ދެ ބިލިއަން މީހުންނަށް ފްރީ ޓްރޭޑް ޒޯންއެއް އުފައްދަން، އިންޑިއާއާއި ޔޫރަޕުން އެއްބަސްވުމަކަށް

ދެ ބިލިއަނެއްހާ މީހުންގެ އާބާދީ ގުޅުވާލަދޭނެ މިނިވަން ވިޔަފާރީގެ ސަރަހައްދެއް އުފެއްދުމަށް އިންޑިއާ އާއި ޔޫރަޕިއަން ޔޫނިއަން އެއްބަސްވެފައިވާ ކަމަށް, ޔޫރަޕިއަން ކޮމިޝަންގެ ރައީސް އާސަލާ ވޮން ޑަ ލޭން އާއި އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.

އަންގާރަ ދުވަހު އެކްސްގައި ކުރެއްވި ޕޯސްޓެއްގައި އާސަލާ ވިދާޅުވީ ދެ ގައުމުން މިއަދު ތާރީޚީ އެއްބަސްވުމެއް ގާއިމުކޮށްފައިވާ ކަމަށެވެ.

އާސަލާ އެކަން އިއުލާނުކުރެއްވީ އިންޑިއާގެ ޖުމްހޫރީ ދުވަހުގެ ރަސްމިއްޔާތުގެ ޝަރަފުވެރި މެހެމާނުންގެ ގޮތުގައި ބައިވެރިވެ ވަޑައިގަތުމަށް ފަހު ނެރުއްވި ބަޔާނެއްގައެވެ.

"އަޅުގަނޑުމެން މިވަނީ ދެ ބިލިއަން މީހުންގެ ފްރީ ޓްރޭޑް ޒޯނެއް އުފައްދާފައި، ދެ ފަރާތަށް ވެސް ފައިދާ ލިބޭނެ ގޮތަށް ހަމަޖެހިފައި." އާސަލާ އިތުރަށް ވިދާޅުވިއެވެ.

މޯދީ ވިދާޅުވީ، އެ އެއްބަސްވުމުގެ ސަބަބުން އިންޑިއާގެ 1.4 ބިލިއަން މީހުންނަށާއި އީޔޫގެ އެތައް މިލިއަން ރައްޔިތުންނަށް ގިނަ ފުރުސަތުތަކެއް ލިބޭނެ ކަމަށެވެ.

އެއީ ދުނިޔޭގެ ޖީޑީޕީގެ 25 ޕަސެންޓް ނުވަތަ މުޅި ދުނިޔޭގެ ވިޔަފާރީގެ ތިން ބައިކުޅަ އެއް ބައިކަން ވެސް މޯދީ ފާހަގަކުރެއްވިއެވެ.

އޭގެ އިތުރުން، އެ އެއްބަސްވުމުގެ ދަށުން، ޔޫރަޕްގެ އެކްސްޕޯޓްގެ 97 ޕަސެންޓުން ނަގާ ޓެރިފް ކުޑަވެ ނުވަތަ އެއްކޮށް އުނިވެގެން ދާނެއެވެ. އަދި މިކަމުގެ ސަބަބުން އީޔޫއަށް އަހަރަކު ހަތަރު ބިލިއަން ޔޫރޯ ނުވަތަ 4.75 ބިލިއަން ޑޮލަރު ޑިއުޓީން ސަލާމަތް ކުރެވޭނެ ކަމަށް އީޔޫއިން ބުނެއެވެ.

ޓެރިފް އެއްކޮށް އުނިވާނެ އުފެއްދުންތަކުގެ ތެރޭގައި މެޝިނަރީތަކާއި ކެމިކަލްތަކާއި ބޭސްތައް ހިމެނެއެވެ.

އީޔޫއިން ބުނީ މި އެއްބަސްވުމުގެ ސަބަބުން، އިންޑިއާއަށް އެކްސްޕޯޓް ކުރާ މިންވަރު 2032 ވަނަ އަހަރުގެ ނިޔަލަށް ދެގުނައަށް އިތުރުވާނެ ކަމަށް ލަފާކުރާ ކަމަށެވެ.

މި އެއްބަސްވުމުގައި ރަސްމީކޮށް ސޮއިކުރާނީ ގާނޫނީ ގޮތުން ބަލަންޖެހޭ ކަންކަން ބެލުމަށް ފަހު ކަމަށް އިންޑިއާ ސަރުކާރުގެ އޮފިޝަލަކާ ހަވާލާދީ ރޮއިޓާސް ނިއުސް އެޖެންސީން ބުނެއެވެ. އަދި އެ އެއްބަސްވުން އަހަރެއްހާ ދުވަހުގެ ތެރޭގައި ތަންފީޒު ކުރެވޭނެ ކަމަށް ލަފާކުރެވޭ ކަމަށްވެސް އޮފިޝަލާ ހަވާލާދި އެ ނޫހުން ރިޕޯޓުކޮށްފައިވެއެވެ.

އިންޑިއާ އާއި އީޔޫއާ ދެމެދު ކުރި މުދަލުގެ ވިޔަފާރި މިހާރު ވެސް ގާތްގަނޑަކަށް 90 ޕަސެންޓް ކުރިއަރާފައިވާއިރު، 2024 ވަނަ އަހަރު 120 ބިލިއަން ޔޫރޯ (139 ބިލިއަން ޑޮލަރު) އަށް އަރާފައިވާ ކަމަށް އީޔޫގެ ތަފާސް ހިސާބުތަކުން ދައްކައެވެ.