މިދިޔަ ފެބްރުއަރީ މަހުގެ 28 ވަނަ ދުވަހު ސިނަމާތަކުގައި ދައްކަން ފެށި "ދަ ކެރެލާ ސްޓޯރީ 2: ގޯޒް ބިޔޯންޑް" ކޭބަލް ޓީވީއާއި އިންޓަނެޓް މެދުވެރިކޮށް ޣައިރު ޤާނޫނީކޮށް ދެއްކުން ހުއްޓުވުމަށް އިންޑިއާގެ ޗެންނާއީގެ މަދްރާސް ހައިކޯޓުން ވަގުތީ އަމުރެއް ނެރެފިއެވެ.
އެ ފިލްމުގެ ޕްރޮޑަކްޝަން ކުންފުނި ކަމަށްވާ "ސަންޝައިން ޕިކްޗަސް ލިމިޓެޑުން" ހުށަހެޅި ދެ މައްސަލައަކާ ގުޅިގެން، މި އަމުރު ނެރެފައި ވަނީ އިއްޔެގެ ވަގުތެއްގައެވެ. "ސަންޝައިން ޕިކްޗަސް ލިމިޓެޑުން" ކޯޓަށް މައްސަލަ ހުށަހެޅީ ފިލްމު ރިލީޒްކުރުމާ ދިމާކޮށް އޭގެ ކޮޕީރައިޓްސްއަށް އުނިކަން އަތުވެދާނެ ކަމުގެ ބިރު އޮތުމާ ގުޅިގެންނެވެ.
މި މައްސަލައާ ގުޅިގެން މަދްރާސް ކޯޓުގެ ފަނޑިޔާރު ފާހަގަކުރެއްވި ގޮތުގައި، ޤާނޫނާ ޚިލާފަށް ފިލްމު ދައްކާ މައްސަލަތަކުގައި ވަގުތުން ފިޔަވަޅު އެޅުމަކީ ކޮންމެހެން މުހިންމު ކަމެކެވެ.
އެހެނީ، އެފަދަ ކަންކަން ހުއްޓުވުމަށް އަވަސް ފިޔަވަޅެއް ނާޅައިފިނަމަ، އުފެއްދުންތެރިންނަށް އިއާދަނުކުރެވޭނެ ފަދަ ބޮޑެތި ގެއްލުންތަކެއް ލިބިދާނެއެވެ. ނަމަވެސް، މި އަމުރުގެ ސަބަބުން އެހެން ބައެއްގެ ވިޔަފާރި މަސްލަހަތަށް އަސަރުކޮށްފާނެތީ، އެފަދަ ހާލަތެއްގައި ލިބޭ ގެއްލުމުގެ ބަދަލު ދިނުމަށް ފިލްމު އުފެއްދި ފަރާތުން ޒިންމާވާންޖެހޭނެ ކަމަށް ވެސް ކޯޓުން ބުންޏެވެ.
"ދަ ކެރެލާ ސްޓޯރީ 2: ގޯޒް ބިޔޯންޑް"ގެ ޕްރޮޑިއުސަރު ވިޕުލް ޝާހް އަދި ޑައިރެކްޓަރު ކަމާހްޔާ ނާރަޔަން--ފޮޓޯ/ހިންދުންސްތާންޓައިމްސް
މިކަންކަމަށް ރިއާޔަތްކޮށް، ހައިކޯޓުން ވަނީ މި މަހުގެ 23 ވަނަ ދުވަހުގެ ނިޔަލަށް ހުއްދަނެތި "ދަ ކެރެލާ ސްޓޯރީ 2" ބްރޯޑްކާސްޓްކުރުން މަނާކޮށް ވަގުތީ އަމުރެއް ނެރެފައެވެ. އަދި މި މައްސަލައިގެ ރައްދުވާ ފަރާތްތަކަށް މި މަހުގެ 23 ވަނަ ދުވަހު ކޯޓަށް ހާޒިރުވުމަށް ޗިޓު ފޮނުވުމަށް ވެސް ކޯޓުން ވަނީ އަމުރުކޮށްފައެވެ.
ނަމަވެސް މި މައްސަލަ ރައްދުވާ މީހުންގެ ވަނަވަރެއް މިހާތަނަށް ހާމަކޮށްފައެއް ނުވެއެވެ. މި މައްސަލައިގެ އިތުރު އަޑުއެހުމެއް މާރޗު 23 ވަނަ ދުވަހު ބޭއްވުމަށް ވަނީ ތާވަލުކުރެވިފައެވެ.
ޕްރޮޑިއުސަރު ވިޕުލް އަމްރުތްލާލް ޝާހްގެ ފިލްމު "ދަ ކެރެލާ ސްޓޯރީ 2"އަކީ ހަމަ އެނަމުގައި 2023ގައި ގެނެސްދިން ފިލްމުގެ ސީކުއަލްއެކެވެ.
މި ފިލްމަކީ އިންޑިއާގެ ސްޓޭޓެއް ކަމަށްވާ ކެރެލާގައި ދިރިއުޅޭ ހިންދޫ އަންހެން ކުދިންތަކެއް ލޯބީގެ މަޅީގައި ޖެއްސުމަށްފަހު އިސްލާމްދީނަށް ވައްދައި އޮޅުވާލައިގެން އެ އަންހެނުން ޓެރަރިޒަމްގެ ދުނިޔެއަށް ގެންގޮސްދޭ ވާހަކަތަކެއް ދައްކުވައިދޭ ފިލްމެކެވެ.
މި ފިލްމު ރިލީޒްކުރުމުގެ ކުރިން ފިލްމާ ދެކޮޅަށް ކެރެލާ ސްޓޭޓްގެ ގިނަބަޔަކު ވަނީ ސޯޝަލް މީޑިއާގައި އަޑު އުފުލާފައެވެ. ފިލްމު ސިނަމާތަކުގައި ދެއްކުމުގެ ހުއްދަ ދީފައި ވަނީ ކޯޓު މަރުހަލާތަކަކަށްފަހުއެވެ.