'އަލް އަބްރާރު ޕްރައިވެޓް ލިމިޓެޑް' ގްރޫޕުން ފަހު ވަގުތު އުމްރާއަށް ފުރުން ކެންސަލްކުރުމުން، އެ ގްރޫޕާއެކު އުމްރާއަށް ފުރަން ތިބި 100 އަށްވުރެ ގިނަ މީހުން ކަންބޮޑުވުން ފާޅުކުރަކުންދާ މައްސަލައެއް އިސްލާމިކް މިނިސްޓްރީން ބަލަން ފަށައިފިއެވެ.
'ސަން' އާ ވާހަކަދެއްކި މީހަކު ބުނި ގޮތުގައި މިރޭ އެ ގްރޫޕާއެކު 110 މީހުން އުމްރާއަށް ފުރާ ގޮތަށް ހަމަޖެހިފައި އޮތެވެ. ނަމަވެސް ފުރުން ކެންސަލްކުރީ ކުއްލިއަކަށް ކަމަށް އޭނާ ބުންޏެވެ.
ނަން ނުޖަހަން ޝަރުތުކޮށް ވާހަކަދެއްކި އެ މީހާ ބުނި ގޮތުގައި އޭނާގެ ވެސް އާއިލާގެ މީހުން އުމްރާއަށް ފުރާތީ އެކަންތައްތައް ހަމަޖައްސަން އޭނާ އިސްކޮށް އުޅުނެވެ. އެގޮތުން މިއަދު ހެނދުނު 10:00 އާއި 11:00 އާ ދޭތެރޭ އެއާޕޯޓަށް ފޮށިތައް ގެނައުމަށް އެދުނު ކަމަށާއި، ފުރަން ދާން ތިބި އެންމެން ރޭ ޕެކްކޮށް ވެސް ނިންމި ކަމަށް އެމީހާ ކިޔައިދިނެވެ. ކަން އެހެން އޮއްވައި ކުއްލިއަކަށް ގުޅައި، މިރޭ ފުރަން ދާއިރު ފޮށިތައް ގެންނަން އެދުނު ކަމަށް އޭނާ ބުންޏެވެ.
އެފަހުން މިއަދުގެ މެންދުރު ދޭއް ޖަހަނިކޮށް ގުޅައި، މީޓިންއެއް އޮތްކަން އަންގައި، އުމްރާއަށްދާ އެންމެން އެ މީޓިންއަށް ހާޒިރުވާން އެންގި ކަމަށް އޭނާ ބުންޏެވެ. ފުރުން ކެންސަލްކުރިކަން އެނގުނީ ވެސް އެ މީޓިންއަށް ދިޔުމުން ކަމަށް އެމީހާ ބުންޏެވެ. އަދި މިހާރު މެދުއިރުމަތީގައި ހިނގާ ހަނގުރާމައާ ހެދި ފުރުން ކެންސަލްވީ ކަމަށް އަލް އަބްރާރު ގްރޫޕުން މައުލޫމާތުދިން ކަމަށް އޭނާ ބުންޏެވެ.
"ކުއްލިއަކަށް މިއަދު ބުނީމާ ދެން އުމްރާއަށް ދާން ޖާގައެއް ވެސް ނުލިބޭނެތީ ވަރަށް ގިނަ މީހުން ތިބީ ކަންބޮޑުވެފައި. މިދިޔަ ހުކުރު ދުވަހު ވެސް ބުނީ ހުރިހާ ކަމެއް ހަމަޖެހިފައޭ. ސައުދީއަށް ދާ މީހުންގެ އެއްވެސް މައްސަލައެއް ނެތޭ އެ ދުވަހު ވެސް ބުނީ،" ނުރުހުން ފާޅުކޮށް އެމީހާ ބުންޏެވެ.
އެ މީހާ ކިޔައިދިން ގޮތުގައި އުމްރާއަށް ފުރާކަމަށް ވާނަމަ ހުންނަންޖެހޭނީ ހުރިހާ އިންތިޒާމުތަކެއް ވެސް ހަމަޖައްސައިފައެވެ. ނަމަވެސް މިރޭ ވިސާ ވެސް ބައެއް މީހުންނަށް ނުޖަހާ ހުރިކަން އެނގުނު ކަމަށް އޭނާ ބުންޏެވެ.
