ހުޅުމާލޭ ދެވަނަ ފިޔަވަހީގައި އަމިއްލަ ފަރާތަކުން އަލަށް ބިނާކުރި "މަސްޖިދު ހަސަން އާދަމް" މިސްކިތް މިއަދު ހުޅުވައިފިއެވެ.
ނިރޮޅު މަގުގައި ބިނާކޮށްފައި ހުރި އެ މިސްކިތް މިއަދުގެ ހުކުރު ނަމާދަށް ހުޅުވައިދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދެވެ. މިއީ، 1،500 މީހުންގެ ޖާގައިގެ ބޮޑު އަދި ރީތި މިސްކިތެކެވެ.
މިސްކިތް ރަސްމީކޮށް ހުޅުވައިދެއްވުމަށް ފަހު ވާހަކަދައްކަވަމުން ވަޒީރު ވިދާޅުވީ، ކުރިއަށް އޮތް ރޯދަ މަހާ ދިމާކޮށް ދެވަނަ ފިޔަވަހީގައި ދާއިމީ އިތުރު މިސްކިތެއް ހުޅުވިގެން ދިއުމަކީ އެ ސަރަހައްދުގައި ދިރިއުޅޭ ރައްޔިތުންނަށް ވަރަށް ބޮޑު ލުއިފަސޭހައެއް ލިބޭނެ ކަމެއް ކަމަށެވެ.
އަމިއްލަ ފަރާތަކުން ބިނާކުރި މި މިސްކިތުގެ އިތުރުން ވެސް އިތުރު ފަސް މިސްކިތެއް ދެވަނަ ފިޔަވަހީގައި އަންނަނީ ބިނާކުރަމުންނެވެ.
މި މިސްކިތުގެ އިތުރުން ދެވަނަ ފިޔަވަހީގައި ދެވަނަ ފިޔަވަހީގައި ހައުސިން ޑިވޮލޮޕްމަންޓު ކޯޕަރޭޝަން (އެޗްޑީސީ)ން ވަނީ ރޯދަ މަހަށް ވަގުތީ އިތުރު މިސްކިތެއް ވެސް ބިނާކޮށްފައެވެ.
މީގެ ދެ އަހަރު ކުރިން ހުޅުމާލޭގެ ދެވަނަ ފިޔަވަހީގައި އެއް ދާއިމީ މިސްކިތް ވަނީ ހުޅުވައިފައެވެ. އެއީ، އަމިއްލަ ފަރާތަކުން އެޅި މިސްކިތެކެވެ. އެ މިސްކިތަކީ 1994 ވަނަ އަހަރު މަރުވި އަހުމަދު އަމީލް ޖަލީލްގެ ހަނދާނުގައި "މަސްޖިލު ޢަމީލް ޖަލީލް"ގެ ނަމުން ނަންދީގެން އޭނާގެ ދަރިން އިމާރާތް ކުރި މިސްކިތެކެވެ.