ބޮކްސް އޮފީހުގައި މިހާރު ބޮޑު ކާމިޔާބީއެއް ހޯދަމުން އަންނަ ފިލްމު "ބޯޑާ 2"އަށް ލިބެމުން އަންނަ ހޫނު ތަރުހީބާއެކު އެ ސީރީސްގެ ތިންވަނަ ބައެއް ވެސް އުފައްދާނެކަން އިއުލާނުކޮށްފިއެވެ.
ބުޝަން ކުމާރުގެ ޓީ-ސީރީސްއާއި ޖާޕީ ފިލްމްސް ގުޅިގެން ނިދީ ދައްތާ ޑައިރެކްޓްކޮށް ގެނެސްދިން "ބޯޑާ 2"އަށް ހީކުރި ވަރަށްވުރެ ވެސް މާބޮޑު ތަރުހީބެއް އަންނަނީ ލިބެމުންނެވެ.
އެގޮތުން ފިލްމު ރިލީޒްކުރިތާ އެންމެ ތިން ދުވަސްތެރޭ ބޮކްސް އޮފީހުގެ 100 ކްރޯޑު ކްލަބުން ފިލްމު ޖާގަ ހޯދުމަކީ ބެލުންތެރިން އެފަދަ އިތުރު ފިލްމަކަށް އިންތިޒާރުކުރާކަމުގެ އިޝާރާތެއް ކަމަށް ޖޭޕީ ފިލްމްސްއާ ހަވާލާދީ މީޑިއާތަކުން ވަނީ ބުނެފައެވެ.
ފިލްމު "ބޯޑާ 2"ގެ ކާސްޓުން ފިލްމުގެ ޕްރޮޑަކްޝަން ޓީމާ އެކު-- ފޮޓޯ/ ޓެލެގްރާފްއިންޑިއާ
ފިލްމު "ބޯޑާ 2" އަކީ 1997 ވަނަ އަހަރު ޖޭޕީ ދައްތާ ޑައިރެކްޓްކޮށް ގެނެސްދިން ވަރަށް ކާމިޔާބު ތާރީޚީ ފިލްމެކެވެ. ޓީ-ސީރީސްއާއި ޖޭޕީ ފިލްމްސް ގުޅިގެން ގެނެސްދިން "ބޯޑާ 2"އަށް ލިބެމުން އަންނަ ތަރުހީބާއެކު، ދެ ސްޓޫޑިއޯ ގުޅިގެން މުސްތަގްބަލްގައި އެފަދަ އިތުރު ޕްރޮޖެކްޓްތައް ގެނެސްދިނުމުގެ މަސައްކަތް ކުރާނެކަން އިއުލާނުކުރި ނަމަވެސް އެއާ ބެހޭ އިތުރު މައުލޫމާތެއް ހިއްސާކޮށްފައެއް ނުވެއެވެ.
މިދިޔަ ހުކުރު ދުވަހު ސިނަމާތަކަށް ގެނެސްދިން ފިލްމު "ބޯޑާ 2" ގެ ކާސްޓުގައި ހިމެނޭ މުހިއްމު ތަރިންގެތެރޭ ސަނީ ޑިއޯލް، ވަރުން ދަވަން، އަހާން ޝެޓީ، ދިލްޖީތު ދޮސާންޖް، މޯނާ ސިންގް، ސޯނަމް ބާޖްވާ، އާނިއާ ސިންގްގެ އިތުރުން އެ ފިލްމުން އަލަށް ފިލްމު އިންޑަސްޓްރީއަށް ތައާރަފްވި ބަތަލާ މޭދާ ރާނާ ހިމެނެއެވެ.