މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މިއަހަރުގެ ހަރަކާތްތަކަށް 14 މިލިއަން ރުފިޔާގެ ބަޖެޓެއް ފާސްކޮށްފިއެވެ.
ހެންވޭރު ބޯޅަގޭގައި ބޭއްވި އަހަރީ އާންމު ޖަލްސާ, ވޯޓުލެވޭ 13 މެމްބަރުންނާއެކު ކުރިއަށްދިޔައިރު، މިއަހަރުގެ ބަޖެޓަކަށް ފާސްކޮށްފައިވާ އަދަދަކީ 14،360،121.33 (ސާދަ މިލިއަން ތިން ލައްކަ ފަސްދޮޅަސް ހާސް އެއްސަތޭކަ އެކާވީސް ރުފިޔާ ތެއްތިރީސް ލާރި) އެވެ.
މި ބަޖެޓު ހުށައެޅުއްވީ އެސޯސިއޭޝަނުގެ ނައިބު ރައީސް އަލީ އިބްރާހިމެވެ.
ބަޖެޓުގެ އެންމެ ބޮޑު ހޭދައެއް ކުރުމަށް ހަމަޖެހިފައިވަނީ ބައިނަލްއަޤްވާމީ މުބާރާތްތަކަށެވެ. އެގޮތުން އައިބީސީ ވޯލްޑް ޓުއާއާއި ރާއްޖޭގައި ބާއްވަމުން އަންނަ މޯލްޑިވްސް ޕްރޯ ފާހަގަކޮށްލެވެއެވެ. މީގެއިތުރުން ގައުމީ ލީގަށް ވެސް ވަނީ ބަޖެޓެއް ކަނޑައަޅާފައެވެ.
ދެން އެންމެ ބޮޑު ހޭދައެއް ކުރުމަށް ނިންމާފައިވަނީ ވައިޑީޕީ ޕްރޮގްރާމް ނުވަތަ ކުޅުންތެރިން ބިނާކުރުމުގެ ޕްރޮގްރާމަށެވެ. އެގޮތުން ހުދުފޮނު ޕްރޮގްރާމް ފާހަގަކޮށްލެވެއެވެ.
ބަޖެޓު ފާސްކުރުމަށް ބޭއްވި އަހަރީ އާންމު ޖަލްސާފައި ނޭޝަނަލް ސްޕޯޓްސް ކައުންސިލާއި ސްޕޯޓްސް ކޮމިޝަނަރުގެ އޮފީހުން މަންދޫބުން ބައިވެރިވެވަޑައިގެންނެވިއެވެ.
ޖަލްސާގައި އަހަރީ ރިޕޯޓު ހުށަހެޅުމުގެ އިތުރުން ފައިނޭންޝަލް ސްޓޭޓްމަންޓު ވެސް ހުށަހެޅިއެވެ.
އެމްބީބީއޭއިން ވަނީ ނިމިދިޔަ އަހަރު ކާމިޔާބުކަމާއެކު ގިނަ ޕްރޮގްރާމުތަކެއް ހިންގާފައެވެ. އެގޮތުން ބޮޑީބޯޑިންގެ ހަރަކާތްތަކަކުގެ ތެރެއިން ހުދުފޮނު ޕްރޮގްރާމުގެ ކުލިނިކުތައް ނ. ޅޮއްސާއި ށ. ކަނޑިތީމުގައި ކާމިޔާބުކަމާއެކު ވަނީ ކުރިއަށް ގެންގޮސްފައެވެ.