ރާއްޖެއިން ހޯދި ތާރީހީ ފުރަތަމަ ފުޓްސަލް ތަށި، ގައުމީ ފުޓްސަލް ޓީމުގެ މެނޭޖަރުގެ ޒިންމާ އަދާކުރި މުހައްމަދު އުމެއިރު ހާއްސަކުރީ އޭނާއާއެކު ކެރިއަރުގައި މުހިންމު ދައުރެއް އަދާކުރި ތިން ފަރާތަކަށެވެ. އެ ފަރާތްތައް މިހާރު ދުނިޔޭގައި ނެތް ނަމަވެސް އެއީ ދިވެހި ފުޓުބޯޅައިގެ ތިން ޝަހުސިއްޔަތެވެ.
އެއީ އުމެއިރުއާ އެކު ގައުމީ ޓީމަށް ކުޅުނު ގޯލްކީޕަރު އިފްރާހު އަރީފް (އިފްރާ) އާއި ގައުމީ ޓީމާއި ކުލަބް ލެވެލްގައި އެއްކޮށް ކުޅުނު މުހައްމަދު އާރިފް (ބަކާ) ގެ އިތުރުން އުމެއިރުގެ ފުޓުބޯޅަ ކެރިއަރުގެ ފެށުމުގެ ތެރެއިން ބޮޑު އެހީތެރިކަމެއް ދިން އިހުސާން އަބްދުލް ގަނީ (ސާންތީ) އެވެ.
އުމެއިރު ވަނީ 2008 ވަނަ އަހަރުގެ ސާފް ޗެމްޕިއަންޝިޕު ރާއްޖެއަށް ހޯދައިިދިން ޓީމުގައިވެސް ހިމެނިފައެވެ. އެފަހަރު ކުޅުންތެރިއެއްގެ ގޮތުގައި ޓީމުގައި ހިމެނުނު ނަމަވެސް މިފަހަރު ފުޓްސަލްގެ ތާރީހީ ފުރަތަމަ ތަށި ރާއްޖެއިން އުފުލާލި ޓީމުގެ އޮފިޝަލުންގެ ޓީމުގައި އޭނާ އަދާކުރީ މެނޭޖަރެއްގެ ދައުރެވެެ.
ގައުމީ ފުޓްސަލް ޓީމުގެ މެނޭޖަރެއްގެ ގޮތުގައި މި މުބާރާތް ނިންމާލި އުމެއިރަށް މިއީ ބޮޑު ކާމިޔާބީއެކެވެ. މި ކާމިޔާބީގެ ހާއްސަކަން ހިއްސާކޮށް ސޯޝަލް މީޑިއާގައި ހިއްސާކުރި ޕޯސްޓެއްގައި އޭނާ ވަނީ މި ދުނިޔެއާ ވަކިވި ތިން މީހުންނަކީވެސް އޭނާގެ ކެރިއަރުގައި މުހިންމު ތިން މީހުންކަން ހާމަކޮށްފައެވެ.
ސާފް ފުޓްސަލް ޗެމްޕިއަންޝިޕު 2026 ގެ ޓްރޮފީއާއެކު އުމެއިރު--
ސާންތި ނިޔާވީ ކެންސަރަށް ފަރުވާ ހޯދަމުން ދަނިކޮށް މިދިޔަ އަހަރުގެ ތެރޭގައެވެ. ގޯލްކީޕަރު އިފްރާހް ނިޔާވީ ސްޓްރޯކެއް ޖެހިގެެންނެވެ. އަދި ބަކާ ނިޔާވީ ހައްޖުގެ މާތް އަޅުކަން އަދާކޮށް އެނބުރި އައިތާ ދުވަސްކޮޅެއްގެ ތެރޭގައި ބަލިވެ އުޅެނިކޮށެެވެ.
" 16 އަހަރުން ދަށުގެ ގައުމީ ޓީމުގައި އަހަރެންގެ ފުރަތަމަ ޕްރޮފެޝަނަލް ކޯޗަކީ ސާންތީ ކޯޗު، އެންމެ މުހިންމު ވަގުތު އަހަރެންނަށް އިތުބާރުކޮށް، އަހަރެންގެ ދިރިއުޅުން ބަދަލުކޮށްލުމުގެ ފުރުސަތެއް ދިން، (ސާންތި) ކޯޗު ކޮށްދިން ހުރިހާ ކަމަކަށް އަހަރެން އަބަދުވެސް ޝުކުރުވެރިވާނަން" ސާންތިއާ ގުޅޭގޮތުން އުމެއިރު ބުންޏެވެ.
"ބަކާ، ގައުމީ ޓީމާ އެކު އަދި ކްލަބްތަކުގައި ވެސް ވަރަށް އުފާވެރި ވަގުތުތަކެއް ހޭދަކުރީ. ތިޔައީ އަހަރެެންނާ ބައްދަލުވި އެންމެ ހިތްހެޔޮ މީހުންގެ ތެރެއިން އެކަކު، ޝުކުރިއްޔާ ހުރިހާ ހަނދާންތަކަކަށް" ބަކާއާ ގުޅޭގޮތުން އުމެއިރު ބުންޏެވެ.
ބަކާ، ސާންތި އަދި އިފްރާހުގެ ޖާރޒީއާއި ޓްރޮފީއާއެކު އުމެއިރު---
އަހަރުމެން 15 އަހަރުން ފެށިގެން އެކުގައި އުޅުނީ، ބޮޑެތި ހުވަފެންތަކެއް އަހަރެމެން ދެކުނިން، އޭގެ ފަހުން އަހަރެމެން ދެމީހުންގެ މެދުގައި ވަރަށް ގާތް ރަހުމަތްތެރިކަމެއް އުފެދިގެންދިޔަ، ތިޔައީ ހަމަ ހަގީގަތުގައި ތަފާތު މީހެއް" އިފްރާހު އާއި ގުޅޭގޮތުން ބުންޏެވެ.
އުމެއިރު ބުނީ މި ތިން މީހުންނަކީވެސް ރާއްޖެއަށް 2008 ގެ ސާފް ޗެމްޕިއަންޝިޕް ހޯދިއިރު ޓީމުގައި ތިބި މީހުން ކަމަށާއި އެއީ ކެރިއަރުގައި އުފާވެރި ހަނދާންތަކެއް ކަމަށެވެ. އަދި އަބަދުވެސް އެ ހަނދާންތައް އެކުގައިވާނެ ކަމަށެވެ.