"ލުގުމާންގެފާނު އެކަލޭގެފާނުގެ ދަރިކަލުންނަށް ވިދާޅުވިއެވެ. "އޭ ދަރިފުޅާއެވެ. ތައުބާވުން ލަސްނުކުރާށެވެ. އެހެނީ ހަމަކަށަވަރުން ކުއްލިއަކަށްވެސް މަރު އަތުވެދާނެއެވެ."
***
އެނގޭތަ؟ މި ވައިރަސްގެ އަލާމާތްތައް ފެންނަ އަންހެންކުއްޖަކު ގެނެސްފައި އެބައޮތް............."އޭނަގެ އެކުވެރިޔާ މަޑުމަޑުން ބުނެލިއެވެ.
"ކޮން ގައުމެއްގެ؟" އޭނަ އަހައިލިއެވެ.
"ސްވިސް..ކަރަންޓީނުކޮށްފައި އޮތީ..ސޯ ޕީޕީއީ ލައިގެން އެތަނަށް ވަދެވޭނީ...ޓެސްޓް ރިޒަލްޓް ލިބުނީމަ ދެން ވަކި އެއްޗެއް ބުނަން އެނގޭނީ......"
މިނާހް ހީލިއެވެ. "މެޑިކަލް މާފިއާއަށް އުފާވެރި ޚަބަރެއްނު..."
"ތިބުނީ؟"
"ވަރަށް ޕްރޮފިޓް ނަގާނެއޭ މިބުނީ....ތި ޓެސްޓްތަކާއި ވެކްސިންތަކުން ބިލިއަނުން ފައިދާ ނަގާނެ.."
"މާން........މެޑިކަލް ޑޮކްޓަރުން ތިގޮތަށް ވާހަކަދެއްކުމަކީ މަނާކަމެއް.."
"އަހަންނަކީ އިންސާނެއް...ޑޮކްޓަރަކަށްވީ އޭގެ ފަހުން. އެކަމަކު ބޮސްއަށް އިވިއްޖެއްޔާ ސަސްޕެންޑްކުރާނެ. އެނީވޭސް މި މާސްކު އަޅައިގެން ހަތަރުދަމު އުޅެން ޖެހުމުން މަ މިހިރީ ނޭވާނުލެވިފައި..މިހާރުވެސް ހެލުސިނޭޓްވާން ފަށައިފިހެން ހީވޭ......."
ލީވަން ހިނިގަނޑެއް ޖަހައިލިއެވެ.
"މި ވައިރަސް ޕެންޑެމިކްވާނެހެން ވަރަށް ހީވޭ...އަހަރެެމެން މިކަމަށް ރަގަޅަށް ތައްޔާރުވާން އެބަޖެހޭ..."
"ވައިރަސް މައިތިރިވަންދެން ދެމީހުން ފަޅުރަށަކަށް ނައްޓައިލަމާ ހިނގާ....ދޯންޏެއް ބަރުކޮށްގެން ކާއެއްޗެހި ހިފައިގެންގޮސް އަހަރެއްހާ ދުވަހު އުޅެލާފައި އަންނައިރު........................"
އެހެންލާފައި ދިޔަ ކުދިންތަކެއްގެ ނަޒަރު އެ ޒުވާނުންނަށް ހުއްޓުނެވެ. މިނާހް ކުޑަކޮށް ބުމަ އަރުވައިލީ އެކުދިން އުފާވާނެކަން އެނގޭތީއެވެ. އެހާވަރުން ސަމާލުކަން ހޯދަން އުޅުމުން ނުފެންނަކަމަށް ހަދާފައި ދާކަށް ނުވާނެ ނޫން ހެއްޔެވެ؟ އޭނަގެ އެކުވެރިޔާ ލީވަންވެސް މަޖާވެލާފައި އެއްލޯ މަރައިލިއެވެ.
