ކަންކަން ރާވައި، ހިންގައި، ތަންފީޒުވުމުން އެ ކަމުގެ ކްރެޑިޓް ނަގަން ބަޔަކު މަސައްކަތްކުރި ނަމަވެސް އެ ކަމާމެދު އެއްވެސް ކަންބޮޑުވުމެއް ނެތްކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެއެވެ.
މި ދައުރުގައި އަލަށް ހުޅުވި ފުރަތަމަ ސްކޫލުކަމަށްވާ، ހުޅުމާލެ ފޭސް ދޭއްގެ ޝަހީދު ޢަލީ ސްކޫލް ހުޅުވުމަށް، ދަރިވަރުންނާއި، މުދައްރިސުން ބައިވެރިވި ރަސްމިއްޔާތުގައި ވާހަކަދައްކަވަމުން ޝަފީއުވަނީ، މި ސްކޫލަކީ މިދިޔަ އެމްޑީޕީ ވެރިކަމުގެ ތެރޭ ކުރެވުނު މަސައްކަތުގެ ނަތީޖާކަމަށް އޭރުގެ އެޑިއުކޭޝަން މިނިސްޓްރީގެ އިސް ވެރިން ސިފަކުރެއްވުމުން އެކަމަށް ރައްދު ދެއްވައިފައެވެ.
ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީ އާއި، ކުރީގެ ޑެޕިއުޓީ މިނިސްޓަރު މުޙައްމަދު އިހްސާން ފޭސްބުކްގައި ކުރެއްވި ޕޯސްޓެއްގައިވަނީ މި ސްކޫލަކީ، އެ ސަރުކާރުގައި ޕްލޭންކޮށް، މަސައްކަތް އެވޯޑުކުރި ސްކޫލެއް ކަމަށް ވިދާޅުވެފައެވެ. އަދި ހުޅުމާލޭގައި ތަރައްގީކުރަން އިތުރު ސްކޫލެއްގެ މަސައްކަތް ވެސް ހަވާލުކޮށް، ދެ ސްކޫލަކަށް ބަޖެޓުކޮށް ބިން ހަމަޖެއްސިކަމަށް އިހްސާން ވިދާޅުވިއެވެ. އަދި މި ސަރުކާރަށް ތިން އަހަރުވާން ދާއިރު އޭގެ ތެރެއިން އެއް ސްކޫލު ނަމަވެސް ނިމުނީތީ ހަމްދުކުރައްވާކަމަށް ވިދާޅުވިއެވެ.
މި ރަސްމިއްޔާތުގައި އެ ވާހަކަތަކަށް ރައްދު ދެއްވަމުން ޝަފީއު ވިދާޅުވީ، "ކަންކަން ރާވާލީމައާއި، ކަންކަން ހިނގީމައާއި، ކަންކަން ތަންފީޒުވަމުންދާތަން ފެނުނީމާ އެކަމުގެ ކްރެޑިޓް ނަގާ ފަރާތްތައް ތިބޭނެ" ކަމަށެވެ. ނަމަވެސް އެއީ ޖެހިލުންވާ ކަމެއް ނޫން ކަމަށާއި، މުދައްރިސުންނާއި ދަރިވަރުންނަށް ދޭންޖެހޭ ޚިދުމަތްތައް ފަހިކޮށްދެމުންދާނެ ކަމަށް ވިދާޅުވިއެވެ.
މިނިސްޓަރު ވިދާޅުވީ، ސްކޫލުގެ ނަމަކީ ވެސް ރައީސް ޑރ. މުޙައްމަދު މުއިއްޒު ދެއްވި ނަމެއް ކަމަށެވެ. ބޭނުމަކީ ބަތަލުންގެ ހިތްވަރާއި އަޚްލާގުން ނަމޫނާ ލިބިގަންނަ ޖީލެއް ބިނާކުރުން ކަމަށް ވެސް ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ، ރާއްޖޭގެ ސްކޫލުތައް ހުޅުވުން ނުވަތަ ދިރާސީ އަހަރު ފެށުމާއި، ފިސްކަލް އަހަރު ފެށުމާ ދިމާވާ ގޮތް ހެދުމުން މާލީ ކަންކަމުގައި ސްކޫލުތަކަށް ވަރަށް ބޮޑު ލުޔެއް ލިބޭނެ ކަމަށެވެ.
