އެމެރިކާއާއި އިސްރާއީލުގެ ހަމަލާތައް ކުރިއަށް ގެންދާނަމަ، މެދުއިރުމަތީގެ ހުރިހާ އިގުތިސާދީ މަރުކަޒުތަކަށް ހަމަލާ ދޭނެ ކަމުގެ އިންޒާރު، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ޖެނެރަލް އިބްރާހިމް ޖައްބާރީ ދެއްވައިފިއެވެ.
މިދިޔަ ހޮނިހިރު ދުވަހު އެމެރިކާއާއި އިސްރާއީލުން އީރާނަށް ވަރުގަދަ ހަމަލާތަކެއް ދޭން ފަށައި، އެ ގައުމުގެ ރޫހީ ލީޑަރު އާޔަތުﷲ ޢަލީ ޚާމަނާއީ ވަނީ އަވަހާރަކޮށްލައިފައެވެ. ރައްދެއްގެ ގޮތުން، އީރާނުން ދަނީ، މެދުއިރުމަތީގައި ހުންނަ އެމެރިކާގެ އަސްކަރީ މަރުކަޒުތަކަށާއި އިސްރާއީލަށް ހަމަލާ ދެމުންނެވެ.
އީރާނުގެ ގައުމީ ސަލާމަތާ ގުޅުން ހުރި ކަންކަން ބަލަހައްޓާ އައިއާރުޖީސީގައި އިސްކޮށް ހުންނަވާ ޖައްބާރީ ވިދާޅުވީ، 'ދުޝްމަނުން' ހަމަލާ ދެމުން ދާނަމަ، އެ ސަރަހައްދުގެ އިގުތިސާދީ ހުރިހާ މަރުކަޒުތަކަށް ހަމަލާ ދޭނެ ކަމަށެވެ.
"އަޅުގަނޑުމެން ހޮރްމޫޒް ކަނޑުއޮޅި ބަންދުކޮށްފިން. މިވަގުތު ތެލުގެ އަގު 80 ޑޮލަރަށް ވުރެ މަތީގައި އޮތްއިރު ވަރަށް އަވަހަށް 200 ޑޮލަރަށް އަރާނެ،" އީރާނުގެ ނޫސް އެޖެންސީ، އިސްނާއަށް ދެއްވި ބަސްދީގަތުމެއްގައި އޭނާ ވިދާޅުވިއެވެ.
ދުނިޔޭގެ ބާޒާރަށް ނެރޭ ތެލުގެ ގާތްގަނޑަކަށް ފަސްބައިކުޅަ އެއްބައި ތެލާއި، ގަތަރާއި ޔުނައިޓެޑް އަރަބް އެމިރޭޓްސް އިން ލިކުއިފައިޑް ގުދުރަތީ ގޭސް އެކްސްޕޯޓްކުރަނީ ހޮރްމޫޒް ކަނޑުއޮޅި މެދުވެރިކޮށެވެ.
"އެމެރިކާ އޮތީ ތެލަށް ކަރުހިއްކައިގަނެފައި. އެ މީހުންނަށް އެނގޭނެ މިވަގުތު އަޅުގަނޑުމެން ހޮރްމުޒް ކަނޑުއޮޅި ބަންދުކޮށް ބޯޓުފަހަރު ދަތުރުކުރިޔަ ނުދޭނެކަން." ޖައްބާރީ ވިދާޅުވިއެވެ.
މެދުއިރުމަތީގެ ހަނގުރާމައިގެ ސަބަބުން ގައުމުތަކުގެ އިގުތިސާދަށް ބޮޑެތި އަަސަރުތަކެއް ކުރާނެ ކަމަށް މާހިރުން ލަފާކޮށްފައިވާއިރު، ތެލާއި ގޭހުގެ އަގުވެސް އަންނަނީ އުފުލެމުންނެވެ.
ހޯމަ ދުވަހު އިނގިރޭސިވިލާތުގެ ގޭހުގެ އަގު ފާއިތުވެދިޔަ ތިން އަހަރު ދުވަހުގެ ތެރޭގައި ނުދާހާ މައްޗަށް އުފުލިފައިވާއިރު، ބްރެންޓް ކްރޫޑް އޮއިލްގެ ބެންޗްމާކްގައި ތެޔޮ ފީފާއެއްގެ އަގު ވަނީ 85 ޑޮލަރަށް އުފުލިފައެވެ. މިއީ 2024 ވަނަ އަހަރުގެ ޖުލައި މަހަށްފަހު ތެލުގެ އަގު މިހާ މައްޗަށް އުފުލުނު ފުރަތަމަ ފަހަރެެވެ.
ހަނގުރާމައިގައި މިހާރުވެސް ތެލާއި ހަކަތަ އުފައްދާ ކާރުޚާނާތަކަށް ހަމަލާތައް އަމާޒުވަމުންދެއެވެ. އަދި، އީރާނުން ފޮނުވާލި ޑްރޯނެއް ގަތަރުގެ ރަސް ލައްފާން އިންޑަސްޓްރިއަލް ސިޓީގައި ހުރި ފެސިލިޓީއަކަށް އަމާޒުކުރުމުން، ލިކުއިފައިޑް ނެޗުރަލް ގޭސް (އެލްއެންޖީ) އުފެއްދުން ހުއްޓާލި ކަމަށް ގަތަރުއެނާޖީން ވަނީ ބުނެފައެވެ.
މީގެ އިތުރުން ސައުދީ އަރަބިއްޔާގެ ދައުލަތުގެ ތެޔޮ ކުންފުނި، އަރަމްކޯއިން ވަނީ ޑްރޯން ހަމަލާއެއް އަމާޒުވުމުން އެ ކުންފުނީގެ ރަސް ތަނޫރާ ކާރުޚާނާ ބަންދުކޮށްފައެވެ.
ހޮރްމޫޒް ކަނޑުއޮޅީގައި ބައިނަލްއަގްވާމީ ޝިޕިން ގާތްގަނޑަކަށް ހުއްޓިފައިވާއިރު، ހަމަނުޖެހުން ދިގުދެމިގެންދާނަމަ، ތެލާއި ގޭހުގެ އަގު އިތުރަށް އުފުލޭނެ ކަމަށް މަޝްރަހު ދިރާސަކުރާ ފަރާތްތަކުން ބުނެއެވެ.
އޮގަނައިޒޭޝަން އޮފް ދަ ޕެޓްރޯލިއަމް އެކްސްޕޯޓިން ކަންޓްރީޒް، އޯޕެކް ޕްލަސްއިން ވަނީ އަގު އިތުރަށް އުފުލުން ކޮންޓްރޯލު ކުރުމުގެ ގޮތުން ދުވާލަކު އިތުރު 206،000 ފީފާ އުފައްދަން އެއްބަސްވެފައެވެ.