އުރީދޫ ނޭޝަންގެ 2026 ވަނަ އަހަރުގެ ފުރަތަމަ މުބާރާތުގައި ރަޖިސްޓްރީވުމުގެ ފުރުސަތު ހުޅުވާލައިފިއެވެ.
އުރީދޫން ބުނި ގޮތުގައި، އުރީދޫ ނޭޝަންއިން މި އަހަރު ރަސްމީކޮށް ފަށުމަށް ހަމަޖެހިފައިވަނީ އޯޕަން ސީރީޒް ސީޒަން 1 އާއެކުގައެވެ. އަދި މިހާރު ވަނީ އޯޕަން ސީރީޒް ސީޒަން 1ގެ ކްލޭޝް ރޯޔާލް އަދި އީއޭއެފްސީ އަލްޓިމޭޓް ޓީމްގައި ބައިވެރިވުމަށް ފުރުސަތު ހުޅުވާލައިފައެވެ.
އެ މުބާރާތްތަކަކީ ދިވެހި ގޭމް ކުޅުންތެރިންނަށް ވަރަށް ފޯރިގަދަ ފެށުމަކަށް ވާނެ ކަމަށް އުރީދޫން ބުންޏެވެ. އެ މުބާރާތުގެ ތަފުސީލަށް ބަލާއިރު:
ކްލޭޝް ރޯޔަލް - އޯޕަން ސީރީޒް ސީޒަން 1
• އިނާމު ޕޫލް: 5،000 ރުފިޔާ
• ފޯމެޓް: އޮންލައިން
• ރަޖިސްޓްރޭޝަންގެ ސުންގަޑި: 3 ފެބްރުއަރީ 2026, 11:59
• މުބާރާތް ފަށާ ތާރީޚް: 6 ފެބްރުއަރީ 2026
ރަޖިސްޓްރޭޝަން ފީ: 50 ރުފިޔާ
އީއޭއެފްސީ އަލްޓިމޭޓް ޓީމް - އޯޕަން ސީރީޒް ސީޒަން 1
• އިނާމު ޕޫލް: 5،000 ރުފިޔާ
• ފޯމެޓް: އޮންލައިން
• ރަޖިސްޓްރޭޝަންގެ ސުންގަޑި: 12 ފެބްރުއަރީ 2026, 11:59
• މުބާރާތް ފަށާ ތާރީޚް: 16 ފެބްރުއަރީ 2026
ރަޖިސްޓްރޭޝަން ފީ: 50 ރުފިޔާ
އުރީދޫ ނޭޝަންގެ އޯޕަން ސީރީޒްގައި، އެކަމަށް ޚާއްސަކޮށްފައިވާ ވެބްސައިޓް މެދުވެރިކޮށް ރަޖިސްޓްރީ ކުރެވޭނެއެވެ.
އުރީދޫން ބުނި ގޮތުގައި، އޯޕަން ސީރީޒް މުބާރާތްތަކަކީ ރާއްޖޭގެ އެކި ކަންކޮޅުތަކުގައި ތިބި ގޭމް ކުޅުންތެރިނަނަށް އެ މީހުންގެ ހުނަރު ދައްކާލުމަށާއި، ގޭމިން ކޮމިއުނިޓީގައި ގުޅުން ބަދަހިކުރުމަށާއި، ވާދަވެރި ޕްލެޓްފޯމްތައް ފަހިކޮށްދިނުމުގެ ގޮތުން ބާއްވާ މުބާރާތެކެވެ.
އުރީދޫ ނޭޝަންގެ އެ މުބާރާތްތައް އޮންލައިންކޮށް ބޭއްވުމުގެ މަގުޞަދަކީ ހުރިހާ އަތޮޅެއްގެ ކުޅުންތެރިންނަށް ހަމަހަމަ އުސޫލުން ބައިވެރިވުމުގެ ފުރުސަތު ފަހިކޮށްދިނުން ކަމަށް އެ ކުންފުނިން ބުންޏެވެ.
އުރީދޫން ވަނީ، އީ-ސްޕޯޓްސް މެދުވެރިކޮށް ޑިޖިޓަލް ހުނަރުވެރިން ކުރިއަރުވައި ޒުވާނުންނަށް ފުރުސަތުތައް ފަހިކޮށްދިނުމުގައި އުރީދޫ ނޭޝަންއިން މުހިންމު ދައުރެއް އަދާކުރަމުން އަންނަކަން ފާހަގަކޮށްފައެވެ. އެ އޯޕަން ސީރީޒަކީ އުރީދޫގެ ޑިޖިޓަލް ކޮމިއުނިޓީއެއް ބިނާކޮށް، ޓެކްނޮލޮޖީ، ކަނެކްޓިވިޓީ އަދި އީޖާދީ އުފެއްދުންތަކުގެ ތެރެއިން އަންނަން އޮތް ޖީލު ބާރުވެރިކުރުވުމަށް އުރީދޫއިން ގެންގުޅޭ ތަސައްވުރެއް ކަމަށް އެ ކުންފުނިން ބުންޏެވެ.