ހަމައެއާއެކު، މިދިޔަ ދެ އަހަރު ވަރަށް ގިނަ މަސައްކަތްތަކެއް ކުރެވުނު ކަމަށާއި، އެންމެ ފާހަގަކޮށްލެވޭ ކަންކަމަކީ މާލެއާއި، އެހެން ރަށްރަށް ތަފާތުނުކޮށް ކުރިއަށް ގެންދަން ފަށައިފައިވާ އުމްރާނީ ތަރައްގީގެ މަޝްރޫއުތަކާއި ސްކޫލުތަކުގެ މަރާމާތުގެ މަސައްކަތް ކަމަށް މިނިސްޓަރު ވިދާޅުވިއެވެ. އެގޮތުން މަރާމާތަށް އެކަނި ވެސް މި އަހަަރު 60 މިލިއަން ރުފިޔާ ބަޖެޓުކޮށްފައިވާ ކަމަށް މިނިސްޓަރު ވިދާޅުވިއެވެ.
"މިއީ ދިވެހިރާއްޖޭގެ ފަހުގެ ތާރީޚެއްގައި ސްކޫލުތައް ގާއިމްކުރެވުނުކަމުގައިވިޔަސް، ސްކޫލުތައް ތަރައްގީކުރެވިފައިވީ ކަމުގައި ވިޔަސްމެ، ފާއިތުވި މާޒީގައިވަނީ ސްކޫލުތަކަށް އަޅައިލުން، މަރާމާތުކުރުން ވަރަށް ބޮޑަށް ދޫކޮށްލެވިފައި،" ސްކޫލުތައް މަރާމާތުކުރަން ރައީސް ޑރ. މުޙައްމަދު މުއިއްޒު ދެއްވާ އެއްބާރުލެއްވުމަށް ޝުކުރު އަދާކުރައްވަމުން އޭނާ ވިދާޅުވިއެވެ.
މިނިސްޓަރު ވިދާޅުވީ ޝަހީދު ޢަލީ ސްކޫލުުގައި ކިޔެވުމަށް މިހާރު ދެހާހަށްވުރެ ގިނަ ކުދިން ރަޖިސްޓްރީވެއްޖެ ކަމަށެވެ.
"އިއްޔެ އަޅުގަނޑުމެންގެ ތިބީ 1،950 ވަރަކަށް ދަރިވަރުން. އެހެން ނަމަވެސް އިއްޔެ ނިމިގެންދިޔައިރުގައި 2،100 އާ ކައިރިވެއްޖެ. އެ 2،100 ދަރިވަރުންގެ ތެރެއިން 77 އިންސައްތަ ދަރިވަރުންނަކީ އަތޮޅުތެރޭގެ ރަށްތަކަށް ނިސްބަތްވާ ދަރިވަރުން. އެހެންވީމާ އަޅުގަނޑު ދަންނަވާލަން ބޭނުންވަނީ މާލޭގައި މި ސްކޫލު ގާއިމްވެފައި ހުއްޓަސް. ހުޅުމާލޭގެ ދެވަނަ ފިޔަވަހީގެ މި ތަނުގައި މި ސްކޫލު ހުރިކަމުގައި ވިޔަސްމެ މި ސްކޫލަކީ މުޅި ދިވެހިރާއްޖޭގެ ހުރިހާ ރަށްތަށް ޝާމިލްކުރާ ސްކޫލެއްގެ ގޮތުގައޭ އޮންނާނީ،" އޭނާ ވިދާޅުވިއެވެ.
މިއަދު ފެށި ދިރާސީ އާ އަހަރާއެކު ހުޅުވި ޝަހީދު ޢަލީ ސްކޫލަކީ، މިހާރު މާލޭ ސަރަހައްދުގައި ހުރި އެންމެ ބޮޑު ސްކޫލެވެ. ދެހާސް ތޭވީސްވަނަ އަހަރުގެ ޑިސެމްބަރު މަހު މަސައްކަތް ފެށި މި ސްކޫލު ދެ އަހަރުން ނިންމިއިރު، އޮޑިޓޯރިއަމަކާއި، މަލްޓިޕާޕަސް ހޯލަކާއި، ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ ބޮޑު ކޯޓެއް ވެސް ވަނީ ތަރައްގީކޮށްފައެވެ. ފަސް ފަންގިފިލާއަށް ތަރައްޤީކޮށްފައިވާ މި ސްކޫލުގައި 50 ކްލާސްރޫމް ހުންނާނެއެވެ.