މަރުކަޒީ ބޭންކް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ވެރިޔާގެ މަގާމުގައި ހުއްޓާ ސަސްޕެންޑުކުރި އިސްމާއިލް ސާޖިދު، މަގާމުން ވަކިކުރަން ނިންމައިފިއެވެ.
ސާޖިދު އެފްއައިޔޫގެ ވެރިޔާގެ މަގާމަށް އައްޔަންކުރީ މިދިޔަ އޮގަސްޓު މަހެވެ. ނަމަވެސް މިދިޔަ ޑިސެންބަރު މަހުގެ ފަހު ހަފުތާގެ ތެރޭގައި، ޖިންސީ ފުރައްސާރައިގެ ތުހުމަތުގައި އޭނާ ސަސްޕެންޑުކުރިއެވެ.
"ސަން"އަށް މައުލޫމާތު ލިބިފައިވާ ގޮތުގައި، އެމްއެމްއޭގައި އެ މައްސަލަ ބެލި ކޮމިޓީން ވަނީ ސާޖިދު ޖިންސީ ފުރައްސާރަ ކުރި ކަމަށް ސާބިތުވާ ކަމަށް ނިންމައިފައެވެ. އަދި އެކަމުގެ އަދަބެއްގެ ގޮތުން، އޭނާ މަގާމުން ވަކިކުރަން ފެންނަ ކަމަށް ވެސް އެ ކޮމިޓީން ވަނީ ނިންމައިފައެވެ.
މި ނޫހަށް އެނގިފައިވާ ގޮތުގައި، ކޮމިޓީގެ އެ ނިންމުން އެމްއެމްއޭގެ މެނޭޖްމެންޓަށް މިއަދު އެންގުމާއެކު، ވަގުތުން ނިންމުން ތަންފީޒުކޮށް، ސާޖިދު ވަނީ މަގާމުން ވަކިކޮށްފައެވެ.
އެ މައްސަލައިގައި މީގެ ކުރިން "ސަން"އިން ސާޖިދުގެ ބަހެއް ހޯދަން މަސައްކަތް ކުރި ނަމަވެސް، އެ ތުހުމަތުތަކާ ގުޅޭގޮތުން ވަކި އެއްޗެއް ވިދާޅުވާން ސާޖިދު ބޭނުންފުޅެއް ނުވިއެވެ.
މި ނޫހުން އެމްއެމްއޭގެ ބަހެއް ހޯދަން މަސައްކަތް ކުރި ނަމަވެސް، ލިބިފައިނުވެއެވެ.
ސާޖިދު އެފްއައިޔޫގެ ވެރިއަކަށް އައްޔަން ކުރެއްވީ, ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު, އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭ, ފައިނޭންޝިއަލް އިންޓެލިޖެންސް ރިޕޯޓެއް ލީކް ވެފައި ވަނިކޮށް, އެފްއައިޔޫގެ އޭރުގެ ވެރިއަކަށް ހުންނެވި އަބްދުﷲ އަޝްރަފް, މަގާމުން ދުރުކޮށްފައެވެ.
އަޝްރަފު ފަހުން ވަނީ ހެޑް އޮފް ރިސްކް އެންޑް ކޮމްޕަޔަލަންސަށް ބަދަލުކޮށްފައެވެ.
އެފްއައިޔޫއަކީ ބޭންކްތަކުގެ ތެރޭގައި ހިންގާ މާލީ އެކިއެކި މުއާމަލާތްތަކަށް ފާރަވެރިވެ, ޝައްކު ކުރެވޭ މުއާމަލާތްތަކުގެ މައްސަލަތައް ބަލަން ކަމާ ބެހޭ އިދާރާތަކަށް އަންގާ މުހިންމު އިދާރާއެކެވެ. އޭގެ ތެރޭގައި ކޮރަޕްޝަނާއި މަނީލޯންޑަރިންނާއި އެކިއެކި ކުށްކޮށްގެން ހޯދާ ފައިސާގެ މައްސަލަތައް ބެލުން ހިމެނެއެވެ.