***
މިނާހް އޭނަގެ މާމަގެ ގޭގައި ވަގުތުކޮޅެއް ހޭދަކޮށްލާފައި އަންނަމުން ބީޗްގައި މަޑުކޮށްލީ ތާޒާ ވައިކޮޅެއް ހޯދައިލުމަށާއި ކަނޑުގެ ރާޅުތަކުގެ ރާގުން ސިކުނޑިއަށް ހަމަޖެހުމެއް ލިބިގަތުމަށެވެ. އިރުއޮއްސެމުން ދިޔަ މަންޒަރުތައް ކެމެރާގައި ރައްކާކުރަމުން ދިޔައިރު ކޮންމެވެސް ވަރަކަށް އެހިސާބުގައި އުޅުނު އަންހެން ކުދިންތަކެއް ފޮޓޯއަށް އެރިހެން ހީވިއެވެ. ނަމަވެސް އެހާވަރެއްގެ ސަމާލުކަމެއް ނުދެވުނެވެ.
"ހަމަ ޑެލިބެރޭޓްކޮށް ފޮޓޯ ނެގީއޭ.. އޭނަގެ ހިތުގައި ވެސް އަޅައިގަތީ ކަމަށް ވާނީ...ގޮސް އަހާބަލަ...ކިހާ ހެންޑްސަމް..." ކޮންމެވެސް އަންހެންކުއްޖެއްގެ ހުނުމުގެ އަޑު ކަންފަތުގައި ޖެހުނެވެ.
މިނާހް ހިނގައިގަތީ ކާރާއި ދިމާލަށެވެ.
"ކާރުވެސް ވަރަށް އޮފްގަދަ،،،،،،މަހުޖަނެއްގެ ދަރިއަކަށް ވާނީ..."
އެކުދިން ދިމާކުރަނީ އޭނައާއިކަން ޔަގީންވުމުން މަޖާވެގެން ހިތާހިތުން ހުނެވެ. މިއީ އޭނަގެ އެކުވެރިޔެއްގެ ކާރުކަން އެކުދިންނަށް ބުނެދޭންވީއެވެ. އޭނަ އެހާ ރީތިކަމަށް ހީވީ އަވިއައިނު ޖަހާލާފައި ހޫޑީއެއް އަޅައިގެން ހުރުމުންނޭ ވެސް ބުނަންވީއެވެ. ނަމަވެސް މިނާހްއަކަށް އެހިތްވަރެއް ނުލިބުނެވެ. އެކުދިންނާއި ދިމާލަށް އެނބުރި ބަލައިލާކަށްވެސް ކުޅަދާނައެއްނުވިއެވެ. އެހެންނޫނަސް އޭނައަކީ އަންހެންކުދިންނާއި އެއް އިރެއްގައިވެސް އެހާ ގާތްކޮށް އުޅުނު އަދި އުޅޭހިތްވާ ޒުވާނެއްވެސް ނޫނެވެ.
***
"ހޭއި މާނު....ކޮންތާކު؟ "ލީވަންގެއަޑު ކަންފަތުގައި ޖެހުނެވެ.
"ހަމަ ތިގެއަށް ދާ މަގުމަތީގައި..ލައިނުގަނެގެން ތިއުޅެނީ ކީއްވެތަ؟ ޕާޓީއަކަށް ދާން އޮތީ؟"
"ޕާޓީކުރެވޭވަރެއް ނުވެއެއްނު...އެނގޭތަ؟ އެއްކަލަ ސްވިސް ގާލް ޕޮޒިޓިވް....."ލީވަން ބޮމެއް ވައްޓައިލިއެވެ.
"ވޯ....ސީރިޔަސްލީ؟ ދެން އޮންނާނީ ކޮންޓެކްޓް ޓްރޭސިން ހަދާފައި އައިސޮލޭޓްކުރުންދޯ.........ކަންތަކާއި މިޖެހުނީ.."
"އަހަންނަށް ހީވަނީ މީޓިންއެއް ވަރަށް އަވަހަށް ބާއްވާނެހެން....އަވަހަށް އާދެބަލަ...."
***
ދުނިޔޭގެ ސިއްހަތު ޖަމްއިއްޔާއިން ވަނީ ކިއު އެކްސްއަކީ ޕަބްލިކް ހެލްތް އިމަޖެންސީއެއްކަން އިއުލާންކޮށް ފިޔަވަޅުތައް އެޅުމަށް ގޮވާލާފައިވެއެވެ. ލައްކައެއްހާ މީހުންނަށް އެ ބަލިޖެހި ބަލީގައި ތިންހާސް ވަރަކަށް މީހުން މަރުވިކަމަށް ތަފާސް ހިސާބުތަކުން ދައްކައެވެ.
