އަންނަ އޭޕްރިލް މަހުގެ ކުރީކޮޅު ބާއްވާ ކައުންސިލުތަކުގެ އިންތިޚާބުގައި ވާދަކުރާ ކެންޑިޑޭޓުންގެ ފޯމުތައް ގަނޑުކޮށް ބަލައިގަތުމަށް އިލެކްޝަންސް ކޮމިޝަނުން އަދި ނުނިންމާ ކަމަށާއި، ކެންޑިޑޭޓުން އޮންލައިންކޮށް ފޯމު ހުށަހަޅާ ގޮތަށް ހެދި ނަމަވެސް، ސިޔާސީ ޕާޓީތަކުން އަދި ރަސްމީކޮށް އެ ކޮމިޝަނަށް ޝަކުވާ ހުށަނާޅާ ކަމަށް، ކޮމިޝަނުން ރޭ ބުނެފިއެވެ.
އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް އިންތިޚާބަށް ކުރިމަތިލުމަށް ހުޅުވާލީ މިމަހުގެ 17ވަނަ ދުވަހެވެ. އެ ފުރުސަތު ހުޅުވާލީ އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށެވެ.
ނަމަވެސް އިދިކޮޅު އެމްޑީޕީން ބުނީ، އިންތިޚާބަށް ކުރިމަތިލާން ދިން މުއްދަތު ކުރު ކަމަށާއި، 24 ގަޑިއިރު އޮންލައިންކޮށް ފޯމު ހުށަހެޅުމުގެ ފުރުސަތު އޮންނަން ޖެހޭނެ ކަމަށެވެ. އެ ޕާޓީގެ ކައުންސިލު އިންތިޚާބުގެ ތަރުޖަމާނު ޢަބްދުالله ވަޙީދު ލިޔުއްވި ޕޯސްޓެއްގައިވަނީ މެނުއަލްކޮށް ނުވަތަ ގަނޑުކޮށް ފޯމް ބަލައިގަތުމުގެ އިންތިޒާމް ހަމަޖެއްސުމަށް އިލެކްޝަންސް ކޮމިޝަނަށް ގޮވާލައްވައިފައެވެ.
މިކަމާ ގުޅޭގޮތުން 'ސަން'އަށް މައުލޫމާތު ދެއްވަމުން އިލެކްޝަންސް ކޮމިޝަނުގެ ނައިބު ރައީސް ޢަބްދުއްރަޙްމާން ޞަލާޙް ރަޝީދު ވިދާޅުވީ، ގަނޑުކޮށް ފޯމު ބަލައިގަންނަން އެ ކޮމިޝަނުން ނިންމާފައި އަދި ނުވާ ކަމަށެވެ. ބައެއް ތަފާސްހިސާބުތަކަށް އަލިއަޅުވާލައްވައި ޞަލާޙް ވިދާޅުވީ، މިހާރުވެސް ހާހަކަށްވުރެ ގިނަ ފަރާތްތަކުން އޮންލައިންކޮށް ފޯމުތައް ފުރަމުން ގެންދާ ކަމަށެވެ.
ފޯމު ފުރަން ދަތިވެގެން ރަސްމީ ސިފައެއްގައި ސިޔާސީ އެއްވެސް ޕާޓީއަކުން އަދި މިހާތަނަށް ޝަކުވާއެއް ހުށަނާޅާ ކަމަށް ޞަލާޙް ވިދާޅުވިއެވެ.
"ދެން އަޅުގަޑުމެންގެ ކޯލް ސެންޓަރަށް ލިބިފައިވާ ޝަކުވާތަކަށް ބަލާލާއިރު ފޯމު ފުރަން ދަތިވެގެން، އެޕްލިކޭޝަން ދަތިވެގެން ޝަކުވާ އެހާ ބޮޑަކަށް ނެތް،" އޭނާ ވިދާޅުވިއެވެ.
