ސަރުކާރުގެ ބޯހިޔާވަހިކަމުގެ ސްކީމްގެ ދަށުން ފުލެޓު ލިބުނު ދެމަފިރިންގެ ތެރެއިން ވަރިވެފައި ތިބި މީހުންނަށް ދިމާވާ މައްސަލަތައް ބަލާނެކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވާފައިވާ ކަމަށް މާލޭ ގެދޮރުވެރިންގެ ޖަމިއްޔާއިން ބުނެފިއެވެ.
މާލޭ ރައްވެހިންގެ ޖަމިއްޔާއާއި ގިރާވަރު ޖަމިއްޔާއާއި ގުޅީފަޅާއި ގިރާވަރުން ގޯތި ލިބުނު ބައެއް މީހުންނާ އިއްޔެ ރައީސް ޑރ. މުޙައްމަދު މުޢިއްޒު ވަނީ ބައްދަލުކުރައްވައިފައެވެ.
އެ ބައްދަލުވުމުގައި، ފުލެޓު ލިބުނު ދެމަފިރިންގެ ތެރެއިން ވަރިވެފައި ތިބި މީހުންގެ މައްސަލަތަކާއި، ހައުސިން ސްކީމްތަކުން ވަކިވާން ބޭނުންވާ ފަރާތްތަކުގެ ކަންބޮޑުވުންތައް ބައްލަވާނެ ކަމަށް ރައީސް ވިދާޅުވި ކަމަށް އެ ޖަމިއްޔާތަކުން ބުންޏެވެ. އޭގެ އިތުރުން މި ސަރުކާރުން މިދިޔަ ނޮވެންބަރު މަހު އިއުލާނުކުރި މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ބައެއް އުސޫލުތަކަށް ބަދަލު ގެނައުމަށް ވިސްނަވާ ކަމަށް ރައީސް ވިދާޅުވި ކަމަށް ވެސް ބުންޏެވެ.
އެ ގޮތުން، އާ ސިޔާސަތުގެ ދަށުން ބައެއް ފަރާތްތަކަށް ފޯމު ނުލެވޭ މައްސަލައިގައި އެންމެންނަށް ބޯހިޔާވަހިކަމަށް ކުރިމަތިލެވޭ ގޮތަށް އުސޫލު އިސްލާހުކުރައްވާނެކަމުގެ ޔަގީންކަން ރައީސް ދެއްވި ކަމަށް ޖަމިއްޔާތަކުން ބުންޏެވެ. ޖަމިއްޔާތަކުން ބުނީ، ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި އިއުލާނުކުރި ބިންވެރިޔާ ސްކީމުގެ ދަށުން ޒުވާނުންނަށް ލިބުނު ގޯތިތަކުގެ ވާނުވާ ބައްލަވާނެ ކަމުގެ ޔަގީންކަން ރައީސް ދެއްވި ކަމަށެވެ.
މީގެ އިތުރުން، ހުޅުމާލޭގެ ތިންވަނަ ފިޔަވަހިން ދޫކުރާ ގޯތިތަކުގެ ރަޖިސްޓްރީ ރަމަޟާން މަހުގެ ކުރިން ހަވާލުކުރާނެކަމުގެ ޔަގީންކަން ރައީސް ދެއްވި ކަމަށް ވެސް ޖަމިއްޔާތަކުން ބުންޏެވެ. ޖަމިއްޔާތަކުން ބުނިގޮތުގައި ހުޅުމާލޭގެ ތިންވަނަ ފިޔަވަހިން ގޯތި ދޭން އޮތް ސަރަހައްދުގެ މަސައްކަތްތައް އެއްކޮށް ނިންމާލެވިފައިވާ ކަމަށް ރައީސް ވިދާޅުވިއެވެ.
އެ ޖަމިއްޔާތަކުން އިތުރަށް ބުނީ، ދެ ޑްރެޖަރު ބޭނުންކޮށް ގިރާވަރުފަޅު ހިއްކަން މި ހަފުތާގައި ފަށައި، ދެ މަހެއްހާ ދުވަހުގެ ތެރޭ އެ މަސައްކަތް ނިންމާލާނެކަމުގެ ޔަގީންކަން ރައީސް ދެއްވި ކަމަށާއި ގިރާވަރުފަޅު ހިއްކައި ނިމެންވާއިރަށް، އެ ތަނުގައި ފެނާއި ނަރުދަމާގެ މަސައްކަތް ފަށައި، ގޯތިތަށް ހަވާލުކުރަން ފަށާނެކަމުގެ ޔަގީންކަން ވެސް ރައީސް ދެއްވި ކަމަށެވެ.
އަދި, ތިލަމާލެ ބުރިޖުގެ މަސައްކަތަށް ބަންދުކޮށްފައިވާ ސަރަހައްދު ފިޔަވައި ދެންހުރި ސަރަހައްދުތަކުން ގުޅީފަޅުގައި ގޯތި ހަވަލުކުރާނެ ކަމަށާއި އަންނަ ފެބްރުވަރީ މަހުގެ ފަހުކޮޅު މަގު ހަދާ ކުންފުނި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ން ފެނާއި ނަރުދަމާގެ މަސައްކަތް ފެށޭނެކަމުގެ ޔަގީންކަން ރައީސް ދެއްވި ކަމަށް ވެސް ޖަމިއްޔާތަކުން ބުންޏެވެ.
ފާހަގަކުރެވޭ ގޮތުގައި މިދިޔަ ނޮވެންބަރު މަހުގެ މެދުތެރޭ މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތު ވަނީ އިފުތިތާހުކޮށްފައެވެ. މި ސިޔާސަތުގެ ދަށުން 15،000 ގޯއްޗާއި 7،900 ފުލެޓަށް އެދި ކުރިމަތުލުމުގެ ފުރުސަތު ވަނީ ހުޅުވާލައިފައެވެ.
މި ސިޔާސަތުގެ ދަށުން ކޮންމެ ދެމަފިރިއަކަށް ވެސް ދޫކުރަނީ އެއް ފުލެޓެވެ. ސޯޝަލް ހައުސިން ސްކީމްތަކުގެ ތެރެއިން ދެމަފިރިންގެ ތެރެއިން އެންމެ މީހަކަށް ވެސް އިތުރު ގޯއްޗެއް ނުވަތަ ފުލެޓެއް ލިބިފައިވާ ނަމަ، އެ ދެމަފިރިއެއްގެ ޝަރުތު ހަމަ ނުވާނެއެވެ.
ދިވެހިރާއްޖެއަކީ ދުނިޔޭގެ ގައުމުތަކުގެ ނިސްބަތުން ވަރި އެންމެ ގިނަ ގައުމު ވެސް މެއެވެ.