މިނާހްގެ ހިތަށްވެސް ކޮންމެވެސް ވަރެއްގެ ލޮޅުމެއް އެރިއެވެ. އެމީހުންގެ އުފާވެރި ދުނިޔެއާއި ކާރު ބުރުތަކާއި. ޕާޓީތަކާއި ރިޒޯޓަށްދިޔުންފަދަ ހުރިހާކަމެއް ހުއްޓުވާފާނެ ވަބާއެއްކަން ޔަގީނެވެ.
***
މުވައްޒަފުންނާއި ޚިދުމަތް ހޯދަން އަންނަ ފަރާތްތަކަށް ރައްކާތެރިކަން ހޯދަދިނުމުގެ ގޮތުން ލޭކްވިއުއިންވެސް ވަގުތުން ރައްކާތެރިކަމުގެ ފިޔަވަޅު އަޅަން ފެށިއެވެ. މާސްކު އެޅުމާއި ގިނަގިނައިން އަތް ދޮވުން އަދި ސަނިޓައިޒާރ ބޭނުންކުރުމަށް ބާރުއަޅާ އެކަހެރިވުމަށް ސަމާލުކަން ދޭން އެންގުނެވެ. މާސްކު އަޅަންޖެހުމުން ކުރީކޮޅު ފޫހިވީ ނަމަވެސް މިނާހްއަށް ވިސްނުނީ އަންހެން ކުދިން ފަދައިން މޫނު ފޮރުވުމުން މީހުންގެ ތޫނު ބެލުންތަކުން ސަލާމަތްވާކަމުގައެވެ. މާސްކާއި އަވި އައިނު އަދި ސޫޓުގެ ސަބަބުން ސަލާމަތްކަން ލިބެނީ ހަމައެކަނި ވައިރަސްގެ ފަރާތަކުން ނޫނެވެ. އަންހެންކުދިންގެ ފަރާތުންވެސް މެއެވެ.
މިނާހް އާއި ލީވަން ލައުންޖަށް ވަންއިރު ތަން އޮތީ ފަޅުކޮށެވެ. ދެމީހުން ކޮފީ މެޝިނުން ކޮފީ އަޅައިގެން ގޮސް ސޯފާގައި ޖައްސައިލިއެވެ.
"ޑޮކްޓަރު އިބްރާހިމް ވެސް ޕޮޒިޓިވްވީ..އެ ސްވިސްކުއްޖާއާއި ގާތުން ބައްދަލުވީ އެކަކު...ދޮންބެ ބުނާގޮތުން ވަރަށް އަލާމާތްތައް ހުރި..ކަރަންޓީނު ފެސިލިޓީއަށް ލައިގެން އާއިލާއާއި ވަކިކުރުމަކީވެސް ނަފްސާނީގޮތުން އަސަރުކުރާނެކަމެއް...މިބުނީ ދެން ކްލޯޒް ފެމިލީ އުޅެންޏާ.ބަލިވީމަ ފެމިލީއަށް ބޭނުންވާނެ ދޯ.." ލީވަން ބުނެލިއެވެ."މި ވައިރަސް ވަރަށް ފޯރިއާއިއެކު ބަދަލުހިފަމުން މިދަނީ..ހުރިހާ ގައުމެއް ލޮކްޑައުން ކުރަމުންގޮސް އަހަރެމެންގެ ގައުމު ބަގުރޫޓު ނުވެއްޖެއްޔާ ރަަގަޅު.."
"އެއްކަލަ އޮޕޯޗުނިޓީއަށް ބަލަބަލާ ތިބޭ ކުންފުނިތައް ވާދަކުރާނީ އެންމެ ކުރިން ވެކްސިންއެއް އުފައްދަން..."
"އޮހް ހޯ.."
"މަށެއް ނުޖަހާނަން އޭތި..."
"މަރުވާހިތުން އުޅޭ މީހެއްދޯ.."
"އެހެނެއްނޫން....ކޮންމެހެން އެކަކު ވެކްސިން ނުޖެހިޔަސް އަދި ބަދަލެއް ނުވާނެ.."