ޞަލާޙް ވިދާޅުވީ، ޒަރޫރީ ނުވަތަ މުހިއްމު ހާލަތެއް މެދުވެރިވުމުގެ ސަބަބުން، އިލެކްޝަންސް ކޮމިޝަނުން ދީފައިވާ މުއްދަތުގައި ނާދެވުން ފަދަ ޝަކުވާތައް އޭރު އޮތް ކަމަށެވެ. އޭނާ ވިދާޅުވިގޮތުގައި ޕޯޓަލް ބޭނުންކުރަން ނިންމީ އެކި ފަހަރު މަތިން ކޮމިޝަންގެ އިސްތިރާޖީ ޕްލޭނަށް އަމަލުކުރަމުން ގޮސް، ގައުމީ ލަފާދޭ ކޮމިޓީއާ މަޝްވަރާކުރުމަށް ފަހު، ގިނަ ބައެއްގެ އެދުމުގެ މަތިން ލުއި ފަސޭހަކޮށްދިނުމަށްޓަކައެވެ.
"މީގެ ކުރިންވެސް މި ޕޯޓަލް މެދުވެރިކޮށް ދާ ވާހަކަ ބުނީމަ މި ޕޯޓަލް މެދުވެރިކޮށް ނުކުރެވޭނެ ކަމަކަށް ސިޔާސީ ޕާޓީތަކުން ބުނެފައެއް ނެތް،" ޞަލާޙް ވިދާޅުވިއެވެ.
ކުރިން އޮންނަނީ މާލެ އައިސް، ނުވަތަ އިލެކްޝަންސް ކޮމިޝަނުގެ އޮފީހަށް ހާޒިރުވެ، ފޯމުތަކާއި ކެންޑިޑޭޓުންގެ އިގުރާރު ފުރާ ގޮތަށް ކަމާއި، ނަމަވެސް ޕޯޓަލްގެ ސަބަބުން އެ ކަމަށް ދާ ވަގުތު ސަލާމަތްކުރެވޭނެ ކަން ޞަލާޙް ފާހަގަކުރެއްވިއެވެ.
ކައުންސިލުތަކުގެ އިންތިޚާބަށް ކުރިމަތިލާން އެދޭނަމަ ފުރަތަމަ އިލެކްޝަންސް ކޮމިޝަންގެ މައި ޕޯޓަލަށް އީފާސް މެދުވެރިކޮށް ލޮގިން ވާނީއެވެ. އެއަށްފަހު "ކައުންސިލް އިންތިޚާބުގައި ވާދަކުރުމަށް" އޮންނަ ބަޔަށް ގޮސް، މަތީގައި އޮންނަ "ކެންޑިޑޭޓަކަށް ވުމަށް އެދި ފޯމު ހުށަހެޅުމަށް" އޮންނަ ބަޔަށް ދާނީއެވެ. ފޯމަށް ގޮސް އެންމެ ފުރަތަމަ ޖެހޭނީ ބައިވެރިވާ އިންތިޚާބާއި ބައިވެރިވާ ހައިސިއްޔަތާއި މަގާމު އިޚްތިޔާރުކުރާށެވެ. އެއަށްފަހު "ސޭވް" އަށް ފިތާލުމުން ފޯމު ފުރަން ފެށުނީއެވެ.
އިލެކްޝަންސް ކޮމިޝަނުގެ ފޯމު އޮތީ ކުރިމަތިލާ ފަރާތުގެ މައުލޫމާތާއި އެޑުރެހާއި ވަޒީފާއާއި ކުށުގެ ރެކޯޑު ފޯމު ފަދަ މައުލޫމާތު ވަކިވަކިން ހުށަހެޅޭ، އަދި ފޯމުގެ ވަކި ބައިތައް ފަސޭހައިން ފުރިހަމަކުރެވޭ ގޮތަށެވެ. އެގޮތުން އިދާރީ ފީ ދައްކަން ބޭނުން ނަމަ، ބަނޑޭރި ޕޭ މެދުވެރިކޮށް ފަސޭހައިން އިދާރީ ފީ ދެއްކޭނެއެވެ.
ކައުންސިލުތަކުގެ އިންތިޚާބު އޮންނާނީ އަންނަ އޭޕްރިލް މަހުގެ ހަތަރުވަނަ ދުވަހެވެ.
އެ ކޮމިޝަނުން އާންމުކުރި ތަފާސްހިސާބުތަކުގައިވާ ގޮތުން، ކައުންސިލު އިންތިޚާބުގައި ވާދަކުރާ މީހުންގެ ތެރެއިން 750 މީހުންގެ ކެންޑިޑަސީ، އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި ވާދަކުރާ މީހުންގެ ތެރެއިން 574 މީހުންގެ ކެންޑިޑަސީ ވަނީ ގަބޫލުކޮށްފައެވެ.