ޓެކްނޮލޮޖީގެ ދާއިރާގައި ދުނިޔޭގައި އެންމެ ކުރިއަރާފައިވާ އެޕަލް ކުންފުނިން، އެންމެ ފަހުގެ އެމް4 ޗިޕްސެޓް ހިމެނޭ އައިޕެޑް އެއާ (2026) އިންޑިއާ އާއި ދުނިޔޭގެ އެހެން މާކެޓްތަކަށް ނެރެފިއެވެ. މި އައިޕެޑާއެކު އެ ކުންފުނިން ވަނީ އައިފޯން 17އީ ވެސް ދައްކާލާފައެވެ.
އައު އައިޕެޑް އެއާ ނެރެފައިވަނީ 11 އިންޗި އަދި 13 އިންޗީގެ ދެ ސައިޒެއްގައެވެ. މީގެ ތެރެއިން 13 އިންޗީގެ މޮޑެލްގައި ހިމެނެނީ 600 ނިޓްސްގެ ބްރައިޓްނެސް ލިބޭ، ވަރަށް ސާފު "ލިކުއިޑް ރެޓިނާ އައިޕީއެސް" ޑިސްޕްލޭއެކެވެ.
މި ޓެބްލެޓްގައި ބޭނުންކޮށްފައިވާ އެމް4 ޗިޕަކީ 8-ކޯ ސީޕީޔޫ އާއި 9-ކޯ ޖީޕީޔޫ ހިމެނޭ، ބާރުގަދަ ޗިޕެކެވެ. މީގެ އިތުރުން 12ޖީބީ ރޭމް އާއި 1-ޓީބީ އާ ހަމައަށް ސްޓޯރޭޖް ލިބެން ހުންނާނެއެވެ.
މި އައިޕެޑް އެއާ ހިންގާނީ އެންމެ ފަހުގެ އައިޕެޑް އޯއެސް 26 ގައެވެ. އަދި މީގައި އެޕަލްގެ އައު އޭއައި ސިސްޓަމް "އެޕަލް އިންޓެލިޖެންސް" ގެ ފުރިހަމަ އެހީތެރިކަން ލިބޭނެއެވެ.
ކެމެރާގެ ސިފަތަކަށް ބަލާއިރު، ފަހަތުގައި 12 މެގަޕިކްސެލްގެ ކެމެރާއެއް ހިމެނޭއިރު، މީގެން 4ކޭ ކޮލިޓީގައި ވީޑިއޯ ރެކޯޑް ކުރެވޭނެއެވެ. އަދި ވީޑިއޯ ކޯލްތަކަށް ޚާއްޞަކޮށް ކުރިމަތީގައި ވެސް 12 މެގަޕިކްސެލްގެ ކެމެރާއެއް ހިމަނާފައިވެއެވެ. މީގެ ބެޓެރީއަކީ އެއްފަހަރު ޗާޖުކޮށްލައިގެން 10 ގަޑިއިރު ހިފަހައްޓާނެ ބެޓެރީއެއް ކަމަށް އެޕަލް އިން ބުނެއެވެ.
ނޫ، ދަނބު، ސްޕޭސް ގްރޭ އަދި ސްޓާލައިޓް ކުލައިގައި މި އައިޕެޑް ލިބޭނެ ---
އިންޑިއާގެ ބާޒާރުގައި 11 އިންޗީގެ އައިޕެޑް އެއާގެ އަގު ފެށެނީ 64,900 ރޫޕީސް (ގާތްގަނޑަކަށް 12,000 ދިވެހި ރުފިޔާ) އިންނެވެ. އަދި 13 އިންޗީގެ މޮޑެލްގެ އަގު ފެށެނީ 84,900 ރޫޕީސް (ގާތްގަނޑަކަށް 15,700 ދިވެހި ރުފިޔާ) އިންނެވެ.
މި އައިޕެޑް ލިބެން ހުންނާނީ ނޫ، ދަނބު، ސްޕޭސް ގްރޭ އަދި ސްޓާލައިޓް ކުލައިގައެވެ.
މީގެ އިތުރުން މި ޓެބްލެޓަކީ އެޕަލް ޕެންސިލް ޕްރޯ އަށް ވެސް ސަޕޯޓްކުރާ އެއްޗެކެވެ. މިހާރު މި އައިޕެޑް އެޕަލްގެ އޮންލައިން ސްޓޯރުތަކުން ވެސް ގަންނަން ލިބޭނެއެވެ.