އިރުކޮޅަކަށް ވާހަކަދައްކައިލަން ތިބެލާފައި ލީވަން ދިޔުމުން އޭނަ ލޯ މަރާލައިގެން އިންއިރު މާމައާއި ދެކެވުނު ވާހަކަތައް ހަނދާނަށް އައެވެ. މާމައަށް އެ ޚަބަރު އިވުމުން ބުނީ މަރު އޮންނާނީ ލިޔުއްވާފައިވަކަމަށެވެ. އެކަނި ނޫނީ ގިނަމީހުން އެއްފަހަރާ ދުނިޔެއާއި ވަކިވެގެންދިޔުމަކީވެސް ﷲގެ ހަޟުރަތުގައި ތަފާތުވާނެކަމެއް ނޫނެވެ. ބޮޑެތި ބަލިމަޑުކަމާއި ތޫފާންތަކުގައި އެތައް ފުރާނައެއް ގެއްލިގެން ދެއެވެ. އޭގެ ސަބަބާއި ހިކުމަތް ދެނެވޮޑިގެންވަނީ އެފަރާތުންނެވެ. ދުނިޔެއަށް އައި މަގުސަދަކީ ﷲތައާލާއަށް އަޅުކަންކުރުމެވެ. ހުސްއަތާ މަރުވެގެން ދިޔުމުން ފަހުން ހިތާމަކުރާން ޖެހިދާނެއެވެ.
"މާމަ މެން ކޮންމެކަމެއް ދެކެނީ ދީނީ ނަޒަރިއްޔާތުން. އެހެންވެ އެހާ ހަމަޖެހިގެން އުފަލުގައި އުޅެނީ. އަހަންނަށް ދީނަށް ނޫޅެވެނީ ކީއްވެތަ؟ ނަމާދުކުރުމުން ކޮންމެވެސް ވަރަކަށް ސްޓްރެސް ފްރީވާހެން ހީވޭ އެކަމަކު ހުސްކަމެއް އިހުސާސްވޭ..އަހަންނަށް ކީއްވެ ގޯޑްއާއި ކަނެކްޝަން ނެތިގެން މިއުޅެނީ؟ ކިހިނެއް އެ ކަނެކްޝަން ވަރުުގަދަ ކުރާނީ؟"
***
ޔަލްވީ ހޭލެވުނުއިރު އަށެއްޖަހާ ބޮޑުވެއްޖެއެވެ. އެހާ ގިނައިން ނިދުނީ ކީއްވެހެއްޔެވެ؟ އަޔާޝްއަށް ހެދުނު ނާސްތާ ތައްޔާރުކުރަން ނުތެދުވުނީތީ އޭނަ ކުށްވެރިވާނެއެވެ. އަވަހަށް އެނދުން ތެދުވާން ހަދައިގެން ހަރުވާޅުގެ ޖީބުގައި އޮތް ލިޕްސްޓިކް ވެއްޓުމާއެކު ޔަލްވީއަށް އަޑެއް ލައްވައިލެވުނެވެ. އަޔާޝްއަށް އެމަންޒަރު ނުފެންނާނެކަމަށް ހީކޮށް ފުންމައިގެންގޮސް އެ ނަގާ ޖީބަށް ލީއިރު ޝޮކްޖެހިފައެވެ. ދަޅުފަޅާފައިހުރި އިފްރީތެއް ތިިރިކޮށްލިޔަސް އެވަރެއްނުވާނެއެވެ.
"ކިހިނެއްވެފައި ތިހިރީ؟"އަޔާޝް ބުމަ އަރުވައިލިއެވެ.
"ނަތިން......"ޔަލްވީ ހިންދިރުވައިލިއެވެ.
"އަވަހަށް ރޫމަށް ނާސްތާ ގެނެސްދީ..."
