އާއްމުކޮށް ވެސް ބިންހެލުންތައް އަންނަ, އިންޑޮނޭޝިއާގެ އުތުރު ސުމާޓްރާއަށް މިއަދު ބާރުގަދަ ބިންހެލުމެއް އަތުވެއްޖެއެވެ.
ރާއްޖޭގެ މޫސުމާ ބެހޭ ގައުމީ އިދާރާ (މެޓް) އިން ބުނިގޮތުގައި 6.1 މެގިނިޓިއުޑްގެ ބާރުމިނުގައި އެ ބިންހެލުން އައީ ވެރިރަށް މާލެއާ 2581 ކިލޯ މީޓަރު ދުރަށެވެ. މި ބިންހެލުން އައީ މިއަދު ރާއްޖެ ގަޑިން 9:56 ގައެވެ.
މި ބިން ހެލުމުގެ ސީދާ ނުރައްކާ ރާއްޖެއަށް ނުކުރާނެ ކަމަށް މެޓުން ބުންޏެވެ.
ދެހާސް ހަތަރު ވަނަ އަހަރު ރާއްޖެއަށް އެރި ނުރައްކާތެރި ސުނާމީ އުފެދުނީ ވެސް ސުމަތުރާ ކައިރިއަށް އައި ބިންހެލުމަކާއެކުގައެވެ.
މި ބިންހެލުމުގެ ސަބަބުން އިންޑޮނޭޝިއާއަށް ލިބުނު ގެއްލުންތަކުގެ ތަފްސީލެއް އަދި ނުލިބެއެވެ.
ދެކުނު އިރުމަތީ އޭޝިއާގެ ބޮޑު ގައުމެއް ކަމަށްވާ އިންޑޮނޭޝިއާއަކީ ޕެސިފިކް ރިންގް އޮފް ފަޔާގައި އޮންނަ ގައުމަކަށްވާތީ، ބިންހެލުން އައުމަކީ އާންމުކަމެކެވެ.
މިއީ ޓެކްޓޯނިކް ޕްލޭޓްތައް އެއް ޕްލޭޓް އަނެއް ޕްލޭޓާ ޖެހޭ ގޮތަށް، ޖަޕާނުން ފެށިގެން ދެކުނު އިރުމަތީ އޭޝިއާ އާއި ޕެސިފިކް ކަނޑުގެ އައްސޭރިފަށާއި ދެމެދު އޮންނަ ސަރަހައްދެކެވެ.