ވައިގެ މަގުން ދެކުނުގެ ހަތަރު އެއާޕޯޓު ގުޅާލުމުން ދެކުނުގެ ފަތުރުވެރިކަމާއި އިގުތިސާދަށް ދިރުން އަންނާނެ ކަމަށް ޓްރާންސްޕޯޓު މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.
ގައުމީ އެއާލައިން މޯލްޑިވިއަނުން ހާމަކުރި ގޮތުގައި ދެކުނުގެ ހަތަރު އަތޮޅު ކަމަށްވާ ގއ އަތޮޅު، ގދ އަތޮޅު، ފުވައްމުލަކު ސިޓީ އަދި އައްޑޫ ސިޓީ އެ އެއާލައިންގެ ދަތުރުތަކުން ވަނީ ގުޅާލާފައެވެ. އެ ދަތުރުތައް އަންނަ މަހު ފަށާނެއެވެ.
ދެކުނުގެ ހަތަރު އަތޮޅު ރަސްމީކޮށް ގުޅާލުމުގެ މަޝްރޫއު ފެށީ އައްޑޫ ސިޓީ އެއާޕޯޓުގައި މިއަދު ހަވީރު ބޭއްވި ރަސްމިއްޔާތުގައި މިނިސްޓަރު އަމީން ވިދާޅުވީ، މި ޚިދުމަތުގެ ސަބަބުން ދެކުނުގެ އަތޮޅުތަކަށް ދިރުން އަންނާނެ ކަމަށެވެ. ޚާއްސަކޮށް ދެކުނުގެ ފަތުރުވެރިކަމަށް ދިރުން އަންނާނެ ކަމަށް އޭނާ ވިދާޅުވިއެވެ.
"ދެކުނުގެ އަތޮޅުތަކުގައި މިހާރު ހުރި ގާތްގަނޑަކަށް 3،900 ވަރަކަށް އެނދަށް ވާސިލުވާން ފަތުރުވެރިންނަށް މި ވަނީ ފަސޭހަ ފުރުސަތުތަކެއް ތަނަވަސްވެފައި،" އޭނާ ވިދާޅުވިއެވެ.
އަމީން ވިދާޅުވީ، ޑައިވްކުރުމާއި ރާޅާއެޅުން އަދި އެ ނޫން ވެސް ކަންކަމަށް ރާއްޖެ ޒިޔާރަތްކުރާ ފަތުރުވެރިންނަށް މި ޚިދުމަތުގެ ސަބަބުން ގަމުން ދެކުނުގެ އެހެން އަތޮޅުތަކަށް ދަތުރުކުރަން ލުއިވާނެ ކަމަށެވެ. މިއީ އެ ފަތުރުވެރިންނަށް ވެސް ލިބޭ ރަނުގެ ފުރުސަތެއް ކަމަށް އޭނާ ވިދާޅުވިއެވެ.
މީގެ އިތުރުން ވެސް އަމީން ވަނީ އައްޑޫ ގޭން އިންޓަނޭޝަނަލް އެއާޕޯޓުގެ ހާލަތު ބަދަލުކުރައްވާނެ ކަމަށް ވިދާޅުވެފައެވެ.
"މި ވަގުތު ވެސް އަޅުގަނޑުމެން މި ގެންދަނީ ސަރުކާރުން މެދުއިރުމަތީގެ އެއާލައިނަކާއި ޗައިނާގެ އެއާލައިނެއް އައްޑޫ އިންޓަނޭޝަނަލް އެއާޕޯޓަށް ގެނައުމަށް މަސައްކަތްކުރަމުން. ބޮޑެތި ކޮންސެޝަންތަކެއް ދީގެން ނަމަވެސް އެއާލައިންތައް ގޭން އިންޓަނޭޝަނަލް އެއާޕޯޓަށް ގެންނަން އެބަޖެހޭ،" އޭނާ ވިދާޅުވިއެވެ.
"އިރާދަކުރެއްވިއްޔާމުން އަޅުގަނޑުމެން މި އެއާޕޯޓުގެ ހާލަތު ބަދަލުކުރާނަން،"
މިނިސްޓަރު ވިދާޅުވީ، އަމާޒަކީ ގޭން އިންޓަނޭޝަނަލް އެއާޕޯޓަކީ ދެކުނުގެ ވައިގެ ދަތުރުފަތުރުގެ ހަބަކަށް ހެދުން ކަމަށެވެ. އެ ގޮތުން، މިއަދު ރަސްމީކޮށް އިފުތިތާހުކުރި ދެކުނުގެ ހަތަރު އަތޮޅު ގުޅާލާ މަޝްރޫއުގެ މައި މަރުކަޒަކީ ވެސް ގޭން އެއާޕޯޓުކަން އޭނާ ފާހަގަކުރެއްވިއެވެ.
މިއީ ރައީސް ޑރ. މުހައްމަދު މުއިއްޒު، އެއާޕޯޓު އެޅުމުގެ ބަދަލުގައި ކުދި މަތިންދާބޯޓުތަކަށް ރަށްރަށަށް ޖެއްސޭނެ ގޮތެއް ހޯދަން ސަރުކާރުން ދިރާސާކުރަމުންދާ ކަމަށް މި ފަހުން ވިދާޅުވެފައިވަނިކޮށް ފަށާ ޚިދުމަތެކެވެ.
އެ ގޮތުން ފުރަތަމަ ދަތުރުތައް ފަށާކަމަށް އިއުލާނުކުރި ދެކުނުގެ ހަތަރު އަތޮޅުތަކަށް ދަތުރުކުރާ އަގުތަކަކީ:
- ގަން - ފުވައްމުލަކު: ކޮޅަކަށް 500 ރުފިޔާ
- ގަން - ކާޑެއްދޫ: ކޮޅަކަށް 900 ރުފިޔާ
- ގަން - ކޫއްޑޫ: ކޮޅަކަށް 900 ރުފިޔާ
- ފުވައްމުލަކު - ކާޑެއްދޫ: ކޮޅަކަށް 650 ރުފިޔާ
- ފުވައްމުލަކު - ކޫއްޑޫ: ކޮޅަކަށް 650 ރުފިޔާ
މޯލްޑިވިއަންއިން ބުނީ މިހާރު އެ ދަތުރުތަކުގެ ބުކިންއަށް ހުޅުވާލާފައިވާ ކަމަށެވެ.
މި ޚިދުމަތަށް ބޭނުންކުރާނީ ޑީއެޗްސީ-6-300 ޓްވިން އޮޓާ ބޯޓެވެ. މި ބޯޓުތަކުގައި ގާތްގަނޑަކަށް 15 ވަރަކަށް މީހުންނަށް ދަތުރުކުރެވޭނެއެވެ.
މި ޚިދުމަތުގެ ބޭނުމަކީ ދެކުނުގެ އަތޮޅުތައް ގުޅާލައި، ސަރަހައްދީ ދަތުރުފަތުރު ހަރުދަނާކުރުމެވެ.