ޓެކްނޮލޮޖީގެ އެންމެ ބޮޑު އެއް ކުންފުނި ގޫގުލްއިން، އެންޑްރޮއިޑް އެކްސްއާރު އާ ބެހޭ ޚާއްސަ އިވެންޓެއް އަންނަ ހޯމަ ދުވަހު ބޭއްވުމަށް ތާވަލުކޮށްފިއެވެ.
މި އިވެންޓުގައި ސްމާޓް އައިނާއި، ހެޑްސެޓްތަކަށް އަންނަ އާ އީޖާދުތަކާއި ކުރިއެރުންތައް ދައްކާލާނެ ކަމަށް ރިޕޯޓުތައް ބުނެއެވެ. އެކަމުގެ ސަބަބުން ވެއަރަބަލް ޓެކްނޮލޮޖީގެ ދާއިރާއަށް އާ އުފެއްދުންތަކެއް ތައާރަފުވެގެންދާނެ ކަމަށް ވެސް ރިޕޯޓުތައް ބުނެއެވެ.
ގޫގުލްއިން ނެރެފައިވާ ޓީޒާ ވީޑިއޯއިން ސްމާޓް ގްލާސްގެ ހައިލައިޓްތަކެއް ފެންނައިރު، މި އިވެންޓުގެ މައިގަނޑު ސަމާލުކަން ހުންނާނީ އޯގްމެންޓެޑް ރިއަލިޓީ (އޭއާރު) އަދި ވާޗުއަލް ރިއަލިޓީ (ވީއާރު) ޓެކްނޮލޮޖީއަށް ކަމަށް ބެލެވެއެވެ. މި ދެ ބާވަތުގެ ޓެކްނޮލޮޖީއަށް "އެކްސްއާރު" އޭ ކިޔައިއިރު، މިއީ ޑިޖިޓަލް މައުލޫމާތު ދިރިއުޅުމުގެ މާހައުލާ ގުޅުވައިލައި، ވާޗުއަލްގެ މުޅިން އާ ހަރުފަތަކަށް ދިއުމަށް ގޫގްލްއިން ކުރާ މަސައްކަތެކެވެ.
މި ޚަބަރުތަކުގައި ޚާއްސަކޮށް ސެމްސަންގްގެ ނަން ފާހަގަކުރެވިފައިވާއިރު، އެކްސްއާރު ޑިވައިސްތައް ތަރައްގީކުރުމުގައި މި ދެ ކުންފުނީގެ މެދުގައި ބައިވެރިވުމެއް އޮތުމުގެ ފުރުސަތު ބޮޑެވެ.
އެޕަލްގެ ވިޝަން ޕްރޯއާއި މެޓާގެ ކުއެސްޓް ހެޑްސެޓްތަކާ އެކު އެކްސްއާރު މާކެޓްގައި ވާދަވެރިކަން ވަރަށް ބޮޑުވެފައިވާއިރު، ގޫގްލްއަށް މި ދާއިރާގައި ކުރިއެރުމެއް ހޯދުމަށް މިފަދަ ބައިވެރިވުންތަކަކީ މުހިންމު ކަމެކެވެ.
މި އިވެންޓުގައި ފެނިގެންދާނެކަމަށް ބެލެވޭ އަނެއް މުހިންމު ކަމަކީ ގޫގްލްގެ އޭއައި މޮޑެލް "ޖެމިނައި" އެންޑްރޮއިޑް އެކްސްއާރު ސިސްޓަމާ ގުޅުވައިލުމެވެ.
ޖެމިނައިގެ ގާބިލިއްޔަތުތަކުގެ ސަބަބުން ސްމާޓް ގްލާސްއާއި ހެޑްސެޓް ބޭނުންކުރާ ގޮތް އިތުރަށް ފަސޭހަވެ، ޒާތީ މައުލޫމާތާއި އަޑުން ކޮންޓްރޯލްކުރާ ފަސޭހަ ނިޒާމުތައް ތައާރަފުވާނެއެވެ. މިއީ އޭއައި ބޭނުންކޮށްގެން ފޯރުކޮށްދެވޭ ތަފާތު ތަޖުރިބާތަކެއް ފެނިގެންދާނެ ކަމަށް ބެލެވޭ ގޮތެކެވެ.
މި އިވެންޓުން ހާމަކޮށްދެނީ ވެއަރަބަލް ޓެކްނޮލޮޖީއާއި އެކްސްއާރ ދާއިރާގައި ގޫގްލްއިން އާ އީޖާދުތަކެއް ކުރުމަށް އޮތް ބޮޑު އަޒުމެވެ. މީގެ ސަބަބުން ޑިޖިޓަލް ކޮންޓެންޓްއާއި ދިރިއުޅުމުގެ މާހައުލާ ގުޅުވައިލައި، އިތުރަށް ފަސޭހަކަމާއެކު ޓެކްނޮލޮޖީ ބޭނުންކުރެވޭނެ އާ ދުނިޔެއަކަށް ވާސިލުވާން ފެށުމުގެ ސިގްނަލެއް ދެއެވެ.
މިފަދަ ސްމާޓް ޑިވައިސްތަކުގެ މުސްތަގުބަލް ކަނޑައެޅިދާނެ މި އިވެންޓަށް ޓެކް ދުނިޔެއިން އިންތިޒާރު ކުރުންވަނީ ވަރަށް ބޮޑުވެފައެވެ.