މަތިންދާ ބޯޓެއް ޖައްސަން އުޅުމުގެ ތެރޭގައި ވެއްޓި އިންޑިއާގެ މަހާރާޝްތްރާގެ ޑެޕިއުޓީ ޗީފް މިނިސްޓަރު އަޖިތު ޕަވާރު އަވަހާރަވެއްޖެއެެވެ.
މިއަދު ހެނދުނުގެ ވަގުތެއްގައި އިންޑިއާގެ ޕޫނޭ ޑިސްޓްރިކްޓްގައި ހިނގި އެ ހާދިސާގައި އުމުރުން 66 އަހަރުގެ އަޖިތުގެ އިތުރުން އިތުރު ހަތަރު މީހަކު މަރުވެފައިވާ ކަމަށް އިންޑިއާގެ ނޫސްތަކުން ބުނެއެވެ. ނަމަވެސް އެކަން ރަސްމީ އެއްވެސް އިދާރާއަކުން ކަށަވަރުކޮށްދީފައެއްނުވެއެވެ.
އެންމެ ފަހުގެ ރިޕޯޓްތައް ބުނާ ގޮތުން ބޯޓު ކޮންޓްރޯލް ނުވެ ވެއްޓުނީ މަހާރާޝްތްރާގެ ސިޓީއެއް ކަމަށްވާ، ބަރަމަތީގެ އެއާޕޯޓަށް ޖައްސަން އުޅެނިކޮށެވެ. ވެއްޓުމާއެކު ބޯޓުގައި ވަނީ އަލިފާން ރޯވެފައެވެ.
އެ ބޯޓުގައި އަޖިތު ޕަވާރުގެ ޕާސަނަލް ސެކްރެޓަރީ އާއި އެޓެންޑެންޓަކާއި ދެ ފަޅުވެރިން ވެސް ތިއްބެވެ.
އަޖިތު ޕަވާރު, ބަރަމަތީ ސިޓީއަށް ދިއުމަށް މުމްބާއީން ފުރާވަޑައިގެންނެވީ މިއަދު ހެނދުނު 8 ޖެހިއިރު ކަމަށާއި އެތަނުގައި އޭނާ ތަގުރީރު ކުރައްވަން ހަމަޖެހިފައިވާ ކަމަށްވެސް އެންޑީޓީވީ ނޫހުން ރިޕޯޓުކޮށްފައިވެއެވެ.
ޗާޓާކޮށްފައިވާ ވެއްޓުނު ބޯޓަކީ ވީއެސްއާރު ވެންޗާސްގެ ބޯޓެކެވެ. އެ ކުންފުނީގެ މަތިންދާބޯޓެއް 2023 ވަނަ އަހަރުގެ ސެޕްޓެމްބަރު މަހުވެސް ވަނީ ވެއްޓިފައެވެ.
ސިޔާސީ އާއިލާއަަކަށް އުފަންވެވަޑައިގެން އަޖިތު ޕަވާރު ސިޔާސީ ދާއިރާއަށް ނުކުމެވަޑައިގަތީ 1982 ވަނަ އަހަރުއެވެ. އޭނާ ފުރަތަމަ ފަހަރަަށް އިންޑިއާގެ ގާނޫނު ހަދާ މަޖިލީހަށް އިންތިޚާބުވެވަޑައިގަތީ 1991 ވަނަ އަހަރުއެވެ.