ހުޅުމާލޭގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިމާރާތްކުރަން ފެށި "ކޭ ޕާކް ރެސިޑެންސް" ފުލެޓްތަކުގެ މަސައްކަތް ނުނިމޭތީވެ، އެ ކުންފުނި ޖަވާބުދާރީކުރުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީގައި އެދިއްޖެއެވެ.
މި ޕްރޮޖެކްޓް އެޗްޑީސީ އިން ކޮރެއާގެ ކުންފުންޏެއް ކަމަށްވާ ހަންބޯ ކޮމްޕެނީ ލިމިޓެޑްއާ ހަވާލުކުރީ 2016 ވަނަ އަހަރުގައެވެ.
މި ޕްރޮޖެކްޓަކީ ދެ އަހަރުތެރޭގައި ނިންމަން ހަވާލުކޮށްފައިވާ މަސައްކަތެއް ނަމަވެސް، މި އެޕާޓްމެންޓް ކޮމްޕްލެކްސްގެ މަސައްކަތަށް މިހާރު ހަތް އަހަރު ވެއްޖެއެވެ.
އެގޮތުން، މިކަމުގައި އެޗްޑީސީން މިހާތަނަށް އެޅި ފިޔަވަޅުތަކާއި، މި މައްސަލަ ހައްލު ކުރުމަށް ކޮށްފައިވާ މަސައްކަތްތަކާއި މިކަމުގައި އެކުންފުނިން އަމަލުކޮށްފައިވާ ގޮތް ތަފްސީލީ ގޮތެއްގައި ބަލައިދިނުމަށް އެދި ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) ވަނީ އެސްއޯއީ ކޮމިޓީއަށް ހުށަހަޅާފައެވެ.
ކުޑޫ މިއަދު އެސްއޯއީ ކޮމިޓީއަށް ހުށަހެޅި ސިޓީގައި ކޭ ޕާކް ފުލެޓްތައް ގަތުމަށް 125 އަށްވުރެ ގިނަ ފަރާތުން ފައިސާ ދައްކާ އެއްބަސްވުން ހަދާފައިވާކަމަށް ފާހަގަކޮށްފައިވެއެވެ.
މީގެއިތުރުން، އެޗްޑީސީއިން މި ޕްރޮޖެކްޓް ހަންބޯ ކޮމްޕެނީއާ ހަވާކުރިއިރު، އެކަށީގެންވާ ޑިއު ޑެލިޖެންސްއެއް ހަދާފައި ނުވާ ކަމަށާއި، ޕްރޮޖެކްޓް ކުރިއަށް ގެންދިއުމަށް ހަވާލުކުރެވުނު ފަރާތުން އަމާލުކުރަންޖެހޭ އުސޫލުތަކަށް އަމަލުކޮށްފައިނުވާ ކަމަށް ވެސް ވަނީ ތުހުމަތުކޮށްފައެވެ.
ކުޑޫ މިއަދު ކޮމިޓީއަށް ހުށަހެޅި ސިޓީގައި ވިދާޅުވީ މި މައްސަލަ ބެލުމަށް ހުށަހެޅި ސަބަބަކީ ސަރުކާރުގެ ކުންފުންޏެއްގެ ބެލެނިވެރިކަމުގެ ދަށުން ކުރިއަށް ގެންދާ މި ފަދަ ޕްރޮޖެކްޓެއްގައި އެތައް ބައެއްގެ އިހުމާލާއި، ގަވާއިދާ ޚިލާފު ކަންތައްތަކެއްގެ ސަބަބުން ބޯހިޔާވަހިކަމުގެ އިންތިޒާރުގައި ތިބި، އެތައް ރައްޔިތުންނަަކަށް މާލީ ގޮތުންނާއި ނަފްސާނީގޮތުން ގެއްލުންތަކެއް ވަމުންދާތީ ކަމަށެވެ.
އެޗްޑީސީގެ ފަރާތުން ޖަވާބު ހޯދުމަށް އެދިފައިވާ ބައެއް ސުވާލުތައް:
- ޕްރޮޖެކްޓް ހަވާލުކުރެވުނު ކޮރެއާ ކުންފުނި ކަމަށްވާ ހަންބޯ ކޮމްޕެނީ މިހާރު ކޮބައިތޯ އާއި މައްސަލަ ހައްލުކުރުމަށް އެ ކުންފުންޏާއެކު މިހާތަނަށް ކުރެވުނު މަޝްވަރާތަކާއި މަސައްކަތްތަކައް އަދި އެކަމުގެ ނަތީޖާ އަކީ ކޮބައިތޯ؟
- ހަތް އަހަރު ވެގެންދިޔައިރު ވެސް ޕްރޮޖެކްޓް ނުނިމުމުން އެޗްޑީސީއިން އެޅި ފިޔަވަޅުތައް
- ބިމުގެ ވެރިފަރާތުގެ ހައިސިއްޔަތުން ޕްރޮޖެކްޓް ހަވާލުކުރެވުނު ފަރާތަށް އެޅި ފިޔަވަޅުތައް
- ޕްރޮޖެކްޓްގެ ދަށުން އިމާރާތްކުރަމުންދާ ތަނުން ފްލެޓް ގަތުމަށް ފައިސާ ދެއްކި ފަރާތްތަކުގެ މައުލޫމާތު ދެއްކި ފައިސާގެ އަދަދު އެޗްޑީސީއަށް އެނގޭނެތޯ
- ޕްރޮޖެކްޓްގެ މަސައްކަތް މިހާރު އޮތް ހިސާބު
- ޕްރޮޖެކްޓް ކުރިއަށް ގެންދިއުމުގެ މަސްއޫލިއްޔަތު ހަވާލުކޮށްފަ އޮތީ މިހާރު ކޮން ފަރާތަކާތޯ
- އެޕާޓްމެންޓް ގަތް ފަރާތްތަކަށް ދިމާވެފައިވާ މައްސަލަތަކަށް ހައްލު ހޯދުމަށް އެޗްޑީސީ އިން ކުރި މަސައްކަތް
ކުޑޫ ވިދާޅުވީ މި މައްސަލައަކީ ހިންގާފައިވާ ޖަރީމާއެއްކަމަށެވެ. އަދި މިކަމުގައި ރައްޔިތުންގެ މަޖިލީހުގެ އިސް ނެގުމެއް އޮންނަންވާނެ ކަމަށާއި، މި މައްސަލަ ވީހާ ވެސް އަވަހަކަށް އެސްއޯއީ ކޮމިޓީއިން ބަލައިދިނުމަށް އެދޭކަމަށެވެ.
ކޭޕާކު ފުލެޓުތައް އޮޅުވާލައިގެން ގިނަ އަދަދެއްގެ މީހުންނަށް ވިއްކި ކަމުގެ ތުހުމަތު ކުރެވޭ ހަސަން މަމްދޫހު (މަންޑޭ)އާއި ޖައިޝާން ސައީދުގެ މައްޗަށް ވަނީ ދައުވާކޮށްފައެވެ.
އެ މައްސަލައިގައި ދައުލަތުން މަންޑޭގެ މައްޗަށް 100އަށް ވުރެ ގިނަ ދައުވާ ކުރާއިރު، ޖައިޝާންގެ މައްޗަށް 98 ދައުވާއެއް ކުރެއެވެ.