އޭނާ ބުނި ގޮތުގައި އުމްރާއަށް ދިޔުމަށް ގާތްގަނޑަކަށް 45،000 ރުފިޔާ، މީހުން ވަނީ އެ ގްރޫޕަށް ދައްކާފައެވެ.
އެމީހާ ބުނީ އެކަން މިހާރު އިސްލާމިކް މިނިސްޓްރީއަށް ވެސް އަންގާފައިވާ ކަމަށެވެ.
އިސްލާމިކް މިނިސްޓަރު ޝަހީމް -- ފޮޓޯ/ އިސްލާމިކް މިނިސްޓްރީ
އެކަމާ ގުޅިގެން 'ސަން' އަށް މައުލޫމާތުދެއްވައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެ މައްސަލަ މިހާރު މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އަދި މިނިސްޓްރީ އެކަން ހިނގި ގޮތް މިހާރު ބަލަމުންދާ ކަމަށް ވެސް މިނިސްޓަރު ވިދާޅުވިއެވެ.
އެކަން ބަލައި، ފިޔަވަޅު އަޅަންޖެހޭ ފަރާތެއްވާނަމަ ފިޔަވަޅު އަޅައި، މައްސަލަ ހައްލުކޮށްދެއްވާނެ ކަމަށް ޝަހީމް ވިދާޅުވިއެވެ.
މި މައްސަލަ ދިމާވިއިރު، މިރޭގެ އިތުރުން މާދަމާއާއި އޭގެ އަނެއް ދުވަހު ވެސް ރާއްޖެއިން މީހުން އުމްރާއަށް ފުރަން އޮތީ ހަމަޖެހިފައެވެ.
މެދުއިރުމަތީގައި މިހާރު ކުރަމުން އަންނަ ހަނގުރާމައާ ގުޅިގެން އަރަބި ގައުމުތަކުގެ މެދުގައި މަސްރަހު ވަނީ ވަރަށް ބޮޑަށް ގޯސްވެފައެވެ. އެމެރިކާއާއި އިޒްރޭލުން ގުޅިގެން އީރާނަށް ދިން ވަރުގަދަ ހަމަލާގެ ބަދަލު ހިފުމުގެ ގޮތުން އީރާނުން ވަނީ ގަލްފުގެ (އަރަބި) ގައުމުތަކުގައި ހުރި އެމެރިކާގެ އެސެޓްތަކަށް ހަމަލާ ދީފައެވެ. އޭގެ ތެރޭގައި ސައުދީ ވެސް ހިމެނެއެވެ.
ކަން އެހެން އޮތްއިރު، ރޯދަ މަހުގެ ފަހު 15 އަކީ އާއްމުކޮށް ރާއްޖެއިން ގިނަ އަދަދެއްގެ މީހުން އުމްރާއަށް ފުރާ ދުވަސްކޮޅެކެވެ. ގިނަ އަދަދެއްގެ ފައިސާ ބޮޑެތި އަދަދުތަކުން އުމްރާއަށް ގެންދާ ގްރޫޕްތަކަށް ދައްކައިގެން އުމްރާއަށް ދިޔުމަށް މީހުން ތައްޔާރުވެއެވެ.
ފާހަގަކޮށްލެވޭ ގޮތުގައި މީގެކުރިން ވެސް އުމްރާއަށް ދާ ގްރޫޕްތަކުގެ އެކި މައްސަލަތައް ފެންމަތިވެފައި އެބަހުއްޓެވެ. އެގޮތުން އުމްރާއަށް ގެންދަން ކަމަށް ބުނެ މީހުން އަތުން ފައިސާ ނަގައި، ސްކޭމްކުރުމުގެ މައްސަލަތަކުގައި މިނިސްޓްރީން ވަނީ އެކި ފިޔަވަޅުތައް އަޅައިފައެވެ.