އިންޑިއާގެ އަމިއްލަ ސްމާޓްފޯން ބްރޭންޑްތަކެއް ކުރިއަށް އޮތް 18 މަސް ތެރޭގައި ބާޒާރަށް ނެރޭނެ ކަަމަށް އެ ގައުމުން ބުނެފިއެވެ.
އިންޑިއާގެ އިލެކްޓްރޯނިކްސް އަދި އައިޓީ މިނިސްޓަރު އަޝްވިނީ ވައިޝްނޯ ވިދާޅުވި ގޮތުގައި، ކުރިއަށް އޮތް 12 މަހާއި 18 މަސްދުވަހުގެ ތެރޭގައި ދުނިޔޭގެ ބޮޑެތި ކުންފުނިތަކާ ވާދަކުރެވޭ ފަދަ އިންޑިއާގެ އަމިއްލަ ސްމާޓްފޯން ބްރޭންޑްތައް ބާޒާރަށް ނުކުންނާނެއެވެ.
ސްވިޒަލޭންޑްގެ ދާވޯސްގައި ކުރިއަށްދާ ވޯލްޑް އިކޮނޮމިކް ފޯރަމް (ޑަބްލިއުއީއެފް) ގެ އަހަރީ ބައްދަލުވުމުގެ ހަވާސާގައި ވާހަކަދައްކަވަމުން މިނިސްޓަރު ވިދާޅުވީ، އިންޑިއާގެ އަމިއްލަ ފޯނު ބްރޭންޑްތައް އުފެއްދުމަށް ބޭނުންވާ ހުރިހާ ތައްޔާރީތަކެއް ނިމިފައިވާ ކަމަށެވެ.
"އަޅުގަނޑުމެންގެ ގައުމުގައި މިހާރު ވަރަށް ވަރުގަދަ އިލެކްޓްރޯނިކްސް އިކޯސިސްޓަމެއް އެބައޮތް. މިއީ އަމިއްލަ ބްރޭންޑްތައް އުފައްދަންވީ ވަގުތު،" މިނިސްޓަރު ވިދާޅުވިއެވެ.
އިންޑިއާގައި މިހާރުވެސް ސްމާޓްފޯނުގެ ބައިތައް އަންނަނީ އުފައްދަމުން ----ޓައިމްސް އޮފް އިންޑިއާއިން ރިޕޯޓްކޮށްފައިވާ ގޮތުގައި މިނިސްޓަރު އިތުރަށް ވިދާޅުވީ، ފޯނެއް އުފެއްދުމަށް ބޭނުންވާ އެތައް ހާސް ސާމާނެއް ތައްޔާރުކުރާ ކުންފުނިތަކާ އެކު އޭނާ ބައްދަލުވުންތައް ބާއްވާފައިވާ ކަމަށެވެ. އިންޑިއާ އަކީ މިހާރުވެސް ފޯނުގެ ގިނަ ބައިތަކެއް އަމިއްލައަށް އުފައްދާ ގައުމެކެވެ.
އިންޑިއާއިން މިހާރު އަންނަނީ ސެމީކޮންޑަކްޓަރު ނުވަތަ ޗިޕް އުފެއްދުމުގެ ދާއިރާ ކުރިއެރުވުމަށް ބޮޑެތި އިންވެސްޓްމަންޓްތަކެއް ކުރަމުންނެވެ. އެގޮތުން 2025 ވަނަ އަހަރު ނޮއިޑާގައި 3 ނެނޯމީޓަރުގެ ޗިޕް ޑިޒައިންކުރާ ފެސިލިޓީތަކެއް ހުޅުވުމަށް ވަނީ ހަމަޖެހިފައެވެ. އަދި ދުނިޔޭގައި އެންމެ ކުރިއަރާފައިވާ ސެމީކޮންޑަކްޓަރު މެޝިނަރީ އުފައްދާ ނެދަލޭންޑްސްގެ އޭއެސްއެމްއެލް އިން ވެސް އިންޑިއާއާ އެކު މަސައްކަތް ކުރުމުގެ ޝައުގުވެރިކަން ވަނީ ފާޅުކޮށްފައެވެ.
މިހާރުވެސް "ލާވާ" ފަދަ އިންޑިއާގެ އަމިއްލަ ބައެއް ބްރޭންޑްތައް ބާޒާރުގައި ހުރި ނަމަވެސް، މިނިސްޓަރުގެ މި ވާހަކަފުޅަކީ އިންޑިއާގައި އަމިއްލައަށް ފަރުމާކޮށް، އަމިއްލަ ޗިޕްސެޓް ބޭނުންކޮށްގެން އުފައްދާނެ ފެންވަރުމަތީ ފޯނުތަކަކަށް އިޝާރާތް ކުރައްވައި ދެއްކެވި ވާހަކަފުޅެއް ކަމަށް ބެލެވެއެވެ.
އިންޑިއާގެ އަމާޒަކީ ދުނިޔޭގެ މޯބައިލް ފޯނު އުފައްދާ މައި މަރުކަޒަކަށް ވުމެވެ.