ބޮލީވުޑްގެ ބައެއް ފިލްމުތަކުން ފެނިފައިވާ ބަތަލާ އަދި ޓެލެވިޒަން ޕާސަނަލިޓީ އަރުޗަނާ ޕުރަން ސިންގް ކައިވެނިކޮށްގެން އުޅޭކަން ހަތަރު އަހަރު ވަންދެން އެއްވެސް ބަޔަކަށް ނާންގާ އުޅުނު ކަމަށް ބުނެފިއެވެ.
އެކްޓަރު ޕަރުމީތު ސެތީއާ ކައިވެނި ކުރީ ދެ މީހުންގެ ވެސް ފިލްމީ ކެރިއަރުގެ ވަރަށް ކުރީކޮޅުގައި ކަމަށާއި އޭރު ކައިވެނިކޮށްގެން އުޅޭ ފިލްމީ ތަރިންނާ އެކު މަސައްކަތްކުރަން ވަރަށް ގިނަ ޕްރޮޑިއުސަރުން ޖެހިލުންވި ކަމަށް އަރްޗަނާ ވަނީ ބުނެފައެވެ.
ހާއްސަކޮށް ކައިވެނިކޮށްގެން އުޅޭ އަންހެނުންނަށް ފިލްމީ ދާއިރާއިން ކުރިއަށް ދިއުމުގައި ގޮންޖެހުންތަކާ ކުރިމަތިލާން އޭރު ޖެހުނު ކަމަށާއި އެއީ އޭރު ގިނަ ބަޔަކު ގެންގުޅުނު އެއްވެސް ތާކުންތާކު ނުޖެހޭ ވިސްނުމެއްގެ ގޮތުގައި ބަތަލާ ވަނީ ސިފަކޮށްފައެވެ.
ހާއްސަކޮށް ޕަރްމީތު އަރްޗަނާއަށް ވުރެ އުމުރުން ހަގު ވުމުން އެއީ ވެސް ކައިވެނި ސިއްރެއްގެ ގޮތުގައި ބޭއްވުމަށް ގިނަބަޔަކު ލަފާދީ ޕްރެޝަރުކުރި ސަބަބެއް ކަމަށް އަރްޗަނާ ވަނީ ބުނެފައެވެ.
އަރްޗަނާ ފިރިމީހާ ޕަރްމީތުއާ އެކު--ފޮޓޯ/އިންޑިއަންއެކްސްޕްރެސް
އަރްޗަނާ އާއި ޕަރްމީތު ގުޅިގެން މިހާރު ޔޫޓިއުބް ޗެނަލެއް އުފައްދާ ކޮންޓެންޓްތައް އުފައްދަމުން އަންނައިރު އަރްޗަނާގެ އާއިލާއިން ގެނެސްދޭ ކޮންޓެންޓްތައް ވަރަށް ގިނަ ބަޔަކަށް ކަމުދެއެވެ.
އަރުޗަނާ އަކީ އިންޑިއާގެ މަޝްހޫރު ކޮމީޑިއަން/އެކްޓަރު ކަޕިލް ޝަރުމާ ގެނެސްދެމުން އަންނަ "ދަ ގްރޭޑް އިންޑިއަން ކަޕިލް ޝޯ"ގެ ޓީމުގައި ވެސް މަސައްކަތް ކުރަމުން އަންނަ ފަންނާނެކެވެ.
އަރްޗަނާ މުހިއްމު ރޯލްތައް ކުޅުނު މަގުބޫލު ފިލްމުތަކުގެތެރޭ "ސައުދާގަރު"، "ޝޯލާ އޯރް ޝަބްނަމް"، "އާޝިޤް އާވާރާ"، "ރާޖާ ހިންދުންސްތާނީ" އަދި ފިލްމު "ކުޗް ކުޗް ހޯތާ ހޭ" ހިމެނެއެވެ.