ދެކުނު އިންޑިއާގެ ކުޅަދާނަ ފިލްމު ޑައިރެކްޓަރު އެޓުލީ މިހާރު މަސައްކަތް ފަށާފައިވާ ފިލްމުގެ ޚާއްސަ ރޯލެއް ބޮލީވުޑްގެ ބަތަލާ ކާޖޮލްއަށް ހުށަހަޅާފައިވާ ކަމަށް ރިޕޯޓުތައް ބުނެފިއެވެ.
މި ފިލްމަކީ ތެލުގޫ އެކްޓަރު އައްލޫ އަރުޖުން އަދި ބޮލީވުޑް ބަތަލާ ދީޕިކާ ޕަދުކޯން ލީޑް ރޯލް ކުޅޭ ވަރަށް ވަރުގަދަ އެކްޝަން ތުރިލާއެކެވެ.
މި ފިލްމުގެ ރޯލެއް ކާޖޮލްއަށް ހުށަހަޅާފައިވާ ކަމަށް ރިޕޯޓުތަކުން ބުނެފައިވާއިރު އެޓުލީގެ ފިލްމުން ބޮލީވުޑް ބަތަލާއިން ކަމަށްވާ ޖާންވީ ކަޕޫރު އަދި މްރޫނާލް ތާކުރު ވެސް ފެންނާނެ ކަމަށް ފިލްމީ ޚަބަރުތައް ބުނެއެވެ.
ފިލްމުގައި ކާޖޮލް ކުޅޭ ރޯލް ބަތަލާއަށް ހުށަހަޅާފައިވާއިރު އެޓުލީގެ ޓީމުން ކާޖޮލްއާ އެކު މަޝްވަރާތަކެއް ކުރެވެމުން އަންނަ ކަމަށް ޓައިމްސް އޮފް އިންޑިއާގައި ވަނީ ބުނެފައެވެ. އަދި ކާޖޮލްއަށް ފިލްމުގައި ބަތަލާ ކުޅޭ ރޯލް ވަރަށް ކަމުގޮސްފައިވާ ކަމަށް ވެސް ރިޕޯޓުތަކުން ބުނެއެވެ.
އެޓުލީގެ އާ ފިލްމުގެ ޕޯސްޓަރެއް--ފޮޓޯ/އިންޑިއާޓުޑޭ
މި ފިލްމު އުފައްދަނީ ހޮލީވުޑް ފިލްމުތަކުގައި ބޭނުންކުރާ ފެންވަރުގެ ވީއެފްއެކްސް ވިޝުއަލް އެފެކްޓްސްއާ އެކު މިއީ ވަރަށް ފެންވަރު ރަނގަޅު ފިލްމަކަށް ހެދުމަށް އެޓުލީ ވަރަށް ބުރަކޮށް މަސައްކަތް ކުރަމުން އަންނަ ކަމަށް މީޑިއާތަކުން ވަނީ ބުނެފައެވެ.
ހާއްސަކޮށް ފިލްމު "ޖަވާން"ގެ ކާމިޔާބީއަށްފަހު އެޓުލީގެ އަމާޒަކީ އެއަށްވުރެ ވެސް މޮޅު ޝައުގުވެރި ފިލްމެއް ބެލުންތެރިންނަށް ގެނެސްދިނުމަށް ކަމަށް ރިޕޯޓުތަކުން ވަނީ ބުނެފައެވެ.
ބޮލީވުޑްގެ ތަޖުރިބާކާރު ބަތަލާ އިތުރު ފިލްމަކަށް ސޮއިކުރަން އުޅޭކަމުގެ ވާހަކަތަކެއް ދެކެވެމުން އަންނައިރު ބަތަލާ އެންމެފަހުން ބެލުންތެރިންނަށް ގެނެސްދިނީ މިދިޔަ އަހަރު ޖިއޯ ހޮޓް ސްޓާއިން ގެނެސްދިން "ސަރްޒަމީން"އެވެ.
ވެބް ސީރީސްތަކުން ވެސް މިހާރު ފެންނަ ބަތަލާގެ ކުރިއަށްހުރި ފިލްމުތަކުގެތެރޭ "މަހާރާގްނީ: ކްއީން އޮފް ކްއީންސް"ގެ ނަމުގައި އުފައްދާ ފިލްމެއް ހިމެނެއެވެ.