ދެކުނު ކޮރެއާގައި ވިހެއި މިންވަރު މިދިޔަ އަހަރު އިތުރުވެއްޖެ

ދެކުނު ކޮރެއާގައި ވިހެއި މިންވަރު މިދިޔަ އަހަރު އިތުރުވެއްޖެއެވެ.

އެ ގައުމުގެ ސްޓެޓިސްޓިކްސް މިނިސްޓްރީން އާންމުކުރި ތަފާސް ހިސާބުތަކުން ދައްކާ ގޮތުގައި މިއީ ވޭތުވެދިޔަ 18 އަހަރު ތެރޭގައި ވިހެއުމުގެ އަދަދު އެންމެ ބޮޑަށް އިތުރުވި އަހަރެވެ.

ވިހެއި މިންވަރު އިތުރުވެފައި ވަނީ މިދިޔަ ކުރި ކައިވެނިތަކުގެ އަދަދު އިތުރުވުމުން ކަމަށްވެސް އެ މިނިސްޓްރީން ބުނެއެވެ.

އިއްޔެ އާންމުކުރި ތަފާސް ހިސާބުތަކުން ދައްކާ ގޮތުގައި 2025 ވަނަ އަހަރުގެ ޖެނުއަރީ މަހުން ނޮވެމްބަރު މަހުގެ ނިޔަލަށް 233،708 ކުދިން އުފަންވެފައިވާއިރު، މިއީ އޭގެ ކުރީ އަހަރާ އަޅާބަލާއިރު 6.2 ޕަސެންޓް އިތުރުވުމެކެވެ.

ކަމާބެހޭ ފަރާތްތަކުން ލަފާކުރާ ގޮތުގައި މުޅި އަހަރުގެ ޖުމްލަ އަދަދު 238،000 އަށް ވުރެ މައްޗަށް އަރާނެއެވެ.

ނޮވެމްބަރު މަހު އެކަނިވެސް ވިހެއުމުގެ އަދަދު 20،710 އަށް އަރާފައިވާއިރު، މިއީ އޭގެ ކުރީ އަހަރާ އަޅާބަލާއިރު 3.1 ޕަސެންޓް އިތުރު އަދަދެކެވެ.

ދެކުނު ކޮރެއާގެ ޖުމްލަ ދަރިމައިވުމުގެ ނިސްބަތް ކަމަށްވާ އަންހެނެއްގެ އުމުރުގައި ލިބޭނެ ކަމަށް ބެލެވޭ އެވްރެޖް ކުދިންގެ އަދަދު ނޮވެމްބަރު މަހު 0.79 އަށް އަރާފައިވާއިރު، މިއީ މީގެ އަހަރެއްހާ ދުވަސް ކުރިއާ އަޅާބަލާއިރު ތަންކޮޅެއް އިތުރު އަދަދެކެވެ.

އޮފިޝަލުން ވިދާޅުވާ ގޮތުގައި ވިހެއުމުގެ އަދަދު އިތުރުވެފައި ވަނީ ކައިވެނިތައް ދެމެހެއްޓެނިވި ގޮތެއްގައި އިތުރުވުމާއި، ވިހެއުމަށް ސަރުކާރުން ދޭ އެހީތެރިކަން ފުޅާވުމާއި، އުމުރުން 30 އަހަރުގެ އަންހެނުންގެ އަދަދު އިތުރުވުމެވެ.

މީގެ އަހަރެއްހާ ދުވަސް ކުރިއާ އަޅާބަލާއިރު ނޮވެމްބަރު މަހު ކައިވެނި 2.7 ޕަސެންޓް އިތުރުވެ 19،079 އަށް އަރާފައިވާއިރު، މިއީ ވިދިވިދިގެން ކައިވެނިތައް އިތުރުވަމުން އަންނަތާ 20 ވަނަ މަސް ކަމަށް ހިސާބުތަކުން ދައްކައެވެ. ވަރި ކުރާ މިންވަރު ވަނީ 9.8 ޕަސެންޓަށް ދަށްވެފައެވެ.

އުފަންވާ ކުދިންގެ އަދަދު އިތުރުވި ނަމަވެސް ދެކުނު ކޮރެއާގައި މަރުވި މީހުންގެ އަދަދު އިތުރުވެފައިވާތީ، އެ ގައުމުގެ އާބާދީ ދަށްވެފައިވާ ކަމަށްވެސް ތަފާސް ހިސާބުތަކުން ދައްކައެވެ.