ދެކުނު އޭޝިއާގެ ފުރަތަމަ ފުޓްސަލް މުބާރާތުގެ ޗެމްޕިއަންކަން ރާއްޖެއަށް ހޯދައިދިން ޓީމުގެ އެއް ކުޅުންތެރިޔާ ކަމަށްވާ އިޝާން އިބްރާހީމް (ސައްޓު) އަށް އޭނާގެ އުފަންރަށް ކަމަށްވާ ބ. އޭދަފުށިން ހޫނު މަރުހަބާއެއް ކިޔައިފިއެވެ.
މި މުބާރާތުގައި ރާއްޖެ ތަމްސީލުކުރި ގައުމީ ފުޓްސަލް ޓީމުގައި އޭދަފުއްޓަށް ނިސްބަތްވި ހަމައެކަނި ކުޅުންތެރިއަކީ ސައްޓު އެކަންޏެވެ.
ސައްޓުގެ އުފަންރަށް ބ. އޭދަފުށިން ހޫނު މަރުހަބާއެއް ކިޔަނީ-- ފޮޓޯ: އޭދަފުށި ކައުންސިލް
އޭދަފުށީގެ ކައުންސިލުން މައުލޫމާތުދޭ ގޮތުގައި ސައްޓުއަށް މަރުހަބާކިއުމަށް ގިނަ ބަޔަކު ވަނީ ބަނދަރު ސަރަހައްދަށް އެއްވެފައެވެ. އޭގެ ތެރޭގައި ސައްޓުގެ އާއިލާ މެމްބަރުންނާއި ރަހުމަތްތެރިންގެ އިތުރުން ރަށުގެ އާންމުންނާއި މުވައްސަސާތަކުގެ މުވައްޒަފުން ހިމެނެއެވެ.
ސައްޓު ވަނީ މި މުބާރާތުގެ ޗެމްޕިއަންކަން ރާއްޖެއަށް ހޯދައިދިނުމުގައި މުހިންމު ދައުރެއް، އެހެން ކުޅުންތެރިންނާއެކު އަދާކޮށްފައެވެ. އެގޮތުން މުބާރާތުގައި ރާއްޖެ ކުޅުނު ހުރިހާ މެޗެއްގައިވެސް ސައްޓު ކުޅެފައިވެއެވެ.
ސައްޓުގެ އުފަންރަށުން ހޫނު މަރުހަބާއެއް ކިޔަނީ-- ފޮޓޯ: އޭދަފުށި ކައުންސިލް
މީގެއިތުރުން ބަންގްލަދޭޝްއާ ވާދަކޮށް ރާއްޖެ މޮޅުވި މެޗުގައި ކާމިޔާބުކުރި ލަނޑާއެކު ސައްޓުއަށް ވަނީ މެޗުގެ މޮޅު ކުޅުންތެރިޔާގެ މަގާމުވެސް ލިބިފައެވެ.
މީގެކުރިންވެސް ސައްޓު ވަނީ ގައުމީ ފުޓްސަލް ޓީމާއެކު ރާއްޖެ ތަމްސީލުކޮށްފައެވެ.