އެމެރިކާގެ އިމިގްރޭޝަން އޮފިސަރުން ދިން ހަމަލާތަކެއްގައި ދެ މީހަކު މަރުވުމާ ގުޅިގެން، ޓްރަމްޕް ސަރުކާރުގެ ސިޔާސަތުތަކާ ދެކޮޅަށް މުޅި އެމެރިކާގައި ބޮޑު ހަޅުތާލެއް ފަށައިފިއެވެ.
"މަސައްކަތަށް ނުދިއުމާއި، ކިޔަވަން ނުދިއުމާއި، ވިޔަފާރި ނުކުރުމުގެ" އުސޫލުން ކުރިއަށްގެންދާ މި ހަޅުތާލަކީ، ރައީސް ޑޮނަލްޑް ޓްރަމްޕްގެ ސަރުކާރުން ބޭރު މީހުން ގައުމުން ބޭރުކުރުމަށް ފަށާފައިވާ ވަރުގަދަ ކެމްޕޭނާ ދެކޮޅަށް ކުރާ އިހުތިޖާޖެކެވެ.
މި ހަޅުތާލު ފަށާފައި މިވަނީ މިނެސޯޓާގައި އެމެރިކާގެ ދެ ރައްޔިތަކު އިމިގްރޭޝަން އޭޖެންޓުންގެ އަތުން މަރުވި ހާދިސާތަކާ ގުޅިގެންނެވެ. އެއީ މިމަހުގެ 24 ވަނަ ދުވަހު ބޯޑަރު ޕެޓްރޯލް އޭޖެންޓުންގެ ހަމަލާގައި މަރުވި 37 އަހަރުގެ އެލެކްސް ޕްރެޓީ އާއި، ޖެނުއަރީ ހަތް ވަނަ ދުވަހު އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސީއީ) އޭޖެންޓެއްގެ ހަމަލާގައި މަރުވި 37 އަހަރުގެ ރެނޭ ނިކޯލް ގުޑް އެވެ.
އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އިން ހުކުރު ދުވަހު ވަނީ އެލެކްސް ޕްރެޓީގެ މަރުގެ މައްސަލައިގައި ސިވިލް ރައިޓްސް ތަހުގީގެއް ފަށާފައިވާކަން އިއުލާންކޮށްފައެވެ. ނަމަވެސް، ރެނޭ ނިކޯލް ގުޑްގެ މަރުގެ މައްސަލަ ތަހުގީގު ކުރަން އަދި ނިންމާފައެއް ނުވެއެވެ.
މި ހަޅުތާލަށް ތާއީދު ކުރައްވާ ބޭފުޅުންގެ ތެރޭގައި އެމެރިކާގެ ކޮންގްރެސް މެންބަރު އިލްހާން އުމަރު ހިމެނިވަޑައިގަންނަވައެވެ. އޭނާ ވިދާޅުވީ އައިސް (އައިސީއީ) އިން ހިންގާ ބިރުވެރިކަމުގެ ކެމްޕޭނާ ދެކޮޅަށް އިހުތިޖާޖު ކުރާ މީހުން ދުނިޔެ ބަދަލުކުރަމުންދާ ކަމަށެވެ.
މި ހަމަލާތައް ކުރިމަތިވެފައިވަނީ މިނެސޯޓާގައި ދިރިއުޅޭ ސޯމާލީ އެމެރިކަން ދަރިކޮޅުގެ މީހުންނަށް އަމާޒުކޮށް ޓްރަމްޕް ސަރުކާރުން ހިންގާ ހާއްސަ އޮޕަރޭޝަނެއްގެ ތެރެއިންނެވެ. ވައިޓް ހައުސްގެ "ބޯޑާ ސާ" ޓޮމް ހޯމަން ވިދާޅުވީ، އެ ސަރަހައްދުގައި ހިންގާ އޮޕަރޭޝަންތައް ކުރިއަށްދާނެ ކަމަށެވެ.
ސަރުކާރުގެ އޮފިޝަލުން ކުރިން ބުނެފައިވަނީ ޕްރެޓީ މަރާލީ އޭނާ އޭޖެންޓުންނަށް ބަޑި ދެއްކުމުން ކަމަށެވެ. ނަމަވެސް، ފަހުން އެނގުނު ގޮތުގައި އެއީ ދޮގު މައުލޫމާތެކެވެ. އަދި ރެނޭ ނިކޯލް ގުޑް އަކީ "ޓެރަރިސްޓެއް" ކަމަށް ސަރުކާރުން ސިފަކުރި ނަމަވެސް، ވީޑިއޯތަކުން ފެންނަ ގޮތުގައި އޭނާ މަރާލާފައިވަނީ ކާރުގައި އެ ސަރަހައްދުން ދާން އުޅެނިކޮށެވެ.
މި ހަޅުތާލުގެ ސަބަބުން އެމެރިކާގެ ބައެއް ސްޓޭޓްތަކުގެ ސްކޫލްތައް ބަންދުކޮށް، ގިނަ އަދަދެއްގެ ދަރިވަރުން ވަނީ ކްލާސްތަކުން ނުކުމެ އިހުތިޖާޖުކޮށްފައެވެ.
ވޮޝިންޓަން ޑީސީގެ ހޮވާޑް ޔުނިވާސިޓީގެ ދަރިވަރުން ވަނީ ވައިޓް ހައުސްއާ ދެކޮޅަށް މާޗުކޮށްފައެވެ. އަދި ނިއުޔޯކް ސިޓީގެ ބައެއް ވިޔަފާރިތަކުން ވަނީ އެ ދުވަހުގެ އާމްދަނީގެ އެއްބައި އިމިގްރޭޝަނާ ގުޅޭ ޖަމިއްޔާތަކަށް ހަދިޔާކުރަން ނިންމާފައެވެ.
މިކަމާ ގުޅޭގޮތުން ވާހަކަ ދައްކަވަމުން މެކަލެސްޓާ ކޮލެޖްގެ ޕްރޮފެސަރު ޑަޗަސް ހެރިސް ވިދާޅުވީ، އެމެރިކާގެ ތާރީޚުގައި ބޮޑެތި އިސްލާހީ ބަދަލުތައް އައިސްފައިވަނީ މިފަދަ ދެކޮޅުވެރިވުންތަކާއި މަދަނީ އިހުތިޖާޖުތަކުގެ ތެރެއިން ކަމަށެވެ.