އެމްއައިބީގެ މި އަހަރުގެ ކަލަންޑަރު ވަރަށް ތަފާތެވެ. އެއީ، މި ހިނގަމުންދާ ދުވަސްތަކެކޭ އެއްގޮތަށް، ދިވެހި ރަހަތަކާއި އެ ކެއުންތަކުގެ ތާރީޚަށް ވެސް ވާސިލުކޮށްދޭ ކަލަންޑަރަކަށް ވާތީއެވެ.
އެމްއައިބީގެ ކަލަންޑަރުގެ ކޮންމެ މަހަކަށް ވެސް ދިވެހި ކެއުމެއް ވަނީ ޚާއްސަކޮށްފައެވެ. އޭގެ ތެރޭގައި ހިމެނެނީ:
- އުތީމު ކަނަމަދު ރޮށި/ މެޓާ
- ދުވާފަރު މަޖާ
- އައްޑޫ ބެނޑި
- ވެލިދޫ މުރަނގަ ބަތް
- ލަންދޫ ކުއްޅަވަށް
- ލާމު ގޮޅަ ރިހަ
- އޭދަފުށީ ބަތްޕެން
- ދިއްދޫ ހިއްޗާއި ބަތް
- ދިއްގަރު ރިހާކުރު
- ފުވައްމުލަކު ކައްޓެޅި
- ކުޅުދުއްފުށީ ހާލުފޮޅި
- ހިންނަވަރު އަތުޖެހި
އެ ކަލަންޑަރުގެ ކޮންމެ މަހެއްގައި ވެސް، ކިއުއާރު ކޯޑެއް ހުންނާނެއެވެ. އެ ކިއުއާރު ކޯޑް ސްކޭން ކޮށްލުމުން، އެ މަހަށް ޚާއްސަކޮށްފައިވާ ކެއުމާ ގުޅޭ ވީޑިއޯއެއް، އެމްއައިބީގެ ޔޫޓިއުބް ޗެނަލުން ފެންނާނެއެވެ.
އެ ވީޑިއޯއިން އެ ކެއުންތަކުގެ ޚާއްސަކަމާއި، އެ ކެއުން ތައްޔާރު ކުރާ ގޮތް ވެސް ކިޔައިދޭނެއެވެ. އެ ވާހަކަތައް ކިޔައިދެނީ އެ ރަށްރަށުގެ ރައްޔިތުންނެވެ.
އެމްއައިބީގެ މަގުސަދަކީ މި ކަލަންޑަރާއެކު ދިވެހި ރަހަތަކާއި ސަގާފަތުގެ މުއްސަނދިކަން ފާހަގަކޮށް، ތާރީޚަށް އައު ދިރުމެއް ގެނެސްދިނުމެވެ.