މާލެ ސިޓީގެ މަގުތަކާއި، ގޯޅިތަކާއި ހުސްބިންތަކަށް ކުނި އެޅުމުގެ 12,652 މައްސަލައަކަށް މިދިޔަ އަހަރު މާލެ ސިޓީ ކައުންސިލުން އެޓެންޑްވެފައިވާކަަމަށް އެ ކައުންސިލުން ބުނެފިއެވެ.
ސިޓީ ކައުންސިލްގެ ކޮމިއުނިޓީ އެންގޭޖްމަންޓް ޔުނިޓުން އާންމުކުރި ރިޕޯޓުގައިވާ ގޮތުން، މިދިޔަ އަހަރުގެ ޖެނުއަރީ އެކަކުން 31 ޑިސެމްބަރުގެ ނިޔަލަށް ޖުމްލަ 31,131 މައްސަލައަކަށް އެ ޔުނިޓުން ވަނީ ޖަވާބުދާރީވެފައެވެ. މީގެ ތެރެއިން 29,350 މައްސަލަ އެއްކޮށް ނިންމާފައިވާއިރު، މައްސަލައިގެ ބާވަތުން އިތުރަށް ފޮލޯއަޕް ހަދަންޖެހޭ 1,781 މައްސަލައެއް ހިމެނެއެވެ. އަދި ގަވާއިދާ ހިލާފުވި 874 ފަރާތަކަށް ނަސޭހަތް ދީފައިވާއިރު، 483 ފަރާތެއް ވަނީ ޖޫރިމަނާކޮށްފައެވެ.
ތަފާސްހިސާބުތަކުން ދައްކާގޮތުގައި ކައުންސިލުން އެންމެ ގިނައިން އެޓެންޑްވެފައިވަނީ ކުނި މެނޭޖްކުރުމާ ގުޅޭ މައްސަލަތަކަށެވެ. އެގޮތުން މަގުތަކާއި، ގޯޅިތަކާއި ހުސްބިންތަކަށް ކުނި އެޅުމުގެ 12,652 ޝަކުވާއަށް އެޓެންޑުވިއެވެ.
ދެވަނައަށް އެންމެ ގިނައީ އާންމު ރައްކާތެރިކަމާ ގުޅޭ މައްސަލަތަކެވެ. އެގޮތުން މިސްކިތްތަކާއި، މައިޒާންތައް އަދި ޕާކުތައް ބަލައި ޗެކްކުރުމުގެ 8,557 މައްސަލައެއް ވަނީ ބަލާފައެވެ. އަދި މަގުތަކުގެ ޕޭޕްމަންޓާއި، ކާނުތަކާއި، ގައުތައް ނޫނީ ތާރުތައް ނެއްޓި ހަލާކުވެފައި ހުރުމުގެ 1,133 މައްސަލައަކަށް ވަނީ އެޓެންޑްވެފައެވެ.
އާންމު ޝަކުވާތަކުގެ ތެރޭގައި ފުރާޅުން ނުވަތަ ދިޔަދޮވިން އަދި އެއާ ކޮންޑިޝަން އައުޓްޑޯ ޔުނިޓުތަކުން މަގުމައްޗަށް ފެން ލީކުވުމުގެ 1,131 ޝަކުވާއެއް ރިޕޯޓްކޮށްފައިވެއެވެ.
މާލެ ސިޓީގެ މޭޔަރުކަމާ އާދަމް އާޒިމް ހަވާލުވެވަޑައިގެންނެވި ފަހުން، މިފަދަ މައްސަލަތައް ހައްލުކުރުމަށް އެކި ކަންކަން އަންނަނީ ކުރައްވަމުންނެވެ.
އެގޮތުން އަމަލީގޮތުން މިފަދަ ސަރަހައްދުތަކަށް އާޒިމް ޒިޔާރަތްކުރައްވައި، މަސައްކަތްތައް ކުރިއަށްދާ ގޮތް ބައްލަވަމުން ގެންދަވާކަން ފާހަގަކުރެވެއެވެ.