ސައްތައިން ސައްތަ މޮޅުވުމުގެ ރެކޯޑަކާއެކު ސަރަހައްދީ ފުރަތަމަ ފުޓްސަލް މުބާރާތް ކާމިޔާބުކުރި ރާއްޖެއިން ދެން ވިސްނަންވީ އޭޝިއަން ކަޕް ކޮލިފައިންއަށް ކަމަށް ގައުމީ ކޯޗު އުޒްބެކިސްތާންގެ ފާރޫކް ޒަކީރޯވް ބުނެފިއެވެ.
މުބާރާތުގައި ރާއްޖެ ކުޅުނު އެންމެ ފަހު މެޗުގައި ލަންކާ އަތުން މޮޅުވި މެޗަށްފަހު ވާހަކަދައްކަމުން ޒަކީރޯވް ބުނީ ރާއްޖެއަކީ ހުނަރުވެރި ކުޅުންތެރިންތަކެއް ތިބި ޓީމެއް ކަމަށާއި ފުޓްސަލް ކުޅެން ބޭނުންވާ ހުނަރު ރަނގަޅުކުރަންޖެހޭކަން އެނގިގެންދިޔަ ކަމަށެވެ.
މީގެއިތުރުން ރާއްޖޭގެ ހުރިހާ ރައްޔިތުންނަށް ޝުކުރު އަދާކުރަން ބޭނުންވާވާކަން ފާހަގަކޮށް ޒަކީރޯވް ވަނީ ކުޅިވަރު ވުޒާރާއާއި އެފްއޭއެމުގެ އިސްވެރިންގެ އިތުރުން ކޯޗިން ސްޓާފުންނަށްވެސް ޝުކުރުއަދާކޮށްފައެވެ.
ޒަކީރޯވް ބުނީ ރާއްޖެއިން މި މުބާރާތަށް ކަނޑައެޅި ޓާގެޓަށް ވާސިލުވެވިއްޖެ ކަމަށާއި އަދިވެސް އިތުރު މަސައްކަތްތަކެއް ކުރަންޖެހޭ ކަމަށެވެ.
"ރާއްޖެއިން ދެން ޓާގެޓުކުރަންވީ އޭޝިއަން ކޮލިފަޔާސްއަށް. ރަނގަޅު ޓީމެއް ތައްޔާރުކުރުން ވަރަށް މުހިންމު، މި މުބާރާތުގެ އަލީގައި އެކަން ފެށިދާނެ،" ޒަކީރޯވް ބުންޏެވެ.
ފުރަތަމަ މެޗުގައި ޕާކިސްތާނު އަތުން 7-1 ގެ ނަތީޖާއަކުން ރާއްޖެ މޮޅުވިއިރު، ދެވަނަ މެޗުގައި ބަންގްލަދޭޝް އަތުން މޮޅުވީ 6-1 ގެ ނަތީޖާއަކުންނެވެ. ތިންވަނަ މެޗުގައި ސަރަހައްދުގެ ގަދަބާރު އިންޑިއާ އަތުން މޮޅުވީ 5-0 އިންނެވެ. ނޭޕާލް އަތުން 2-1 އިން މޮޅުވިއިރު، ބޫޓާންގެ މައްޗަށް ކުރިހޯދީ 3-1 އިންނެވެ.
ރާއްޖެއިން ވަނީ ލަންކާ މެޗާ ކުރިމަތިލީ އިރުވެސް ސަރަހައްދުގެ ތަށި ޔަގީންކޮށްފައެވެ. ރާއްޖެއިން ތަށި ކަށަވަރުކުރީ ބޫޓާނާ ދެކޮޅަށް ކުޅުނު މެޗުގައި ހޯދި ތިން ޕޮއިންޓާއެކު އެވެ.