އއ. ރަސްދޫގައި ދެ މީހަކު ފިހިގެން މަރުވިތާ އަހަރެއް ވާން ކައިރިވެފައިވާއިރު، އެ މައްސަލައިގެ ތަހުގީގު ނުނިމި ލަސްވާތީ އާއިލާއިން ހަތަރު އިދާރާއަކަށް ސިޓީ ހުށަހަޅައިފިއެވެ.
މިދިޔަ އަހަރުގެ މާރިޗު 24 ވަނަ ދުވަހުގެ ރޭ ހިނގި އަލިފާނުގެ ހާދިސާއެއްގައި ފިހިގެން މަރުވީ، 31 އަހަރުގެ އަލީ ސާމިންއާއި އޭނާގެ ކުރީގެ އަނބިމީހާ އައިޝަތު ރިފުޤާއެވެ. އެ ދެ މީހުން މަރުވިއިރު، ހަށިގަނޑުގެ ބޮޑު ބައެއް ވަނީ ފިހިފައެވެ. އެ ދެ މީހުން ފަސް އަހަރުގެ ދަރިއަކު ހުންނައިރު، އެ ކުއްޖާއަށް ހާދިސާގައި އެއްވެސް އަނިޔާއެއް ލިބިފައެއް ނުވެއެވެ.
އެ ދެ މީހުން މާލެ ގެނެސް ފުރަތަމަ ފަރުވާ ދިނީ، އައިޖީއެމްއެޗުގެ ވެންޓިލޭޓަރުގައެވެ. އޭގެ ހަތް ދުވަސް ފަހުން، ރިފުގާ މަރުވީ މިދިޔަ އަހަރުގެ މާރިޗު 31ގައެވެ.
ސާމިންއަށް އައިޖީއެމްއެޗުގެ އައިސީޔޫގައި ފަރުވާ ދިނުމަށް ފަހު، މިދިޔަ އޭޕްރީލް މަހު އިންޑިއާއަށް ގެންދިޔައެވެ. އޭނާ މަރުވީ، މިދިޔަ އޭޕްރީލް މަހުގެ 14ވަނަ ދުވަހުގެ ރޭގައެވެ.
އެ މައްސަލައިގެ ތަހުގީގު ލަސްވާތީ، ސާމިންގެ އާއިލާއިން އޭރު ޕޮލިސް ކޮމިޝަނަރަކަށް ހުންނެވި އިސްމާއިލް ނަވީނަށް މިދިޔަ ޑިސެމްބަރު 25ގައި ސިޓީއެއް ވަނީ ހުށަހަޅާފައެވެ. އެ ސިޓީގައި ވަނީ، މައްސަލައިގައި ކޮންމެހެން ބަޔާން ނަގަން ޖެހޭ މީހުންގެ ބަޔާން ނަގައިި ދިނުމަށް އެދިފައެވެ.
އެ މައްސަލައިގެ ތަހުގީގު ނުނިމި ލަސްވާންވީ ސަބަބެއް އެނގެން ބޭނުންވާ ކަމަށް އެ ސިޓީގައި ބުނެފައިވެއެވެ.
އޭގެ ފަހުން، މިދިޔަ މަހުގެ 18ގައި ނަވީން ވަނީ ރިޓަޔާކުރައްވައިފައެވެ.
ސާމިންގެ އާއިލާގެ ފަރާތުން މިއަދު 'ސަން'އާ ވާހަކަދެއްކި މެންބަރަކު ބުނީ، އެ ސިޓީއަށް މިހާތަނަށް ވެސް ޖަވާބެއް ލިބިފައިނުވާ ކަމަށެވެ. އަދި، ޖަވާބެއް ހޯދުމަށް އެތައް ފަހަރެއްގެ މަތިން މަސައްކަތްކޮށްފައިވާ ކަމަށް އާއިލާއިން މައުލޫމާތުދެއެވެ.
އެހެންވެ، ޕްރޮސެކިއުޓާ ޖެނެރަލްގެ އޮފީހާއި ހޯމް މިނިސްޓަރު އަލީ އިހުސާނާއި ރައީސް އޮފީހާއި ރައްޔިތުންގެ މަޖިލީހަށް މިދިޔަ ހަފުތާގައި ސިޓީއެއް ފޮނުވާފައިވާ ކަމަށް އެ އާއިލާއިން ބުންޏެވެ. އެ ސިޓީތައް 'ސަން'އަށް ވަނީ ލިބިފައެވެ.
އެ ސިޓީތަކުގައި ވަނީ، އަލިފާނުގެ ހާދިސާ ހިނގައި ދެ މީހުން މަރުވިތާ އަހަރެއްވާން ކައިރިވީއިރު ވެސް މައްސަލަ ތަހުގީގުކޮށް ނިމިފައިނުވާތީ އެކަމުގެ ކަންބޮޑުވުން ފާޅުކޮށްފައެވެ. މިގޮތުން ، ތަހުގީގަށް މުހިންމު ވަރަށް ގިނަ މީހުންގެ ބަޔާން ނުނަގައި ހުރި ކަމަށާއި ފޯނުތަކުން ނަގަން ޖެހޭ މުއާސަލާތީ އެއްވެސް މައުލޫމާތެއް ހޯދައިފައިނުވާ ކަމަށް ސިޓީތަކުގައި ބުނެފައިވެއެވެ.
އާއިލާއިން ބުނި ގޮތުގައި، މި ހާދިސާއާ ގުޅޭ ގިނަ މައުލޫމާތުތަކެއް ސާމިންގެ ފޯނުން ލިބެން ހުންނާނެކަން ޔަގީން ކުރެވިފައިވެއެވެ. އޭގެއިތުރުން، މައްސަލައިގެ ފުރިހަމަ ތަހުގީގެއް ހިންގައި، އެ ކަމުގެ ރިޕޯޓެއް ހަވާލުކުރުމަށް ސާމިންގެ އާއިލާއިން ވަނީ އެދިފައެވެ.