"މޫނު ދޮވެލައިގެން މިއަންނަނީ..."ޔަލްވީ ފާޚާނާއަށް ވަންއިރުވެސް ހިތުގެ ތެޅުން މަޑެއްނުވެއެވެ.އޭނަ ހުރިހާގަޑިއެއްގައި ހުންނަނީ މޭކަޕްކޮށްގެން ކަން އަޔާޝްއަށް ވިސްނޭނެހެއްޔެވެ؟ އޭނައަށް މަޑުމަޑުން ކޯތާފަތުގައި އަތް ޖައްސައިލެވުނެވެ. އެދުވަހު ކުޑަކޮށް ރަތްވިޔަސް މާބޮޑުވަރެއްނުވިއެވެ. އެފަހުން މިއަދާއި ހަމަޔަށް އައިއިރުވެސް މޫނު ފެންނަ ކޮންމެފަހަރަކު އަޔާޝްގެ އަތްތިލައިގެ ހޫނުކަން އިހުސާސްވާފަދައެވެ. އެދުވަހު ކޮންމެވެސް ވަރަކަށް ރަތްވިނަމަވެސް މޫނުމަތިން އެހެން އަސަރެއް ނުފެނުނެވެ. ނަމަވެސް އޭނަގެ ސިކުނޑިން އެ މަންޒަރު ނުފިލަނީ ކީއްވެހެއްޔެވެ؟ މޫނު ފެންނަ ކޮންމެ ފަހަރަކު އެހަނދާންތައް ހިތުގައި ޖެހިގަންނަނީ ބިރުވެރި ކާރިސާއެއްފަދައިންނެވެ. އަވަހަށް މޫނުދޮވެލައިގެން ފައުންޑޭޝަންލުމަށްފަހު ލިޕްބާމު ތުންފަތުގައި ހާކާލުމަށްފަހު ވިދާ މޫނަކާއިގެން ނުކުތެވެ. އަޔާޝް އިނީ ސީރިޔަސް ކޯލެއްގައެވެ.
އަޔާޝް ފޯނު ބާއްވާފައި ކޮފީތަށި ތުނބުގައި ޖެހިއެވެ.
"ހުރިހާކަމެއް ރަގަޅުތަ؟"
"ކިއުއެކްސް ހުންޖެހިގެން މީހަކު މަރުވީ...."
"ސްކޭރީ....."ޔަލްވީ ޑްރެމެޓިކްވިއެވެ."ލޭކްވިއު އިންތަ؟ "
"ނޫން.." އަޔާޝް ދިނީ ކުރު ޖަވާބެކެވެ.
"ވަރަށް ފަސޭހައިން ގައިން ގަޔަށް އަރާ ބައްޔެއްތަ؟"
"ހީވަނީ..."
އަޔާޝް އަނެއްކާ ފޯނުން މީހަކާއި ވާހަކަދައްކަން ފެށިއެވެ. ޔަލްވީ ކުރިމަތީގައި އިނީ ފިރިމީހާގެ ކޮންމެ އިޝާރަތަކަށް ބަލަބަލައެވެ. ހިތްހަމަނުޖެހޭގޮތަކަށް ނާސްތާ ތައްޔާރުކުރެވިދާނެތީވެސް އޭނަ އިންތިހާއަށް ކަންބޮޑުވެއެވެ. އަޔާޝް ދިޔުމާއެކު އޭނަ އަވަހަށް ދޮންތައަށް ގުޅައިގެން ޚަބަރު އޮޅުންފިލުވަން މަސައްކަތްކުރިއިރު އެބުނާ "ކިއުއެކްސް"އެއްގެ ނުރައްކާތެރިކަން އަންދާޒާކުރިވަރަށްުވުރެ ބޮޑެވެ. އޭނަ އަވަހަށް ފިހާރައަށްގޮސް ސަނިޓިއިޒާ ފުޅިއެއް ގަތެވެ. މޭވާއާއި ތަރުކާރީއަދި ވިޓަމިންސީވެސް ގެނައެވެ. އޭނައަށް ފޯނަށް ބެލެންފެށުނީ ބިރުގެންފައި އިނދެއެވެ. އިރުއިރުކޮޅާ އަތް ދޮވެލާފައި ތަންތަނުގައި ސަނިޓައިޒާ ލެވެއެވެ. އަޔާޝްއާއި މިނާހް ހޮސްޕިޓަލުގައި މަސައްކަތްކުރަންޏާ އާއިލާއަށް އޮންނާނީ ކޮން ރައްކާތެރިކަމެއް ހެއްޔެވެ؟
ނުނިމޭ