ސްމާޓް ގަޑި ފަދަ ވަސީލަތްތަކަށް ބޮޑު ބަދަލެއް ގެނެސްދޭނެ ފަދަ ތުނި، ލެންބޭ އޭއައި ޗިޕެއް ޗައިނާގެ ސައިންސްވެރިން އުފައްދައިފިއެވެ.
ޗައިނާގެ ސިންގްހުއާ ޔުނިވާސިޓީ އާއި ޕީކިން ޔުނިވާސިޓީ ގުޅިގެން އުފެއްދި މި ޗިޕަށް ދީފައިވާ ނަމަކީ "ފްލެކްސީ" އެވެ.
މިހާރު ބޭނުންކުރާ ސްމާޓް ވަސީލަތްތަކުގައި ހުންނަ ޗިޕްތަކަކީ ހަރު އަދި ބެޓެރީ ގިނައިން ބޭނުންކުރާ އެއްޗެހި ނަމަވެސް، މި އާ ޗިޕަކީ އެތައް ހާސް ފަހަރަކު ފަތްޖަހާލިޔަސް ހަލާކުނުވާނެހާ ވަރުގަދަ އަދި ލެންބޭ ވަސީލަތެކެވެ. މިއީ ހަށިގަނޑުގައި އަޅައިގެން އުޅޭ ސްމާޓް ޓެކްނޮލޮޖީގެ ފުރިހަމަ ބޭނުން ހިފުމަށް ކުރިމަތިވެފައިވާ އެންމެ ބޮޑު އެއް ހުރަހަށް ލިބުނު ހައްލެކެވެ.
"ނޭޗާ" މަޖައްލާގައި ޝާއިއުކޮށްފައިވާ މި ދިރާސާގައި ބުނާގޮތުން، މި ޗިޕްގެ ސާކިއުޓްތަކުގައި އޭއައި ހިމަނާފައިވަނީ މައުލޫމާތުތައް ސީދާ ޗިޕްގެ ތެރޭގައި ޕްރޮސެސްކުރެވޭ ގޮތަށެވެ. މީގެ ސަބަބުން ބޭރުގެ ކޮމްޕިއުޓަރަކަށް މައުލޫމާތު ފޮނުވަން ނުޖެހި، ވަގުތު ސަލާމަތްވުމުގެ އިތުރުން ކަރަންޓު ހަރަދު ވަރަށް ބޮޑަށް ކުޑަވެގެންދެއެވެ.
ފްލެކްސީ އާއި އޭގެ މައިގަނޑު ފީޗާތަކުގެ ތަފްސީލު ---
އަމަލީ މައިދާނުގައި މި ޗިޕް ޓެސްޓްކުރިއިރު، ހިތުގެ ވިންދު ހުންނަ ގޮތް ދެނެގަތުމުގައި 99.2 އިންސައްތަ ސައްހަ ނަތީޖާ ވަނީ ދައްކާފައެވެ. އަދި ހިނގުމާއި ބައިސްކަލު ދުއްވުން ފަދަ އިންސާނާގެ ދުވަހީ ހަރަކާތްތައް ދެނެގަތުމުގައި 97.4 އިންސައްތަ ކާމިޔާބީ މި ޗިޕުން ވަނީ ހޯދާފައެވެ.
މި ޗިޕަކީ އާދައިގެ ޗިޕްތަކާ އަޅާބަލާއިރު އެންމެ އިންސައްތައަކަށްވުރެ މަދު ހަކަތަ ބޭނުންކުރާ، އަދި އުފެއްދުމުގެ ހަރަދު ވަރަށް ކުޑަ އެއްޗެކެވެ.
ގިނަ އަދަދަކަށް އުފައްދާނަމަ ޗިޕެއްގެ އަގު އެއް ޑޮލަރަށްވުރެ ކުޑަވާނެތީ، މިއީ ސިއްހީ ދާއިރާގައި ބޭނުންކުރާ ވަސީލަތްތަކަށް ލިބޭނެ ވަރަށް ބޮޑު ކުރިއެރުމެއް ކަމަށް ދިރާސާވެރިން ބުނެއެވެ.
ވޭތުވެދިޔަ އަހަރުތަކުގައި ސްމާޓް ގަޑި އާއި ދުޅަހެޔޮކަން ބަލާ ވަސީލަތްތައް ދުނިޔޭގައި ވަނީ ވަރަށް ބޮޑަށް އާންމުވެފައެވެ. ނަމަވެސް މިހާތަނަށް މިފަދަ ތަކެތި އުފެއްދުމުގައި ދިމާވާ އެންމެ ބޮޑު ގޮންޖެހުމަކީ އޭގައި ބޭނުންކުރާ ސިލިކަން ޗިޕްތަކަކީ ހަރު އަދި ފަސޭހައިން ބިންދައިގެންދާ އެއްޗެހީގެ ގޮތުގައި ހުރުމެވެ.
މީގެ އިތުރުން މި ވަސީލަތްތަކުން އެއްކުރާ ގިނަ މައުލޫމާތުތައް ދިރާސާކުރުމަށް ފޯނަކަށް ނުވަތަ އެހެން ކޮމްޕިއުޓަރަކަށް ފޮނުވަން ޖެހުމަކީ ބެޓެރީ އަވަހަށް ހުސްވުމާއި މަސައްކަތް ލަސްވުމަށް މެދުވެރިވާ ސަބަބެކެވެ. އެހެންކަމުން، ދުނިޔޭގެ ސައިންސްވެރިން އަންނަނީ އިންސާނާގެ ހަށިގަނޑާ އެކު ފަސޭހައިން ލެންބޭނެ އަދި އަމިއްލައަށް މައުލޫމާތު ދެނެގަތުމުގެ ގާބިލުކަން ހުރި "ފްލެކްސިބަލް އިލެކްޓްރޯނިކްސް" ތަރައްގީކުރުމަށް ގިނަ މަސައްކަތްތަކެއް ކުރަމުންނެވެ.