ދުބާއީގައި ހުންނަ އެމެރިކާ އެމްބަސީއަށް އީރާނުގެ ހަަމަލާއެއް އަމާޒުވެފައިވާ ކަމަށް އަލް ޖަޒީރާއިން ރިޕޯޓުކޮށްފިއެވެ.
ރޭ ދިން އެ ހަމަލާގައި އެެއްވެސް މީހަކަށް އަނިޔާވެފައި ނުވާ ކަަމަށް ދުބާއީގެ ކަމާބެހޭ ފަރާތްތަކުން ބުނެއެވެ.
"އެމެރިކާގެ ކޮންސިއުލޭޓް ކައިރީގައި ޑްރޯން އާ ގުޅުން ހުރި ހާދިސާއެއްގެ ސަބަބުން ރޯވި އަލިފާންގަނޑު ކާމިޔާބުކަމާއެކު ކޮންޓްރޯލް ކުރެވިފައިވާކަން ދުބާއީގެ ކަމާބެހޭ ފަރާތްތަކުން ވަނީ ކަށަވަރުކޮށްދީފައި،" ދުބާއީ މީޑިއާ އޮފީހުން ސޯޝަލް މީޑިއާގައި ކުރި ޕޯސްޓެއްގައި ބުނެފައިވެއެވެ.
އެމެރިކާއާ އިސްރާއީލު ގުޅިގެން އީރާނަށް ދޭ ހަމަލާތަކުގެ ރައްދުގައި އީރާނުން އަންނަނީ މެދުއިރުމަތީގައި ހުރި އެެމެރިކާގެ އަސްކަރީ މަރުކަަޒުތަކަށާއި އެނޫންވެސް އެެމެރިކާގެ އޮފިޝަލުން ތިބޭ ތަންތަނާ އެއާޕޯޓުތަކަށްވެސް ހަމަލާތައް އަމާޒުކުރަމުންނެވެ.
އެގޮތުން ސައޫދީ އަރަބިއްޔާގެ ވެރިރަށް ރިޔާޟްގައި ހުންނަ އެމެރިކާގެ އެމްބަސީއަށް ރޭ އީރާނުން ދިން ޑްރޯން ދެ ހަމަލާއެއްގައި އެތަނުގައި ވަނީ އަލިފާނުގެ ހާދިސާއެއް ހިނގާފައެވެ.
އެ ހާދިސާއާ ގުޅިގެން އެމްބަސީ ވަނީ ބަންދުކޮށްފައެވެ.