްދަނީއާއި ހިލޭ އެހީ ވަނީ ލިބިފައެވެ. އެ މުއްދަތުގައި ޖުމުލަ ޚަރަދުކޮށްފައިވަނީ 5.9 ބިލިއަން ރުފިޔާއެވެ. ބޭރު ފައިސާގެ އާމްދަނީއަށް ބަލާއިރު، މި މުއްދަތުގައި 222.8 މިލިއަން އެމެރިކާ ޑޮލަރު ދައުލަތަށް ލިބިފައިވެއެވެ.
މިދިޔަ އަހަރުގެ މި މުއްދަތުގައި އާމްދަނީގެ ގޮތުގައި ލިބުނީ ހަ ބިލިއަން ރުފިޔާއެވެ. އެހެންވެ، މިދިޔަ އަހަރުގެ މި މުއްދަތާ އަޅާ ބަލާއިރު މި އަހަރު އާމްދަނީ މި ވަނީ 29 އިންސައްތަ އިތުރުވެފައެވެ.
އެ ގޮތުން، މި އަހަރު ލިބުނު އާމްދަނީގެ 83 އިންސައްތައަކީ ޓެކުހުގެ ގޮތުގައި ލިބުނު އާމްދަނީއެވެ. އެއީ، 6.5 ބިލިއަން ރުފިޔާއެވެ. އެއީ، ޓެކުހުގެ ގޮތުގައި މިދިޔަ އަހަރު ލިބުނު ފަސް ބިލިއަނާ އަޅާބަލާއިރު 31 އިންސައްތައިގެ އިތުރުވުމެކެވެ.
ހިސާބުތަކުން އެނގޭ ގޮތުގައި މި އަހަރު އެންމެ ބޮޑު ކުރިއެެރުމެއް ލިބިފައިވަނީ ފަތުރުވެރިކަމުގެ ދާއިރާގެ މުދަލާއި ޚިދުމަތުގެ ޓެކްސް (ޓީޖީއެސްޓީ)ންނެވެ. އެ ގޮތުން، ޓީޖީއެސްޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތަ އިތުރު އަދަދެކެވެ.
ޖުމުލަ ޖީއެސްޓީގެ ގޮތުގައި 3.2 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 32 އިންސައްތައިގެ އިތުރުވުމެކެވެ. އަދި، ވިޔަފާރިއާއި މުދަލުން ނަގާ ޓެކުހުގެ ގޮތުގައި ވެސް މި އަހަރު 2.2 ބިލިއަން ރުފިޔާ ވަނީ ލިބިފައެވެ.
ފިނޭންސް މިނިސްޓްރީ: މި އަހަރު މިހާތަނަށް އާމްދަނީ ވަނީ އިތުރުވެފައި -- ސަން ފޮޓޯ/ ފަޔާޒް މޫސާ
ޚަރަދުތަކަށް ބަލާއިރު، މިދިޔަ އަހަރާ އަޅާބަލާއިރު ޖުމުލަ ޚަރަދުތައް ވަނީ އެއްވަރެއްގައި ހިފެހެއްޓިފައެވެ. ނަމަވެސް، މުވައްޒަފުންގެ މުސާރައާއި އިނާޔަތްތަކަށް ކުރާ ހަރަދު ވަނީ 9.6 އިންސައްތަ އިތުރުވެފައެވެ. މި މުއްދަތުގައި މުސާރައާއި ޕެންޝަނަށް 2.64 ބިލިއަން ރުފިޔާ ހަރަދުކޮށްފައިވާއިރު، އެއީ ޕޭ ހާމަނައިޒޭޝަން ސިޔާސަތުގެ ސަބަބުން އައިސްފައިވާ ބަދަލެއް ކަމަށް ފިނޭންސް މިނިސްޓްރީން ވަނީ ބުނެފައެވެ.
މި އަހަރަށް ސަރުކާރުން ފާސްކުރީ ޖުމުލަ 64.2 ބިލިއަން ރުފިޔާގެ ރިކޯޑު ބަޖެޓެކެވެ. ބަޖެޓު އެހާ ބޮޑުވީ މި އަހަރު ދައްކަންޖެހޭ 1.1 ބިލިއަން ޑޮލަރުގެ ދަރަނީގެ ސަބަބުން ކަމަށް އޭރު ސަރުކާރުން ބުންޏެވެ.
ދަރަނި ބޮޑުކަމުގެ ކަންބޮޑުވުން ބޮޑުވެފައި އޮތް ނަމަވެސް ސަރުކާރުން އަންނަނީ ވަގުތުގައި ދަރަނި އަދާކުރެވޭނެކަމުގެ ޔަގީންކަން ދެމުންނެވެ.